مصر موتورز مجتمع السيارات - مخطط تصفيه الثوره ,,

المتعاطفين وسيد العارفين...
صح فيه متعاطفين مع الاخوان ودول صنفين لو دققنا في الكلمة...أولهم لسه في سنة اولى اخوان وما وصلش للمرتبة الكبرى درجة اخ ... وتانيهم انا مش اخوان بس باحترمهم...
صح انا موافقة اننا طول الوقت لازم نحاول مع كل الناس للقضاء على فكر الاخوان وكل فكر خرج منه وكل مسخ انبثق عنهم...بس يا استاذ عماد الهي يسترك حل ازمة المتعاطفين وانت سيد العارفين لا يمكن يكون بالتصالح ولا بكلام المصاطب ولا ببوسة على الخد ده وبوسة على الخد ده ... لكن لازم له استراتيجية ورؤية د...ولة وتخطيط مؤسسات و شغل اعلام مش اعلان زي اللي بتمارسة العائلة الكريمة...ايوه وانت استاذنا وعارف اللي بتعملوه اسمه شغل اعلان مش شغل اعلام... ولازماً ولابد يكون عندنا:
- تطبيق لديكتاتورية القانون يعني ما فيش حاجة اسمها اخوان ولا ترتان لكن فيه مؤسسات واحزاب سياسية يندمج فيها الجميع ويمارس من خلالها الجميع مواهبه السياسية...
- حدوتة المصالحة دي جهل واستسهال وعدم خبرة ولنا في النازية خبرة واسوة وقدوة. المانيا خرجت من الحرب العالمية التانية بتقول ما فيش نازيين والقانون صارم والاندماج سيد الاخلاق.
- تعليم قائم على فكر المواطنة و يرسخ الانتماء وتتقطع رجل اي مدرس من اي مدرسة لو لم يلتزم بقيم الدولة وفكرها ولنا في امريكا اللي حضرتك بتقيم فيها برده اسوة حسنة لما رفدت مدرس سخر يا دوب من طالب لابس لبس المارينز.
- ثقافة وفنون وفكر راقي يفتحوا الباب المقفول والموارب في عقول اتجمدت وخافت تفكر وافتكرت ان التفكير حرام وعيب.
ده هو الصح يا سيد العارفين اما موضوع المصالحة ده فما خدناهوش في الكيلاس خالص ولا عقلي ولا ضميري يقبله ... ودمتم
نشوى الحوفى