مصر موتورز مجتمع السيارات - كرولتي الي كانت جميلة.

اقتباس:

المشاركة الأصلية كتبت بواسطة dr_eslam_66 (المشاركة 363420)

طيب كدة أفتكر إني مافيش جديد عندكوا انا هشرحلكوا الموقف بالتفصيل علشان نستفيد كلنا:
أولا أنا شرحت الي حصل ووقفت قبل ماتيجي عربية الشرطة علشان تحدد مين الي غلطان.
الاول وصلت عربية الشرطة وكان واضح جدا فيهم عدم التحيز لأي سيارة سواء ليا أو للسيارة الميكروباص مع إني كنت متخيل غير كدة خاالص.
أول حاجة او تعليق ليه إني غلطان لما طلعت من الإشارة قبل مايفضالي مكان في الشارع الي انا داخل فيه ولما حكيتله الي حصل وقولتله بردو إني الشرطي هوا كمان كان واقف في الصندوق الأصفرو هوا كمان ماكانشي ليه مكان في الشارع الي داخله قالنا طيب طلعوا العربيتين من بعض وأقفوا على جنب.
قبل ما أحرك العربية أصريت إني اوريه إني مش مخبوط في ارفرف بس أنا مخبوط من اول نص الباب بتاعي وإني عربيتي لسة داخل الحارة بتاعتي ماطلعتش منها ياعني مش ماسك حارتين ولا حاجة وقالي اووك تمام.
حركنا المايكروباص مارشيدير وطبعا كان غارز فيا غرزة سووودة.
المهم وقفنا على جنب وبدأنا نتكلم الشرطة كانوا عايزين يدوني مخالفة الإنتظار في مفترق الطرق ومش عايزين يدوها للعسكري الي كان سايق الميكروباص بدعوى إنه مرتبه مش مستحمل وطبعا أنا ما إعترضتش لأني كنت مقتنع إني غلطان وبعد فترة من المناقشة قالنا الشرطي إنه مش قادر يحدد دا خطأ مين ولازم نروح القسم وأنا أحترم فيه امانته ونزاهته المطلقة.
روحنا قسم الشرطة وهناك إتعاملنا مع رتبة اعلى منه وكان الراجل محدد واواضح وصرييح قال ماتديش حد منهم أي مخالفة لأني يا إما أديها للإتنين وإلا مش هياخدها أي حد فيهم وبالنسبة للحادث:
لو كان الميكروباص ثابت والكرولا هيا الي صدمته بجنبها تبقى الكرولا هيا ال متسبب ولو كان الميكروباص بيتحرك وحتى مع حركة الكرولا وهوا الي صدمها يبقى هوا المتسبب.
وطبعا معتمد على أقوالنا مفترضا فيها الصدق وكانت المفاجأة إني العسكري أنكر إنه كان بيتحرك وإني انا الي صدمته.
وانا وريتهم نقطتين بالظبط لما وقفنا وصورت كان الباب أولردي عندي مخبوط ودا ماينفعشي وهوا واقف وإني انا الي صدمته.
النقطة التانية إني المراية بتاعتي كانت مفتوحة للامام مش لورا ياعني المايكروباص هوا الي خبطني وكمل عليا لحد الرفرف.
وإقتنعوا تمام وتم عمل التقرير باني متضرر مش متسبب.

الدروس المستفادة:
1- لما تكون في مفترق طرق دايما خد بالك إني السواق الي عايز يدخل الشارع فاكر هوا كمان إني الأولوية ليه وحتى لو كانت ليك لازم تتأكد إنه مش داخل ولو بكلكس صغير تقوله فيه إنك قررت إنك تدخل الأول.
2-لما تكون في إشارة إوعى تطلع منها وحتى لو كانت خضرى لو الشارع إلى إنتا هتدخله زحمة ومالاكشي مكان فيه.
3- لو لاقدر الله عملت حادثة أول حاجة تعملها إنك بمنتهى الهدوؤ تفرمل وتشغل الإنتظار وترفع الهاند بريك وتبطل الماتور وتنزل تشوف إيه الي حصل.
4- قبل ماتعمل أي حاجة صور العربية كويس وصور الحادث عسى ان تكون هذه هيا نقطة إثبات حقك.
5- لما تيجي الشرطة تكتب التقرير لازم تفهم كل كلمة بيقولها وليه وإيه وجهة نظره ولو إعترضت على الي مكتوب من حقك تطلب منه يروح القسم وهناك تعمل المحضر لأني في بعض الأحيان يمكن ان تكون مظلوم.
6- مهما كنت حريص فأنت مسؤول عن اخطاأك وأخطاء الآخريين.
7- الحامي هو الله.

حمد لله على سلامتك
و شكر على النصائح القيمة جزاك الله خير