رد: الريجاتا بتطبل معايا عند سرعة 80 تحديدا
 

الحمد لله الذي بنعمته تتم الصالحات
امبارح انا رحت للميكانيكي وفضل مصر على رأيه ان الطلمبة ضعيفة، جربنا نفخنا كل خراطيم البنزين تاني وركبت الطلمبة القديمة اللي كانت موجودة، دورت العربية وشاف خرطوم البنزين اللي طالع من الطلمبة لقى ان ضخ البنزين كويس، طلعت جربتها حصل نفس المشكلة، العربية بطلت عند سرعة 80.
رجعت للميكانيكي قالي يا اما هاصلحهالك يا اما هاقفل الورشة وأبطل ميكانيكا
بص على الخرطوم اللي طالع من الطلمبة لقينا ضخ البنزين قل عن الأول، الراجل قالي يبقى كدة العربية ضخ البنزين فيها قليل على السرعات العالية والطلبمات الاثنين الجديدة والقديمة ضعاف ( لسة مغير فلتر البنزين عشان ماحدش يقولي الفلتر مش نضيف ).
المهم فكينا العمة، في اثنين خراطيم واحد بيدخل بنزين للكاربيراتير، والثاني بياخد البنزين الراجع يوديه للتانك، قام الراجل عمل اختراع كدة جاب حاجة وسد بيها المخرج اللي بيودي البنزين اللي راجع للتانك وراح سد الخرطوم اللي راجع للتانك، بقى الكاربراتير فيه خرطوم واحد بس اللي بيدخل بنزين، وقالي نعوض ضعف ضخ البنزين في السرعات العالية بإن إحنا نسد الراجع للتانك، وقالي المشكلة الوحيدة انها ممكن تشرق ولو شرقت هاتشرق وهي في السلانسية، دور العربية وسابها دايرة شوية تمام مافيش مشكلة، قالي اطلع جرب العربية ، طلعت جربتها الحمد لله بقت زي الفل ومشيت بيها على 120 لفترة بس خفت ازود عن كدة عشان انا مش بحب السرعة، المهم فضلت ماشي بيها حوالي ساعتين العربية زي الفل بتسحب ومش بتبطل خالص ولا في شرقة ولا أي حاجة.
كدة المشكلة اتحلت الحمد لله

أنا بس عايز أعرف هل اللي عمله الميكانيكي ( سد خرطوم البنزين الراجع للتانك ) دا في ضرر على العربية، أنا عندي قناعة تامة ان اللي صنع العربية ماعملش الحاجة دي كدة وخلاص اكيد ليها لازمة. فهل مثلا اللي عمله الميكانيكي دا هايخلي العربية تسحب بنزين أكتر واللا ايه المشاكل اللي ممكن تحصل من كدة؟؟؟؟؟؟

وانا بشكر جميع الزملاء اللي شاركوني بمقترحاتهم وأفكارهم ودعواتهم

رد: الريجاتا بتطبل معايا عند سرعة 80 تحديدا
 

الحمد لله انا فى قمة السعادة انا كنت مسافر مصر امبارح و طول السكة رايح جاى مبفكرش غير فى الموضوع بتاعك و لما رجعت باليل قتلت الموضوع بحثا على google و معظم الحلول كانت دورة البنزين بس كنت بستبعدها بناء على الى حصل

انا بحب اشكرك على نقل الحل و استكمال الموضوع لعموم الاستفادة
و طول فترة محاولاتك مع الميكانيكى للاصلاح كل مرة كانت بتفشل محاوله ده فى حد ذاته كان بيقرب خطوة للحل

و ربنا يباركلك فى العربية لانها عربية محترمة جدا جدا

رد: الريجاتا بتطبل معايا عند سرعة 80 تحديدا
 

حاجة من الاتنين يا قطع الغيار مغشوشة يا الترس او تعشيقة الطرمبة فى الماتور فيها مشكلة

رد: الريجاتا بتطبل معايا عند سرعة 80 تحديدا
 

رد: الريجاتا بتطبل معايا عند سرعة 80 تحديدا
 

اقتباس:

المشاركة الأصلية كتبت بواسطة احمد على 1999 (المشاركة 167960) حاجة من الاتنين يا قطع الغيار مغشوشة يا الترس او تعشيقة الطرمبة فى الماتور فيها مشكلة

فعلا ممكن يكون رأيك صح!! ممكن يكون البنز اللى بيشغل الطلمبة متآكل وأصبح أقصر وبالتالى لايمكنه من دفع الطلمبه لأخر المشوار وبالتالى ضغط ضعيف.


أنا بس عايز أعرف هل اللي عمله الميكانيكي ( سد خرطوم البنزين الراجع للتانك ) دا في ضرر على العربية، أنا عندي قناعة تامة ان اللي صنع العربية ماعملش الحاجة دي كدة وخلاص اكيد ليها لازمة. فهل مثلا اللي عمله الميكانيكي دا هايخلي العربية تسحب بنزين أكتر واللا ايه المشاكل اللي ممكن تحصل من كدة؟؟؟؟؟؟

أولا مبروك لوصولك الى السبب.
خرطوم الراجع لايوجد فى السيارات القديمة ووظيفته تخفيف الضغط على طلمبة البنزين، وبالتالى سد خرطوم البنزين الراجع سيؤدى الى قصر عمر طلمبة البنزين وبالطبع لن يتسبب فى شرقان العربية لوجود بلف أعلى عوامة الكاربيراتير ولكن ممكن يؤدى الى زيادة فى استهلاك البنزين.