المشاركة الأصلية كتبت بواسطة salahabdelnabi (المشاركة 65659)

اخى الكريم ...منور المنتدى واهلا بيك عضو جديدا معانا ويارب نقدر نخدمك ونفيدك وتشاركنا بكل جديد
اولا الف مبروك مقدما وربنا يديك خيرها ويكفيك شرها
ثانيا وبسرعة كده احسنت الاختيار باختيارك الفيرنا بدل الافيو
ثالثا اسمحلى ارد على كل سؤال من اسئلة حضرتك
1- موديلات 2009 الموجودة طبعا زيرو .... و 2010 لسة مانزلتش فى الفيرنا .... بعد رمضان وعليك خير وفرق السعر مش هايكون كبير ممكن الفين تلاتة بالكتير
2- السعر فى التوكيل الاوتوماتيك فول اوبشن 75000ج ودى بالحجز والاستلام خلال شهر او شهرين لانها مش موجودة تقريبا
المانيوال نوعين 1- 1600 cc تقفيل مصرى
فول اوبشن 68000 ج
هاف اوبشن 65000 ج
النوع التانى 1500 cc واسمها فيرنا فيفا ودى تقفيل هندى ويفضل ماتجيبهاش احسن
فول اوبشن 67000 ج
هاف اوبشن 64000 ج
3- التوكيل مابيفرقش حاجة عن المعارض الا فى فرق سعر بسيط احيانا بيوصل مابين 500 الى 1000 ج اعلى او اقل من التوكيل بس المعارض بتبقى العربية حاضرة فى الغالب والتوكيل احيانا بيسلمك فى وقتها او بعدها بحوالى اسبوعين واحيانا شهر على حسب خط الانتاج
4- توكيل غبور فى عمارات العبور بصلاح سالم وده الرقم المختصر للتوكيل16216 او 22633608 او 22633615 وممكن بدل ال 5 - 6 - 8
وزاى ما وضحت لحضرتك التوكيل ممكن العربية تكون حاضرة وممكن الاستلام بعد فترة من اسبوع لحد شهر بالكتير
انما المعارض فى العالب العربية حاضرة والاستلام فى ساعتها
5- بالنسبة للكماليات فى الهاف اوبشن والفول اوبشن بيكون فى الاتى
بيان............... الهاف اوبشن ...................الفول اوبشن
الزجاج ............يدوى ......................... ....كهرباء
سنتر لوك .........لايوجد ......................... ..يوجد
ايريال الراديو .....يدوى ......................... ...كهرباء
عداد RPM .......لايوجد ......................... ...يوجد
الكاسيت ..........عادى ......................... ...cd - mp3
تكييف ..........يوجد ......................... .....يوجد
باور ...........يوجد ......................... .....يوجد
نور الصالون ... وسط الصالون ..................... المقصورة الامامية - ووسط الصالون
والله الفرق مش كبير اوى لو حبيت تركب الحاجات دى من مكان مضمون ومايخليش العربية تخرج من الضمان زاى محلات " عشم نوار " فى مصر الجديدة والفرق والحاجات بتوصل تمنها حوالى من 1500 الى 2000 ج يعنى الفرق من وجهة نظرى مش كبير فالافضل تجيبها فى العربية جاهزة احسن وده رأيى المتواضع طبعا وليك مطلق الحرية
6- افضل الالوان بالترتيب الاسود - الفيرانى - النبيتى - الكحلى - الفضى
وطبعا الالوان دى مسألة اذواق فقط ماهاش اى تأثير على سعر العربية فى اى حاجة
لكن برضه رأيى المتواضع ان الاسود فى العربيات الكبيرة بيكون اشيك عليها اوى من العربيات الصغيرة
انا عن نفسى جايب النبيتى وجميل جدا فيها وناس كتير برضه بتشكر فى الفيرانى اوى لانه بجد تحفة فيها
وعموما انت وذوق حضرتك " لولا اختلاف الاذواق لبارت السلع "
7- فترة التليين بتكون لمسافة 1000 ك الاولى ودى ماتحاولشى تمشى بالعربية ازيد من سرعة 80 ك / س
وماتحملشى حاجات تقيلة فى العربية
وماتقطرشى بيها عربية تانية
تحافظ دايما على نقلات الغيار فى السرعات المحددة لذلك وماتحرقش على الغيار
طبعا انا عارف الجو حر نار لكن لو قدرت ماتشغلش التكييف فى التليين يكون افضل ولو حبيت تشغله يبقى على الوضع التانى وعلى درجة واحد عشان ماتحملش على الموتور فى فترة التليين
8- بالنسبة لاجراءات ترخيص السيارة هى سهلة انت بتاخد خطاب للمرور من المعرض بنوع العربية ورقم الشاسيه ورقم الموتور وموديل العربية يعنى سنة الصنع وبتروح لوحدة المرور اللى تابع ليها السكن وبتصور البطاقة وبتجيب ملف ترخيص وبيتم اخذ بصمة الموتور والشاسيه من المهندس المختص وبتعمل تأمين اجبارى فى مكتب التأمين اللى موجود فى وحدة المرور وبتشترى طفاية جديدة واسأل على المثلث وشنطة الاسعافات فى بعض وحدات المرور بتوزعهم مجانا مع الترخيص الجديد ولو ماكنش بتشتريهم بحوالى 60 ج الاتنين وبتدفع ضريبة الترخيص ورسومه ويفضل ان ترخص 3 سنين طالما هاتشترى كاش عشان تترحم من عذاب ودة المرور فى الترخيص كل سنة وبعد كده بتاخد الرخصة والنمر لو جديدة يبقى مبروك لو مافيش النمر الجديدة بتاخد نمر مؤقتة وبالتالى بتطلعلك رخصة مؤقتة لحد لما تروح تجدد النمر
9- بالنسبة للحاجات اللى تهتم بيها وانت بتشترى العربية
بص على قفل الابواب اذا كانت مظبوطة والا فيه باب مفتول - كاوتش الابواب - سجادة الشنطة
ولاعة السجاير ووش الكاسيت وشنطة العدة والاستبن والكوريك وجرب العربية شغلها وبطلها كذا مرة وشيك على لمبات التحذير اللى فى التابلوه شغالة والا لا وجرب التكييف بدرجاته طبعا كل ده والعربية واقفة --- احسن تاخدها وتخلع هههههههه
ويارب يوفقك لاختيار الاحسن واتمنى اكون جاوبت على اسئلتك ببساطة ووضوح واى حاجة انا وكل المنتدى تحت امرك
اللهم ان كنت وفقت فمنك وحدك وان كنت نسيت او اخطأت فاغفر لى فانت الغفار ذو القوة المتين