|
رد: مـقـــا لا ت
الله يرحمه يارب
شكرا لهذه المقاله ا خالد |
رد: مـقـــا لا ت
د- أحمد زويـل عالم مصرى عظيم من مواليد محافـظة البحيرة وخريج كلية العلوم وطفش من مصر فى اوائل السبعينيات بسبب تدنى المستوى العلمى بها ووقتها كنا لاحديث لنا الا عن الحرب واستعادة سيناء وعاش فى امريكا ونبغ بها جدا حتى حصل على جائزة نوبل وحتى لحظة اعلان حصوله على نوبل لم يكن احد يعرفه كغيره من كثير من العلماء المصريـين الذين يعيشون فى مختلف دول العالم ويستفيد العالم كله من نبوغهم ماعدا مصر... أمهم التى انجبتهم وتعلمو فيها ولعلمكم الخاص يعيش اكثر من 4000 عالم مصرى فى مختلف فروع العلم فى مختلف دول العالم ولكن احمد زويل مختلف عن معظم هؤلاء .....فهو مصرى حتى النخاع ......وكلهم مصريين طبعا لكن هو مختلف هو نفسه يخدم البلد دى منى عينه انه يطبق كل اللى شافه ودرسه على مصر وفعلا بدأ بعد نوبل مباشرة يـيجى مصر كتير ويحاول ان يقيم مشروعات تخدم أهل هذا البلد وبدأت اتابع الموضوع ووجدت انه تقدم بطلب لانشاء جامعة كبرى على مستوى علمى عالمى على شاكلة (مثل ) جامعات امريكا ولن تتحمل مصر اى تكاليف لانشائها وفوجىء بأن الموضوع لايتعدى عن الاحتفالات والولائم والموائد والتصـفــيـق............و شكرا ومفيش حد بـيـكلمه عن اى مشروعات داخل مصرأو عن أفكاره لخدمة مصر وأنا شخصيا سمعت تصريحا لعاطف عبـيد وكان وقـتها رئيسا لوزراء مصر لما سألوه عن مشروعات أحمد زويل فى مصر فـقال تصريح غاظنى وفرسنى بجد بسلامته قال لا.فض فوه ومات حاسدوه / خلاص خلوه يـجيـنى مكتبى ويقول أفكاره وانا ادرسها واعرضها على لجنة لدراستها ونشوف لا اله الا الله فعلا .....كما قال الشاعر العلم يبنى قصورا لاعماد لها ....... والجهل يهدم بيوت العز والشرف فعلا رجل جاهل لايعلم ان العلم يؤتى اليه ولايأتى الى أحد بقى عالم فى حجم أحمد زويل بدل م تطلبه وتقول له / انا سمعت ان عندك مشروع عايز تخدم بـيه البلد ياريت نتقابل واشوف افكارك أيه وطلباتك ايه ؟؟؟؟ بدل كده تقول للمذيعة / (خليه) يجـيـنـى ؟؟؟ وهعرض أفكاره على لجنة ؟؟؟؟ المذيعة هيا اللى هتخليه يـجيـلك ؟؟؟ حسبى الله ونعم الوكيل المهم زهق الدكتور أحمد زويل ومشى ........ولكنه لم يقطع علاقته بمصر واصبح يأتى اليها كثيرا واستيقظت فى أحد الأيام التى اعتبرها من الأيام السيئة فى حياتى لأقرأ فى الجرائد ان مشروع الجامعة التى كان مفروض أقامتها فى مصر تم التعاقد على أقامتها فى السعودية أيه ده ......هو السعودية احسن مننا لدرجة انهم خلصو مع الراجل فى وقت قياسى وكمان بدأو التنفيذ والله عيب ولكن الرجل لم يـيأس وظل يحاول وكنت اشاهده كثير فى الامارات والكويت وغيرها وكنت مغتاظا فكل الدول تريد الاستفادة بعلمه الا نحن وحين بدأت الثورة يوم 25 يناير كان أخر واحد اتوقع مجيئه من الخارج هو الدكتور أحمد زويل وكان رأيى انه راجل بتاع كيمياء وملوش فى السياسة لكن حبه لمصر كان اكبر والحقـيـقة كنت دائما احب ان استمع اليه و أستمتع به وهو يتحدث ....فهو راجل منظم جدا وكلامه مرتب جدا ومركز جدا.....ويجعل بطاريات مخك فى حالة شحن مستمر ولاتـستطيع ان توقـفـها ولكن لم يدر بخلدى ان يكون مشاركا سياسيا أو له أفكار سياسية ...فالسياسة لها أهلهاو ناسها ثم فوجئت به يشكل لجنة للحكماء فى ميدان التحريرويحاور ويفاوض ويناقش والجميع يستمع اليه فهو له كاريزما وقابلية لدى الكثيرين من شعب مصر ثم سمعته يتحدث فى البرنامج عن كيفية قيادة مصر وكيفية خدمة مصر و...و.....و..... وكان هذا فى برنامج مصر النهاردة مع محمود سعد وأنا أصلا لا أشاهد التليفزيون المصرى لكن اثناء تحولى من قناة العربية الى قناة الجزيرة وجدت صورة احمد زويل فرجعت ووجدت انها الفضائية المصرية واجبرنى زويل على مشاهدتها وسحرنى بكلامه .....وجرجرنى الى سماعه .......وأجبرنى الا اتحرك من أمام التيلفزيون حتى انتهى البرنامج منذ ساعة تقريـبـا ووجدت احمد زويل يضع برنامجا لـقيادة مصر وشميت ريحة كده انها دعاية انـتـخابـيـة مبكرة لرئاسة مصر انا شخصيا أأمل ان ينتخب الشعب هذا الرجل رئيسا لمصر.....ان رشح نفسه للأنتخابات حتى ولو كان هناك حسابات سياسية لاعلاقة لها بالعلم ....فهو رجل له علاقاته الدولية الكثيرة واحترامه الدولى الكبير وهو ذو رأى وفكر وعلم وأهم من كل هذا انه هو نفسه يخدم مصر وشعبها وان لم يكن رئيسا فاتمنى ان يكون وزيرا للتعليم أو وزيرا للتعليم العالى ثم نترك عقله لكى يعمل ولا نفرض عليه القوانين الجامدة والمتحجرة لكى يسير تحت عبائـتها من قلبى اتمنى ان يكون له منصب قيادى فى هذا البلد .....ليس مهما طبـيعة المنصب المهم انه بـيـحب مصر ونفسه يخدم اهلها اللى هما أصلا أهله |
رد: مـقـــا لا ت
اقتباس:
وربما حد منهم يقل عقله ويتصل بهذا الرقم ونقول للعلم ان هذا الرقم تفصيله كالأتى 0900 وهى مدخل اى رقم لبرامج المسابقات التليفزيونية ثم 11 2 2011 تاريخ هروب مبارك هذا للعلم واخلاء المسئولية فـقـط |
رد: مـقـــا لا ت
مفيش جديد الواد بيرلسكونى رئيس وزراء ايطاليا راجل صايع ومشيه بطال وبتاع بنات وكانو ولازالو بـيحقـقـوا معاه علشان اغتصاب بنت مغربـية هناك وبـيـكـره الأسلام والمسلمين بطريـقـة بشعة لكن لما سـألوه عن رأيه فى الثورة المصرية فـقال الفرطوس (شتيمة صعيدى ليس لها معنى ) ردا عـبـقريا بسلامته رد على السؤال وقـال / وما الجديد فى ذلك ........لـقـد صنع المصريون التاريخ كعادتهم يعنى انت ياعم بيرلسكونى فاهم اكتر من بعض من ابناء هذا الشعب ؟؟؟؟ الذين لايعنيهم سوى لـقمة العيش سواء متعاصة بمهانة او فـقـر او على الأ قـل اموال الشعب بـتـتـسرق عينى عينك وهؤلاء لايهمهم طالما انهم يأكلون ويشربون وكأن فلوس شعب تانى هيا اللى بتـتـسرق اى كما قال فيهم الله تعالى فى كتابه العزيزفى سورة الفـرقـان ( أم تحسب أن اكـثـرهـم يـسمـعـون أو يـعــقـلون ان هم الا كـالأنـعـام بـل هـم أضـل سـبـيـلا ) ورأيت اناسا يـبكون على رحيل مبارك وأخرين نفسهم البلد تولع علشان نعرف قـيمة مبارك (أه والله نفسهم تولع ) وأخرين يعتـقـدون اننا بعد هذا الرجل هنضيع كلنا وحين قلت لأحدهم / سبحان الله لقد مات رسول الله ولم تضيع الأمة الأسلامية فــــ ......رد بسـفــسـطـة يحسد عليها / ده زمن وده زمن تانى ومالـفـرق بين الزمنين ؟؟ دول صحابة رسول الله لكن احنا مش صحابة احنا عندنا أقباط معانا ومتطرفين وأحزاب وكل واحد له نـفس ياخد نصيـب من التورتة وهيولـعوها يابنى أيه الكلام ده ...... هو جدل وخلاص ..... أيه علاقـة تركيـبة الشعب المـصرى بمحاولة تنظيف مصر ووقف نزيف السرقات ثم اكملت كلامى تنكر انهم حرامية طبعا لأ ......كلهم حرامية ولما انت عارف انهم حرامية ساكت عليهم ليه؟؟؟؟؟........ هما بيسرقو بلد تانية ؟؟؟؟........بقى لو حرامى دخل بيتكم يـسرق هـتـقـف تـتـفرج عليه؟؟؟؟ طبعا لأ ولما هو لأ زعلان ليه على مبارك وقال جملة مـقـيتـة / يكفى انه خلاك 30 سنة م بتحاربش طب وهو ده شىء كويس؟؟؟؟؟ انت هتحارب هتحارب ........اسرائيل وامريكا مش هيـسـيـبوك فى حالك ......بس مستـنيـيـن يعزلوك تماما عن باقى الدول العربية وكل شوية بـيـقـربو منك تم تـقـسـيم العراق فعليا الى دولتين (العراق والاكراد ) وتقسيم لبنان عمليا الى دولتين (لبنان / دولة حزب الله )واسرائيل نايمة على جنبك الشرقى والسودان تم تقسيمها الى دولتين والتالتة فى الطريق ..... ولسه وطبعا كل ده وصولا الى مصر بس عن طريق رأس الرجاء الصالح و...رد بــجمـلة عـجيـبـة وهى اكلاشيه تستطيع ان تـقوله حين لاتجد رد على أى شىء فـقـال / اهى الفـلسـفة دى اللى موديانا فى داهية لـقـد فهم بيرلسكونى من وراء البحار قيمتنا وكثيرون هنا من ابناء مصرلايعرفون قيمتنا كشعب ولا كدولة بل اعتادو الخنوع والخضوع مكتفين بملىء بطونهم بغض النظر عما يدور حولهم وبالمناسبة بقى انا قـرأت مقالا على موقع الدستور اليوم يقول ان بنيامين بن اليعازر وزير الصناعة الاسرائيلى السابق بسلامته زعلان على مبارك لانه حبيبه وصاحبه وعيب اللى عمله الشعب المصرى ده فى الراجل وان مبارك كلمه فى التليفون قبل م يمشى من مصر بيشتكى له وبيقول له انه خايف على مصر من الاسلام الراديكالى ( الأصولية / يعنى المتمسكين بتعاليم الدين فى كل صغيرة وكبيرة وهو شىء مش عيب ) ولما بحثت عن مقالات متشابهة وجدت نفس الكلام تقريبا مع أضافة بسيطة وهى ان هذه المكالمة استمرت ربع ساعة وبعد كده زعلانين على مبارك ؟؟؟؟ بيشتكينا لوزير الصناعة الاسرائيلى السابق ووزير الدفاع الاسرائيلى فى عهد شارون والذى وكل اليه مهمة تصفية الانـتـفـاضة بتشتكى لواحد يهودى حارب ضدنا فى 1967 وفى 1973 وتولى مهمة القـضاء على حماس وتقول له انك خايف على مصر من الاسلاميـين طيب ....اشتكينا لملك السعودية....... لولى عهد الكويت .....ولى عهد الأمارات....... للقذافى .....لبو تفـلـيـقة اهم عرب ومسلمين ومننا وعلينا لكن هو ده صاحبك وحبـيـبـك ؟؟؟؟ طب وباقى الربع ساعة ....قلت له فيها ايه ؟؟؟؟؟ أنا عرفت دلوقت ..........مبارك راح فين ؟؟؟؟؟ ومخبـيـين عليـنـا خوفا على الغاء معاهدة السلام .......والدخول فى حالة حرب مع المصريـين .....وخصوصا ان مبارك كـنـز بالنسبة لدولة الصهاينة ......فهـو كان ماسك المطبخ وعارف كل صغيرة وكـبـيرة...... ولازم يعرفو كل حاجة اولا والكارثة ان لسه فى ناس زعلانة عليه وناس نفسها مصر تولع علشان نعرف قيمته (اللى انا شخصيا فاهم انه لم يكن له قيمة الا تنفيض الخزانة المصرية اولا بأول ) وناس نـفـسهم البلد تـقع فى حرب أهلية علشان نعرف قيمته أه والله العظيم دول مصريـين وفيهم جيرانى وفيهم معارفى حماكى الله يامصر رغم انـف الحاقـدين وابنائـك الجاهـلـين اللهم آمين |
رد: مـقـــا لا ت
قلت فى مقالة الأرقام القياسية ان مبارك هو اول رئيس سابق لمصر
وأصحح هذه المعلومة وأقول أن الرئيس محمد نجيب كان اول رئيس سابق لمصر فـقد تم خلعه من الرئاسة من قبل عبد الناصر وعصابته وعاش رئيسا سابقا لمدة 30 سنة بالتمام والكمال حتى توفاه الله فى يوم 28 أغسطس من عام 1984 ومبارك هو الرئيس الثانى الذى يعتبر رئيسا سابقا لمصر |
رد: مـقـــا لا ت
قـيمة مصر كنت قد كتبت مقالا سابقا بنفس الأسم فى موضوع أدب الرحلات ولكن المقال كانت تسيطر عليه الصبغة التاريخية وخصوصا انه لم يكن مقالا بالمعنى المفهوم بل هى مناقشة حدثت بينى وبين أحد المسافرين الخليـجـيـيـن الذين قابلتهم فى احدى سفرياتى وأيضا لان حكم مبارك القمعى قد أوصلنا الى حالة فهمنا معها اننا دولة لاوزن لها ولاقيمة ولكنى بعد حدوث ثورة 25 يناير الماضى فوجئـت كما فوجىء كثيرون غيرى بالقيمة الحقيقية والفعلية لمصر فقد قـفـز سعر برميل البترول من حوالى 82 دولار للبرميل حتى وصل الى 110 دولار ولو بقى حسنى مبارك يومين كمان لكان وصل 120 دولار كما قال احد خبراء الاقتصااديين فى مصر (مش انا طبعا ) يعنى مفروض اخواننا العرب واعضاء منظمة الأوبك يشوفونا بقـرشين ولو ربع اللى كسبته كل دولة من الزيادة فى الاسعار مش احنا......... عندنا الناس تموت هنا واحوالنا تـتـلخبط وهما يشيلو على قلبهم قد كده والغريب انه بمجرد بداية عودة الهدوء للشارع مصرى او بمعنى أدق انكماش فورة الغضب بعض الشىء حتى هبط سعر برميل البترول الى 85 دولار اليوم وبالمثل ارتفع سعر الذهب فى الأسواق العالمية ثم انخفض ثم ارتفع ايه ده...................معقو ل الكلام ده ؟؟؟؟؟؟ بقى احنا ياغلابة أثرنا على سعر الذهب العالمى؟؟؟؟؟ ده 75 % من الشعب لابسين دهب صينى ولايعرفون شىء عن محلات لازوردى مثلا ( اكبر متاجر لبيع الذهب على مستوى العالم ) ثم خافت دولة الكيان الصهيونى وقامت بتشكيل حكومة حفظ السلام وهى فى الحقيقة حكومة حرب طبعا وامريكا بعتت لنا مدمرة من الاسطول الخامس الامريكى على متنها 850 من المارينز والخائن المخلوع سمح لها بالدخول والاستـقـرار داخل الاسماعيلية طيب ليه ياجدعان مكلفين نفسكم وخابطين المشوار ده كله وباعتين مدمرة تنام عندنا فى القناة اتارى ان صادرات أمريكا لاوروبا والشرق الاوسط تمر نسبة 40 % منها من القناة وجايـين بسلامتهم يحافـظو على بقاء الـقناة مـفـتـوحة والا سيـؤدى ذلك الى الاضرار بالاقتصاد الأمريكى مما سيؤثر بالسلب على دخل المواطن الأمريكى ياسلااااااااااام باعتين مدمرة المشوار ده كله علشان تحافظ على عدم الأضرار بدخل المواطن الأمريكى بقى بالذمة احنا دولة عندها كرامة او ذات سيادة فى عهد هذا الرجل اللامبارك؟؟؟؟ الله يرحم أيامك يامبارك كان زمانه قال بوقاحته المعهودة / م يغور المواطن فى ستين داهية دى بلدهم عايزيننى اعمل لهم ايه ؟؟؟ ثم فوجئت ان كل القنوات الاخبارية العربية منها والاجنبية ليس لها حديث الا عن ثورة مصر أيه ياجماعة ماهى تونس عملت ثورة قبل كده بشهر ونص ومفيش حد وقف لهم الوقـفة دى لكن مصر مختـلفـة ورغم ان المصورين والمراسلين والصحفيـيـن عندنا من كل وكالات الأنباء تم ضربهم ومطاردتهم وتحطيم اجهزة التصوير معهم وفى اى دولة لاوزن لها كان ممكن يتم تـقـليل اعداد المراسلين .......لكن فى مصر لأ واذكر شاب مراسل لقناة العربية اسمه احمد بجاتو أكـلوه علقة محترمة فى ميدان مصطفى محمود بالمهندسين واصابوه بارتجاج فى المخ ومع ذلك نام يومين فى المستشفى وقام يجرى زى الحصان على ميدان التحرير .........صحيح ان شكله وارم شوية لكن ماشاء الله صحته جات على العلقة وقناة الحريقة (الجزيرة ) استدعت مراسليها من دول كثيرة لتنشرهم داخل ربوع مصر ثم فجـأة حدث مالم يتـوقعـه الكثيرون فـقـد أدت ثورة مصر الى ثورات اخرى فى اماكن مختلفة مثل اليمن والعراق والجزائروالدعوة الى ثورة فى سوريا على الفيس بوك وتم غلق الموقع هناك ثم اعيد تشغيله بعد مناوشات مع الحكومة وفى السعودية بدأ الكلام على استحياء عن ولى العهد والامارات ايضا سبحان الله لم تؤثر فيهم ثورة تونس بل أثرت فيهم ثورة مصر بل استعاروا نفس االشعار الشعب يريد ....اسقاط النظام وشعار ثورة الغضب أيضا رغم انه كان عندنا جمعة الغضب والغريـبـة ان اللبنانيـين كانت لهم ثورة معنا فى نفس اليوم اوقبلنا بيوم تقريبا وأهملها الجميع وهذا من حسن حظ الرئيس اللبنانى واليوم خطب الرئيس السودانى امام جمع غفير من الجماهير خطبة عصماء تحدث فيها عن مصر وانها هى ترمومتر الامة العربية والعجيب أنى لم أسمع اى تعليق من السيد الرئيس معمر القذافى لا أسكت الله له حسا على الرغم من أنه صال وجال فى اثناء ثورة تونس وتحدث عن بن على وكأنه صلاح الدين الأيوبى مثلا ولكن لانه كان حبيب كوكو( مبارك ) جدااااااااا .....فيـبدو انه زعلان عليه ولكن لم يجروء ان يتحدث عنه ابدا ولم ينطق بكلمة لقد حدث غليان فى الشارع العربى والعالمى بسبب ثورة مصر وحدثت مظاهرات فى المانيا لمجرد سريان اشاعة ان مبارك سيأتى الى المانيا للعلاج والشعب الالمانى مش عايزينه والله وجدت اجانب اعرفهم وتحديدا من رومانيا وانجلترا واستراليا فرحانين لرحيل مبارك .....مش عارف ليه .....؟؟؟؟؟ كان خانقهم فى ايه ؟؟؟؟؟ وتركيا تحدثت عن الوقوف بجانب مصر ولم تتحدث عن اى دولة اخرى وايران أيضا .....صحيح تحدثت بطريقة معووجة لكن حشرت مناخيرها برضه والمانيا اعلنت حالة الطوارىء وذهبت المستشارة الألمانية الى الدولة العبرية واوباما طار النوم من عينه ياولداه ومش عارف يتكلم .....وكل شوية مطلع لنا وزيرة خارجيته تقول رأيها وتنصح مش عارف بأيه ....وتقول معرفش أيه .....وسافرت الى الدولة العبرية واجتمعت بنتنياهو صحيح انها حلوة وبعض اخواننا هنا نفسهم انها تقول بيان كل 5 دقايق علشان يشوفوها ويتفرجو عليها ......لكن حشرت نفسها عندنا مش بمزاجها لكن لاننا دولة كبيرة اوى اوى اوى اوى اوى اوى وشاب من شباب سينا.... تسلم أيديه ........دخل على ماسورة الغاز اللى رايحة اسرائيل ونشن على المحبس الرئيسى نفسه وراح ضارب قـنبلة او غالبا قذيفة آر بى جى ........ لكنه كسر الماسورة اللى رايحة الأردن لكن طبعا تم غلق المحبس على اسرائيل والاردن لان المحبس بتاعهم واحد لاصلاح الماسورة بتاعة الأردن واصيبت دولة الصهاينة بالرعب من انقطاع الغاز عنها لمدة 72 ساعة وشكلو مجلس استثنائى لبحث الأوضاع فى مصر واتخانقو لانهم بيشترو غاز من مصر بس والمفروض يشترو من ناس تانية علشان مصر م تـتحكمش فيهم قال يعنى لقيو بره ارخص و ماشتروش ؟؟؟؟ وواضح طبعا ان اللى ضاربها راجل فاهم وعارف الخط ده رايح فين وجاى منين وطبعا الكلام ده محدش قاله ولكنى خمنته ثم اعلنت سويسرا بعد هروب مبارك عن تجميد أرصدة (محتملة ) له عندها محتملة يعنى أيه......... علشان انا صعيدى ومش فاهم محتملة دى يعنى اى ارصدة يبعتها مبارك هيجمدوها ؟؟؟؟وهم بينبهوه قبل م يجيبها والا ايه ؟؟؟؟؟ حتى نادى برشلونة كان له مباراة أمس وقف قبلها دقيقة حداد على أرواح شهدائنا رغم انه لاناقة لنا ولاجمل فى مباراة الأمس غريـبة طب هما مالهم ومالنا لكــــن اثبـتـت هذه الثورة ان مصر دولة كبيرة جدا جدا جدا جدا جدااااااااااااااااااااااا ااااااااااااااااااا ومجرد حدوث شوية لخبطة فيها عمل بلبلة فى كل الدول وخصوصا الكبار فعلا عظيمة يامصر .......ويارب اللى كانو بيناقشونى فى الموضوع القديم (قيمة مصر ) يكونو اقتنعو رغم انى كتبت لهم بعدها بالعند فيهم مقال اسمه (انا مصرى وأفتخر )وكانو زعلانين لكن هرب مبارك وبقيت مصر واكيد كلهم غيرو رأيهم دلوقت وكل واحد بيفتخر انه مصرى أذن السبب هو مش مصر وانما الطاغية اما اطرف ما رأيت من خلال متابعتى لاخبارهذه الثورة قناة العربية او الجزيرة مش فاكر عملت لقاء مع مصرية عايشة فى استراليا وجايـبـيـنها فرحانة جدا ومبسوطة وانهت حديثها بجملة تهلك من الضحك قالت / الى اللقاء فى الثورة القادمة هههههههههههههههه ياشيخة حرام عليكى ........... هيا الثورات ببلاش دى بيكون ليها ضحايا وخسائر مادية وبشرية وموال طويل والا...هى ثورة وخلاص ؟؟؟؟ اللهم اجعلنا نتنفس هواء الحرية والكرامة ......ولانحتاج ابدا الى ثورات مرة تانية اللهم آمين |
رد: مـقـــا لا ت
عبد الناصر وعصابته :fun_36_6_2[1]:
|
| الساعة الآن 06:40 AM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017