المشاركة الأصلية كتبت بواسطة فادى (المشاركة 350315)

واضح انو السادة الثورجيين مش فاهمين الوضع كويس,
مصر دولة مستهدفة, مصر دولة مستهدفة, زعزعة نظام حكم مستقر فى مصر يترك الفرصة لهؤلاء الخونة و العملاء و الأجانب.
سرقة أقسام الشرطة, و فتح السجون و الهجمات على المتحف المصرى, لو نظرت الى الوضع تجد كل شىء منظم بشكل دقيق,
لا جدال فى ان عناصر مخابراتية لدول اجنبية لها يد و أكثر.
الرئيس مبارك منتخب شرعيا من الشعب المصرى, و لو اعدنا الانتخابات سوف يكتسح بانتخابات نزيهة او غير نزيهة.
شوية العيال اللى فاكرينها لعبة فى ميدان التحرير و موضة جديدة لا يعرفون خطورة ما يفعلونه. انهم لا ينقلبون على الرئيس بل ينقلبون على الشرعية و الدستور و القانون. و يطبقون نموذج الفوضى الخلاقة الأمريكى البغيض.
النظام المصرى كان به عناصر فاسدة و عناصر صالحة, و هذا هو الحال فى اى دولة فقيرة, حيث يرتبط الفساد بالفقر, لكن الاصلاح ممكن دون ثورة, بل ان النظام المصرى كان فى طريقه للاصلاح لولا الاحداث الحالية.
الشباب التوتى فروتى معظمهم مشيو خلاص من ميدان التحرير عشان كنتاكى و ماكدونالدز قفلو هناك هيقعدوا ليه؟!, و الموجودين دلوقتى يا اما فلولهم المحبوسين هناك, و بعض البلطجية و عناصر اجنبية تحضر لانقلاب على الشرعية و القانون.

المشاركة الأصلية كتبت بواسطة sam ram (المشاركة 350080)

اللي حضرتك قرفان منهم دول ناس بتدافع عن حقها ومطالبها
اللي حضرتك قرفان منهم دول بقالهم اسبوع بينسحقوا تحت عصي الامن المركزي و سنج و مطاوي البلطجيه وهجوم بلطجيه بالخيول و الجمال
اللي حضرتك قرفان منهم دول لا بيدورا على مرتب يقبضوه و لا اكل و شرب ولا فلوس يصرفوها
دول بيدورا على حاجه اكبر من كده بكتيييير ...
بيدوروا على كرامتهم وحقهم
اللي حضرتك قرفان منهم دول فيهم ناس اكبر مني ومنك سنا و مقاما
شويه العيال اللي حضرتك قرفان منهم دول فيهم العشرات اللي ماتوا و مئات المصابين ... و لسه مستمرين في جيم المظاهرات الروشه تحت قنابل المولوتوف !!!
الفاضيين اللي حضرتك قرفان منهم دول ... مرابطين مصابين في ميدان التحرير من مقطوع عنهم الاسعافات الاوليه ...

يا ريتك تدور على برنامج منى الشاذلي مع عمار الشريعي ...
او تدور على لقطات حيه للي حصل في ميدان التحرير ...
يمكن .... تفكر تنزل تلعب معاهم .... او على الاقل حتفكر انت بتقول ايه .... و هما بيعملوا ايه
الحقيقه
انا و انت قاعدين بنتسلى على النت ونملا بطننا و نعاني من الملل و الزهق علشان محبوسين في البيت
في الوقت اللي هما فيه قاعدين في الشارع

يبقى مين الفاضي ... مين السلبي ... مين ... الروش !ّ!!!!

المشاركة الأصلية كتبت بواسطة mido-spicy (المشاركة 349998)

اسمحلى اخنلف معاك يا ا/ فادى جمله وتفصيلا
يا ريت يهمدوا بقى قرفنا,
الناس دى ماخلتناش نقرف .. الناس دى خليتنا نرفع راسنا ونفتخر باننا مصريين .. الناس دى خليتنا نحس اننا لسه عايشين وفينا اللى يقول لا للظلم .. لا للطغيان..
حسسونا اننا مش انعام تساق وانما نحن من بنى ادم لنا كرامه
الحال واقف
الحال واقف من يوم ما اتولدنا .. ليه دلوقتى متضايقين ان الحال واقف.. واحنا بناخد حقنا ؟؟ الحال هيبدا بالناس دى انه مايبقاش واقف
الناس مش عارفة تقبض مرتباتها,
ومن امتى كانت مرتباتنا بتكفى اى حاجه .. اقسم لك ان 90 % من الشعب المصرى مرتباته كانت بتخلص من يوم 3 فى الشهر
مفيش اكل و لا شرب مش عارفين نشترى حاجة.
ومن امتى احنا اكلنا وشربنا بكرامه وبشبع .. لقمه العيش كنا دايما بنتزل ونشعر باهانه علشان نحصل عليها من اول اصحاب القطاع الخاص بعد ان انهوا على القطاع العام وامتصاص اصحاب القطاع الخاص لدم الشعب ليلقوا لهم بالفتات مرورا بطوابير العيش والمهازل اللى فيها والمبيدات المسرطنه اللى فى الزراعه وثمن كيلو الطماطم اللى وصل 10 ج نهايه بالفشل الكلوى بسبب الميه اللى بنشربها والمواد السامه اللى بناكلها فى اكلنا
ارحمونا بقى من لعب العيال ده, دول ناس فاضية مورهاش حاجة و فاكرين السياسة و المظاهرات لعبة و روشنة و موضة جديدة و خلاص
هما فعلا هيرحمونا بس من ايد الظلمه والطغاه .. وهما عمرهم ماكانوا عيال لانهم لو كانوا عيال لما كنت سمعت خطاب الرئيس بالتنحى اول امبارح .. ولا عمر الناس اللى واقفه فى وش الرصاص الحى اللى راعبنا كلنا واحنا فى بيوتنا وواقفين فى عز البرد بلا مأوى

انا اسف لمجاهجمة مشاركتك بالطريقه دى .. بس حضرتك لو متابع دلوقتى قناة العربية هتعرف حرقتى فى كلامى دا جايه منين
الناس دى الحكومه هى اللى عملت فيها كده لما شافت دم اخواتها واصحابها واهاليها تهدر على ايد الشرطه

اسف مره تانيه