مصر موتورز مجتمع السيارات - مساعده بعد نص عمره ل مكنه اكسنت 1500 في التليين

اقتباس:

المشاركة الأصلية كتبت بواسطة savant (المشاركة 936411)

الف الف شكر و ربنا يكرمك ان شاء الله .... سؤال بالنسبه للقربه بتاعت المياه .... لو ملتها للاخر .... و العربيه اشتغلت ... بتسقط المياه الزائده فيها

القربة في معظم العربيات الياباني والكوري معمولة علشان تحوش فيها المية اللي بتطلع من الرادياتير لما يسخن... عشان لما يبرد يرجع المية دي تاني والمية ما تنقصش.

اللي بيحصل إنه المية لما بتسخن بتتمدد (زي أي حاجة بتسخن) .. وكمان بيتولد ضغط عالى جوه دايرة التبريد... ولو فضلت المية بالوضع ده ممكن يحصل تسريب من أضعف نقطة في الدايرة.

عشان كده غطاء الرادياتير بيتعمل فيه سوستة تسرب الضغط الزائد (ومعاه شوية بخار ميه) ويتحوش كل ده في القربة.

وبعدين لما العربية تبرد.. ضغط الميه بيقل ويبدأ يشفط من القربة، والمية اللي طلعت ترجع تاني.
http://www.sweethaven02.com/Automotive01/fig0613.gif http://oljeep.com/rad/FSJRadiatorsan...s/image010.jpg

في الحالة دي... المفروض المية ما تنقصش في الرادياتير، إلا إذا كان عندك عيب في غطا الرادياتير أو في تسريب في الدايرة.

عشان كده... تزويد المية من القربة يعتبر مالوش لازمة... لإن عندك غطا مستقل للرادياتير... بس أوعى تنسى إن تزويد المية يبقى والعربية باردة بس.... إنما لو العربية سخنة ... ممكن تزود من القربة... بس المية بردو مش هتدخل إلا لما الموتور يبدأ يبرد.

غطا القربة في العربيات اللي فيها غطا رادياتير مهمته هي مجرد الحفاظ على المية إنها تخرج من القربة أثناء حركة العربية ويقلل من التبخر العادي اللي بيحصل لو سبنا القربة مكشوفة.

إنما في العربيات اللي مافيهاش غطا رادياتير، فغطا القربة مهمته الحفاظ على الضغط داخل دايرة التبريد، ويعتير بديل غطا الرادياتير.

حافظ دايما على المية في القربة بين الـMIN والـMAX... وأي مية زيادة عن الـMAX مالهاش أي لازمة لإن الفراغ اللي فوقيها معمول عشان يستوعب المية اللي بتطلع من الرادياتير، واللي المفروض ترجع الرادياتير تاني بعد ما تبرد.

...