|
رد: الحكم إنتقل والبلد تغيرت وتسير في إتجاه التغيير الشامل والمظاهرات الآن تقود لكارثة
اقتباس:
ثانيا والله انا مانقلتش الخبر دا وموجهة لشباب التحرير ابدا انا جيبة انقد بية الوضع في ايران بطريقة اسمع كلامك اصدقك اشوف امورك استعجب بمعنى انا شوفت قناة العالم لما اذاعت صلاة الجمعه وخطبة الجمعه بالعربية تحس انهم حايبعتو قوات تساند الثوار في التحرير عشان الحرية وعدم القمع بينما هي تقمع مواطنيها كما في الخبر بس هو دا قصدي وبعدين من ناحية حصل تغيير بسبب الثورة ايوة حصل انا حاسس اننا عمرنا ماحنرجع زي الاول يعني خوفك مش في محلة صدقني وبرضة كلامي مش معناة تقليل من الانجاز التاريخي للثوار بس اعتقد اننا يجب نستثمر دا صح عمري ماكنت احلم اني الاقي جرنال الاهرام لسان حال الدولة متغير بالشكل دا ودا مش من اثار الثورة وغيرها كتير حضرتك فاكر موضوع الثغرة بتاعة حرب اكتوبر طبعا مع الفارق بس الفكرة واحدة اية ضيع حلاوة النصر في اكتوبر 73 الثغرة سيبك بقى من اخطاء سياسية او عسكرية ادت ليها بس حصلت انا بقى خايف على ثورة 25 يناير اذا استمرت اطول من كدا تنتهى بشكل نرجع نندم ونقول ياريت كانوا عملو كذا او كذا ياريت تكون فهمتني يا ابو نورا |
رد: الحكم إنتقل والبلد تغيرت وتسير في إتجاه التغيير الشامل والمظاهرات الآن تقود لكارثة
فاهمك والله يا استاذ وليد لانى زى متاكد ان كل مصرى ايا كان رأيه فيهمه مصلحة البلد
بص يا باشا بس علشان برضو الاعلام المصرى بيهول وبيتكلم بشموليه لسه اكثر بلاد العالم رقياً وتحضراً بيحصل فيها مظاهرات واعتصامات والبلد مبتنهارش ولا الامن بيهرب لبنان البلد اللى مخابرات العالم كلها بتلعب بيها فيها استغمايه بيحصل فيها اعتصامات بالشهور وبتبداء ونتنهى بسلام اللى احنا فيه مش بس مظاهره ولا اعتصام ديه ثورة شعبيه حقيقه اوسع من نطاق ميدان التحرير حتى واديك شوفت اللى لسه حاصل فى الخارجة والموضع اللى مازال متوتر فى شمال سينا وده كله بسبب غباء النظام واثار فسادة فى كل مصر حتى لو الناس اللى فى التحرير كلها مشيت الوضع هيفضل محتقن وبلطجيه وكلاب النظام هيفضلو عايشين تحت حمايته خد بالك ان كل الخسائر اللى حصلت لنا لحد دلوقتى لا يسأل عنها الشباب بالعكس كل الخسائر من تصرفات النظام وخططه الهتلريه او العربجيه بتوع الحمير والجمال غير كده باعتراف الكل الثورة كل يوم بتحقق مكاسب |
رد: الحكم إنتقل والبلد تغيرت وتسير في إتجاه التغيير الشامل والمظاهرات الآن تقود لكارثة
طيب انا بس نفسى اسأل كام سؤال ويا ريت لو حد يجاوبنى ويفهمنى عشان التليفزيون الرسمى بوظ دماغى
نفترض اننا مشينا مبارك وكل اللى معاه او حتى ولعنا فيهم بجاز وسخ (مش مهم بلا رموز بلا اكتوبر ستة شهور صبر لا يمكن ابدا ناو يعنى ناو) هل هتتحل مشكلة وجود فوق ما يزيد عن 30 فى الميه من الشعب المصرى امى ؟؟ هل لما نعمل انتخابات مجلش الشعب الجديد الناس هاتنتخب مين بردو اللى معاه فلوس او من العيله حتى لو كان مبيعرفش يفك الخط؟؟؟ طيب هل ممكن بعد 25 يناير منسمعش كلمة المحامين نصابين جشع التجار وكلاء السيارات بينزلوا لينا اسوء حاجه باغلى سعر او او او او او او الشعب المصرى بيهرب من المسئوليه الحقيقية وبييجى على الطرف الضعيف طيب معلش اصل اصولى اساسا فلاح حد عرف الناس بتعمل ايه دلوقت فى الااضى الزراعية؟؟ الناس بتبور الااضى وبتبنى عليها وبشراهة ما هى حاجه تخلى الشريف يبيع مبادئه الفدان الزراعى سعره فى حدود ربع مليون لما يبقى مبانى يبقى سعره بالميت اتنين مليون ونص مين ميستغلش الفرصه حد فكر فى الناس دى من 5 او حتى 10 مليون شاب بيعرفوا يستخدموا النت هيولعوا فى البلد مش كل الشعب مثقف لو الحكومه مقدرتش تمسك نفسها بسرعه مش هنلاقى ناكل و احتمال ندخل فى حروب اهليه منازعة على السلطه ومين يضمن ان فى الصعيد اللى السلاح فيه عادى او سيناء او مطروح انك تقدر تسيطر على الناس وتعمل انتخابات نزيهة ؟؟؟ والله انا ماليش اى مصلحة بس حرام اللى بيحصل فى البلد ده اما بالنسبه للشهداء فأجرهم عند الله بس هاتلى ثوره فى العالم محصلش فيها تضحيات |
رد: الحكم إنتقل والبلد تغيرت وتسير في إتجاه التغيير الشامل والمظاهرات الآن تقود لكارثة
اقتباس:
بل كانت يتم سقيها لإلهاء الشعب بأنفسهم لذلك تطهير البلد من مبارك وعصابته كسليمان وأمثاله هو الحل للحصول على بلد نظيف ثم البدء بعد ذلك في التغيير |
رد: الحكم إنتقل والبلد تغيرت وتسير في إتجاه التغيير الشامل والمظاهرات الآن تقود لكارثة
يا أخى الفاضل
اذا كان الحركة الشبابية مقدمتش نظام بديل او سيناريو ينجنبنا الدخول فى متاهات وانت كمان معترض على عمر سليمان واحزاب المعارضه عاجزة تماما مش بس كده دول كانوا بيرضبوا بعض بالجزم عشان رئاسة حزب فى الاول وفى الاخر ملوش لازمة افتكر الغد والوفد ووووو طيب مين يمسك البلد فى الظروف الصعبة دى؟؟؟ انا مستعد اقتنع واقف مع الناس اللى عايزه مبارك يمشى بس قدمللى البديل الغالبية اللى على الساحة دلوقت اقزام |
رد: الحكم إنتقل والبلد تغيرت وتسير في إتجاه التغيير الشامل والمظاهرات الآن تقود لكارثة
بالظبط زى ماقال استاذ احمد لازم يحصل تغيير علشان تقدر تعمل اصلاح لاننا بقالنا سنين بنطالب بتغيير ولا نجد الا ترقيع وتلصيم بدون معالجة حقيقيه
كل السلبيات اللى موجودة فى المجتمع ديه حقيقيه ومحدش يقدر ينكرها بس الرابط بين كل حاجة فى البلد تجاره وصناعة وزراعة هو النظام اللى خلى الناس فى الريف تبور الارض علشان تعملها شقق بدل ما كانت كل عيله بتعملها بيت كبير والاسر الاكثر حظاُ تبقى سرايا مين اللى عمل ازمات الاسكان ومين اللى عمال يغلى فى اسعار الاراضى والعقارات ويزود عليها ضرايب وبيدى اعوان النظام افضل اراضى بارخص من سعر التراب ؟ قولى مين السبب فى الاساس وانا قولك الحل فى رحيل مين النظام ولا الشعب !!؟؟ |
رد: الحكم إنتقل والبلد تغيرت وتسير في إتجاه التغيير الشامل والمظاهرات الآن تقود لكارثة
يستحيل يكون قصدى رحيل الشعب
بس اقصد المسئوليه مينفعش نختصرها فى شخص واحد المسألة اكبر من كده شوف يا ابو نورا انا عندى ايمان كونته عن دراسة فالموضوع بالنسبة ليا دينى بعض الشئ وهاوضح ( قل اللهم مالك الملك تؤتي الملك من تشاء وتنزع الملك ممن تشاء وتعز من تشاء وتذل من تشاء بيدك الخير إنك على كل شيئ قدير ) صدق الله العظيم .. ( آل عمران 26 ) حديث قدسى انا ملك الملوك، ومالك الملوك، قلوب الملوك بيدي، فإن العباد أطاعوني حولت قلوب ملوكهم عليهم بالرأفة والرحمة، وإن العباد عصوني حولت قلوب ملوكهم عليهم بالسخطة والنقمة، فلا تشغلو انفسكم بسبّ الملوك، وادعو لهم بالصلاح، ......فإن صلاحهم بصلاحكم دى الطريقه اللى بحسب بيها الامور لما الواحد بيحب يبنى هرم بيبدأ من القاعده وسائل الاعلام ورجال الدين ووووووو معملوش اللى عليهم فى مواجهة سلبياتنا الكل بينافق الشعب وبيطلع المشكلة دايما فى الحكومة لان ده طريق سهل للنجاح شوف البرامج الرياضية والصحفيين اللى مع الرايجه وغيره مش قصدى ان الحكومة ملايكة انما اقصد ان مؤمن بما يفرضه عليا الاسلام بأن الله يعامل الناس بواحد من اتنين فضل او عدل لكنه لايظلم ابدا وبما انى مؤمن بان الملك بيد الله فيبقى الله ولى علينا احدنا بما نستحق ربما اكثر لكن مستحيل اقل انا باقول الكلام ده وانا عارف ان اللى مؤمنين بنفس افكارى قليلين وربما الناس تكرهنى ومع ذلك المسئولية وحدها اللى بتفرض عليا انى اقوله عارف انى عكس الاغلبية لكن بصراحه انا متشائم |
| الساعة الآن 11:23 AM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017