رد: ما هى الأعراض التى تحدث للسيارة بسبب تلف المانيفول
 

هو فعلا لما كان بيزود بنزين جامد من الويركان دخان العادم بيطلع بكثافة ولونة أسود و إن الأكصدام مهبب من جنب الشكمان ودى أول مرة أشوف هباب على الأكصدام وبكرة إن شاء الله سوف أعرض علية كلام حضرتك و أنا رجعت من عندة الساعة 8,30 وإتفك وش السلندر وقالى الوش زى الفل أهه قلتة ماشى يا عم بس أنا معرفش إللى جوة زى الفل ولا لأ قالى أنا فكيتة علشان أريحك لأنى شايفك قلقان وبتشك فى وش السلندر رديت علية وقولت ما هو أنت برضة عايز تعرف سبب الكتمة وبرضة خايف على سمعتك وقالى معلش إنهاردة مش ها أشتغل فيها لأن زى ماأنت شايف عندى شغل كتير وتعالى بكرة ومش ها أعمل إى حاجة فيها إلا قدام عنيك قلت لنفسى قصر فى الكلام وبلاش تشد معاه هى مش ناقصة توتر أكتر من كدة وربنا يعمل إللى فيه الخير
عندى سؤال يا بشمهندس سمير
هل من الأفضل أنه ياخد فرغة وش السلندر الجديد ويركب فيها مكونات الوش القديم (عامود الكامة +الصبابات0000 إلخ ) ولا يراجع ويضبط الوش الجديد
وشكرا

رد: ما هى الأعراض التى تحدث للسيارة بسبب تلف المانيفول
 

ياريت يفصص كل حاجه

ويركبلك كمان

عمود الكامه القديم بسبايكه على الوش الجديد

علشان تاخد دوران أسهل لعمود الكامه

لأن ممكن يكون عمود الكامه بتاع الوش الجديد تقيل فعلا فى أول دورانه البطىء من الركنه والتخزين السيىء المعروف بشون الأستيراد

بس أفضل أن صبابات الوش الحالى تكون هى نفس الصبابات الجديده إللى جايه معاه

لأنها بتطبيعة بلادها

ومش حيعرف يعملك روديه صح بصبابات الوش القديم على الوش الجديد

رد: ما هى الأعراض التى تحدث للسيارة بسبب تلف المانيفول
 

شكرا شكرا شكرا يابشمهندس سمير على نصائحك وعلى مساعدتك ووقوفك بجانبى وبجانب جميع أعضاء المنتدى وغدا إن شاء الله سوف أقول لك عما تم وملاحظاتى على السيارة وربنا يسهل علينا الأمور

رد: ما هى الأعراض التى تحدث للسيارة بسبب تلف المانيفول
 

السلام عليكم ورحمة الله وبركاتة
بعد التحية يابشمهندس سميرالحمد لله إستلمت السيارة من عند الميكانيكى يوم الأثنين الساعة 12 مساء والحمد لله مرة ثانية الميكانيكى ضبط الكتمة إللى كانت موجودة فى بداية البنزين وسألتة عن سبب الكتمة إللى كانت موجودة إللى دوختنا لمدة أسبوع ضحك وقالى أهم حاجة إن العربية بقت تمام وكتمة البنزين راحت بلا رجعة وأناحسب تحليلى لموقف الكتمة إن الميكانيكى نضف الفتحات والممرات إلى فى وش السلندر وضبط الصبابات لأنة قالى فى المرة الأخيرة هات جوان وش سلندرو جبتة لة ولما إستلمت العربية قالى أنا مركبتش الجوان الجديد ولما تيجى يوم السبت لازم نركب الجوان الجديد ودة تحليلى لموضوع كتمة البنزين أويمكن يكون عمل حاجة تانية والله أعلم وقالى إطلع وجرب وقولى على أى ملاحظة وملاحظاتى هى السرنسية مضبوط وهادى ومفيش رعشة بس مزود عيار البنزين سنة وسحب العربية أصبح ممتاز ومفيش تسقيف ولا رجرجة ورجعت لة تانى وقلت لة تمام بس العادم لونة أسود وبيطلع بكثافة قالى هو الموتور بياكل زيت شوية وعايزة طقم شنبر قلت لة محنا كنا فتحين بطنها قالى إركب وجرب العربية باقى الأسبوع وهاتها يوم السبت أعملك طقم شنبر ولو ليك إى ملاحظة عليها الفترة دى إبقى قولى عليها
وسؤالى يابشمهندس سمير بخصوص طقم شنبر هل هو جوان وش السلندر ولا حاجة تانية داخل الموتور لأنى سبق وعرفت حضرتك إنى معنديش خبرة فى شغل الموتور0
وأنا أشكرك بشدة على وقوفك بجانبى و وعلى مساعدتك لى وإمدادى بالمعلومات وإبداء الرأى الفنى فى حل مشكلتى مع السيارة وكانت أحد الأسباب التى ساعدت فى إصلاح السيارة وجزاك الله كل خيروبارك فيك وجعل الله كل ماقدمتة لى فى ميزان حسناتك 0000000 وشكرا

رد: ما هى الأعراض التى تحدث للسيارة بسبب تلف المانيفول
 

الحمد لله علي سلامة العربية
المهم ان العربية اتظبطت وانت بقيت مبسوط
انا بشكر المهندس سمير اللي يعتبر فعلاً كنز للمنتدي وشخصية رائعة مبتبخلش بأي معلومة لمساعدة الأخرين
شكراً يا باش مهندس

رد: ما هى الأعراض التى تحدث للسيارة بسبب تلف المانيفول
 

معلش يا أستاذ : محمد

لو قلتلك الميكانيكى ده مش مظبوط

أزاى يركبلك وش سلندر ( المفروض أنه جديد )

على جوان وش قديم

مبدأيا

تابع العادم بعد ماتعمل مشوار محترم على طريق سريع لنفض كل الكربون اللى فى الشكمان وتفويق المكنه

وأذا كان فلتر الهواء عاوز يتغير ....غيره

وجرب عربيتك براحتك

طيب فيه سؤال ليك

أزاى المكنه عاوزه طقم شنبر وأنت بتقول السحب ممتاز .......والكتمه راحت كمان

حقيقى أنا شاكك فى أفعال الميكانيكى ده

فبلاش تتعجل فى سماع كل مقترحاته

وجرب سحب عربيتك براحتك ....وتابع أستهلاك الزيت

وهناك سؤال آخر

هل المكنه كانت بتاكل معاك زيت قبل كده ................؟

لا دا حاجه تانيه خالص

وحقيقى أنا دليلى أحتار مع هذا الميكانيكى

الذى يريد أن يغير طقم شنبر بعد ماكان حالل وش السلندر مرتين قبل كده

أنا مش قادر أفهم

بيعمل كده ليه ..............؟

فياريت تدينى فكره عن نظامه معاك فى مصنعياته

وأخد منك أد أيه إلى الآن ..............؟

رد: ما هى الأعراض التى تحدث للسيارة بسبب تلف المانيفول
 

الله يخليك

يا أستاذ : صلاح

وأنا متشكر لزوقك العالى