|
رد: عيد ميلاد مصر موتورز الثاني الله اكبر علي الجمال :)
د. خالد سعدت جداً بمقابلة سيادتكم فى هذا اللقاء الرائع مع زملاء أعزاء كما سعدت بأرائك التى طرحتها أثناء اللقاء ، كما كانت سعادتى بالغة حين أتتنى مكالمتك التليفونية للإطمئنان على سلامة وصولنا ، وأتمنى أن أراك قريباً فى الإسكندرية
|
رد: صور وفيديو مقابلة مصر موتورز الثانية وعيد ميلاد سعيد
العزيز الباشمهندس سامح ، تعرفت على شخصكم الرائع وأتمنى من الله أن يديم عليك الصحة والسعادة وأن أراك قريباً ، وأشكرك من كل قلبى لأنك عطلت نفسك حتى تقوم بتوصيلنا لبوابة الخروج من هذه المدينة المكتظة بناسها وسياراتها ولولاك لكنا بقينا تائهين حتى الآن فى القاهرة
|
رد: عيد ميلاد مصر موتورز الثاني الله اكبر علي الجمال :)
الأستاذة الفاضلة ميرنا وابنها الجميل مينا ، سعدت بالتعرف اليكما بالرغم من أنه لم يسعدنى الحظ بالحديث معكما تمنياتى لكما بالصحة والسعادة وأن أراكما على خير خاصة وأنكما قريبان من الإسكندرية ( ماعرفش فى أى مدينة ؟ ) وشكراً لتكبدكما مشقة الحضور لهذا المكان النائى
|
رد: صور وفيديو مقابلة مصر موتورز الثانية وعيد ميلاد سعيد
صباح الخييييييييييييير
انا صحيت اخيراً بس مش عارف ليه عايز انام تانى برضو ههههههههههههههه ومن ساعة ما جيت من المقابله وانا متبنج كده لانى كنت مطبق قبليها وقبليها كان بقالى كذا يوم مش بنام كويس ويوميها بعد ما مشينا روحت وصلت حازم وطلعت الدائرى غلط ومخدتش بالى الا وانا داخل على نزلة الاسكندريه الصحراوى ودبيت مشوار لحد 6 اكتوبر علشان الف وارجع تانى وبعدين اطلع الدائرى وروحت حوالى الساعة اتنين بصيت على المنتدى ونمت عامة عايز الحق احط الصور واعلق قبل ما اخش انام تانى :) اولا الصور كلها تقريبا اضافت على الفيس بوك http://www.facebook.com/album.php?ai...1&id=757290723 وممكن تشوفوها كمان عن طريق التول بار اللى ركب جديد فى المنتدى تحت خالص هتلاقى فيه ايكونه عباره عن دائرة زرقه كده ومكتوب عليها facebook photos مش عارف شغاله مع الكل ولا لاء بصراحة انتو مخليتوش في حاجة تتقال زيادة بس انا حابب اشكر كل الناس اللى حضرت وبجد شرفتنا وقدرت مجهودنا فى الاحتفال بيكم ويااااااااااااارب ياااااااااااااااااارب نكون وفقنا ولو بقدر ضئيل فى اننا نعمل حاجة تليق بيكم حضوركم للمقابله اكدلى قد ايه المكان ده مهم بالنسبالى لانه ادانى الفرصه احظى بشرف معرفه واخوه كبار وقدوة بمعنى الكلمة زى م.نبيل عبد الرحمن واستاذ خالد م. سامح رمزى ودكتور فنان زى د.خالد طلب ومهندس عبقرى زى محمد جاد وانسان بشوش طيب خلوق زى بندارى اصحاب جدعان زى احمد فاروق واحمد بدر وشباب زى العسل زى MO وتيفا ولانسر وكوكى واحمد كورسير والمناور ومحمد زكى ومينا اما عن احداث المقابله التفصيليه فديه اعتقد اتحكت كفايه بس انا هحكى على بعض التفاصيل من ناحيتى بدايه اليوم بالنسبالى كانت تليفونات من ناس كتير مابين ناس بتسأل على المكان او تسأل عن الحفله عموماً وامكانيه الحضور ومابين تليفونات لترتيب تفاصيل الحفله يمكن فى حياتى معملتش واستقبلت مكالمات زى اليوم ده بعدها نزلت استلم التورته وموتوسيكل من اياهم كان هيشيلنى وانا بعدى لولا ربنا ستر بس انا كنت بجرى بصراحة وطلعت قدامة فجاءه بس هو برضو مش المفروض يجرى فى اليمين قعدت احاول افهمة كده سابنى ومشى ومهانش عليه يعتذر حتى اخدت التورته وشغلت التكييف على اقصى حاجة وجرى على المقابله والتليفونات شغاله برضو لحد ماوصلت اخيرا ومتأخراً (كالعادة غصب عنى والله) حوالى الساعة 4 طبعا كنت حاسس بنظرات الناس اللى متغاظة من تاخيرى بس الحمد لله الإدارة كانت قائمة بالواجب وزيادة :) نص اليوم عدى بسرعة الصاروخ مابين التعرف على الناس اللى اول مرة اشوفهم ومابين استقبال الحضور وفجاءه يلا بينا نتكلم وفجأه يلا قول كلمة بالنيابه عن مؤسسى الموقع بعد كلمة الادارة وكلمة الاعضاء ..... ياخبر ده انا المفروض اتكلم وانا مش محضر اى حاجة تتقال والمفروض اتكلم فى حدود 5 - 10 دقائق زى ما اتفقنا وده معناه ان الكلام لازم يكون مركز ومختصر وحاجات كتير انا مش مجهزلها خالص وفجاءه لقيت نفسى بتكلم قدام الناس طبعاً شعور مش سهل وصفه رغم ان الواحد طول النهار بيتكلم معاكم على النت لكن الكلام بشكل مباشر ومن غير تحضير وبشكل مختصر مش سهل خالص بس عدت الحمد لله :) بعد ما صدعت الناس بالكلمتين بتوعى بدأت المعركة حامية الوطيس حيث انقسم الجيوش المحاربه لميمنه بقيادتى بالاضافة لبعض الناس مركزتش معاهم بصراحة لانى كنت مركز فى الاكل وفى الميسره كان فيه سومو وخضر واحمد بدر ابرز المحاربين وبعد كر وفر على مائدة البوفيه عادت الدماء للعروق محملة بالجلوكوز وبدأت استمتع بالصحبه والدردشه والتعارف وتبادل الاراء من غير جدول مواعيد ولا ترتيبات ولا اى حاجة للاسف فيه ناس مشيت بدرى وملحقتش اقعد معاهم كفايه بس فعلا استمتعت بكل لحظة بعد كده على اخر اليوم بدات فعاليات افتتاح المول حضرنا الافتتاح واتفرجنا على المول والمنتجات والبضائع والمذيعات :) وبعدين جه معاد البوفيه بتاع الافتتاح اكلنا تانى وكانت القاضيه :) بعدها قعدنا مع شله الشلليه الجهنميه واخر فلول قوات المحاربين القدامى الا ان ابرز الاحداث تمثلت فى المعارك الضاريه بين سومو واحمد كورسير والاتنين بصراحة صعب جداً حد يدخل بينهم وبعدين اتكلمنا شويه فى ترتيبات افطار رمضان الجاى ان شاء الله وبعدين يلا بينا نمشى سلمنا على بعض وكله كان شكله تعبان وعايز ينام والملامح تعلوها البراءه والسكينه الكاملة بس اول ما العربيات دارت وبعدنا عن المول بامتار لقيت الشباب راصين عربياتهم فى شكل يوحى بالاستعداد لسباق بلا رحمة ايه يا حازم (انا بكلم حازم جمبى) هما هيشدو مع بعض ولا ايه حازم : ياعم سيبك بلاش تهور انا : والله عندك حق يا اخى بلا جرى بلا شد بلا كلام فاضى وعديت من جمبهم وعملت عننن عننننننننن ومشيت طلعنا على التسعين قبليهم وقبل ما اوصل لاخرة كانت شايف صواريخ بتعدى من جمبى اشى سيينا واوبل وجولف ونيسان وفيرنا كوكتيل ملوش حل بصراحة قولت ياوادكبر دماغك وحازم انا عارفه حريص وعمال يوعظ فيا وانا عامل نفسى عاقل بردو واول ما طلعنا على الدائرى الشباب ماشاء الله عليهم ربنا يحميهم بجد عفاريت لدرجة ان كل اللى كان بيعدى جمبهم كان بيسخن ويجرى على جريهم هما كمان انا فاكر انى سقط غيار واحد وحرقت شويه نص دقيقه كده وعديت من اتنين او تلاته اخرهم كان تيفا بالصنى وزنقت عليه شويه وانا قدامة علشان ميدعيش وبعدين لقيت غرزة شمال خدتها وطلعت من الزحمة ولقيت نفسى وحدى وكلهم ورايا وهنا ايقنت ان شهاب تلاته مازالت فى ريعان شبابها وان العربيات الاسيويه جامدة اخر حاجة خاصة انى مشوفتش لا السينا ولا الاوبل ولا الجولف بينافسو خالص لكن الحق يتقال mo بالسينا كان باين عليه انه سواق بجد والى هنا دخلت يمين من نزله اخر طريق السويس وانتهى اليوم بالمغامرة السريعة المتهورة ديه بعديها وصلت حازم ولما سيبته توهت على الدائرى زى ما حكيت فى الاول يوم اكيد لا ينسى وصحبه يارب متحرمش منها ابداً والسلام عليكم واقعدو بالعافيه كان معكم من من ساحة الاحتفال بالعيد الثانى ابونورا ابو العافيه - مصر موتورز :) |
رد: صور وفيديو مقابلة مصر موتورز الثانية وعيد ميلاد سعيد
شكلها كانت مقابلة جامدة
و متجمعين علي الخير دايما كده ان شاء الله و كل سنه و مصرموتورز و اعضائة بالف خير و سلامة و لو محمد كمال باشا عرف ان فيها شد في اخر اليوم كان اكيد هيسيب اللي وراه و ييجي يوريكم ال ِAmerican Muscles :) |
رد: صور وفيديو مقابلة مصر موتورز الثانية وعيد ميلاد سعيد
كل سنة ومصر موتورز طيبة وأعضائها كله طيبين وفى صحة وسعادة دائمة يارب، وبصراحة أنا بعد الكلام اللى قرأته عن الحفل الضخم والصور الجميلة حسيت بالندم انى لم احضر الحفل بس عزائى الوحيد هو انى شوفت بعض صور الحفل الجميل اللى طبعا الحقيقة ان الناس اللى كانت موجودة بالصور أحلى بكتيير فى الواقع من الصور ومن الواضح جداً انهم اناس محترمين اجتماعيين، يلا بقى غيرها فى غيرها ويارب الايام كلها تبقى حلوة مع مصر موتورز وأعضائها المحترمين
وكــل سنــة ومصــر موتـــورز طيبـــة |
رد: صور وفيديو مقابلة مصر موتورز الثانية وعيد ميلاد سعيد
والله يا كورسير إنت إنسان ودود ومحترم وصدقني أنا مكنش عارف إنك موجود لأني كنت عايز أتعرف عليك بس أنا بعد ماشفت المجهود الجميا إللي مليان وفاء وإخلاص وموده لأعضاء مصر موتورز وبيقطر ولاء لمصر موتورز عرفت إن حضرتك إللي كنت بتصور يمكن إنشغلك بتوثيق هذا اللقاء الجميل حرمنا من التعرف عليك والحديث معاك بس الجيات أكثر من الريحات إن شاء الله ..... أنا كنت سعيد جدا بهذا اللقاء بس حاسس إن أنا تهت في زحمة الأعضاء .. يمكن عشان متعود علي الموائد المستديرة .... ده حتي لما شرفني الأستاذ حازم بالحديث بالنيابة عن الأعضاء وكنت محضر حجات كثيرة أقولها نسيتها بجد نسيتها فأرتجلت كلمة كده أجمل ما فيها الصدق ... بس أنا حاسس إن اللقاء ده كان لازم الواحد يفضي له نفسه بدون مواعيد لحد الفجر ...واحد جميل زي الأخ العزيز الأستاذ نبيل كان نفسي أتعرف عليه أكتر إنسان دمس الخلق زي الدكتور خالد حاسس إني أعرفه من فتره من بساطة وإجتماعية طبعه وذوقه .... الأستاذه ميرنا والجميل الأستاذ مينا كان حضورهم ومشاركتهم مدي اللقاء بعد عميق وإحساس راقي صحيح متعرفتش عليهم كتير بس الجاي أكثر من اللي فات إن شاء الله والله مش ها أعرف أعدد جمال وروعة هذا اللقاء ... بس والله شكر شكر من عميق قلبي وإقرار بالعرفان بالنيابة عن كل الأعضاء تحية خاصة جدا لأعمدة هذا المنتدي الأستاذ حازم شاهين والأستاذ وائل ( أبو نورا) وسومو والأستاذ سيف ... والله بجد يا وائل أن بحييك تحية موده وصداقة وإحترام لشخصك وفكرك ومجهودك الغزير الرائع وبحي الأستاذ حازم الفكر المستنير واللباقة والإدارة الحكيمة الهادئة ... مرة كمان الف الف شكر علي إتاحة هذه الفرصة لينا لمشاركتكم عيد مصر موتورز ويارب يارب تكون فيه لقاءات طعهمها زي دي علي طول ... وبهذه المناسبة بنادي بتجمع تاني في رحلة ولا خروجه ولا فسحه بسيطه عشان الواحد مشبعش من الأعضاء اللذاذ دول....وبعتب علي الناس إللي مجتش بس بجد فاتكم يوم جميل كان يستحق أن تحاولوا التفرغ من أجله ... شكرا ليك ياواااااااااااااااااااااا ااااااااااااااااااااااائل بصدق
|
| الساعة الآن 04:23 AM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017