مصر موتورز مجتمع السيارات - مشاكل بتقابلك تقدر تحلها بنفسك من غير وجع دماغ الصنايعية

اقتباس:

المشاركة الأصلية كتبت بواسطة corsair (المشاركة 147402)

اولا : الكهرباء
ــــــــــ

لو انت نزلت تدور العربيه ومدرتش ... او حسيت ان فى صوت غريب . على طوول تشوف اول حاجه كبلات البطاريه ممكن يكون فى واحد سايب . هتقولى اعرف ازاى ان احدى كبلات البطاريه مش شغاله كويس .. او بتهرب كهربا .. ؟؟؟؟ اقولك ان اى سلك بيهرب كهربا بيسخن لو ضغطت عليه جامد مش يسخن المهم لو لقيت كبل البطاريه سخن سواء السالب او الموجب يبقى بيهرب بالى حاجه واربطه كويس او اخبط عليه لو مش لاقى اى حاجه .. وان شااء الله تشتغل ... هتقولى برضو انا خبط عليه وبرضو العربيه مش اشتغلت ...؟؟؟ اقولك لو المارش .( المسؤل عن الدوراه) ممكن يكون فيه حاجه معلقه اخبط عليه بس لو مشتغلش ممكن اقول لك على حاجه تدور بيها وانت بره العربيه ... بس خد باالك اهم حاجه تكون العربيه مموره . انت لو تعرف شكل المارش هتلاقى كبل من البطاريه رايح له مباشر .. وهتلاقى معاه سلك رفيع راكب جنب الكابل ... خد سلك ولمس السلك الرفيع دا بالكابل الكهربا ولازم تكون فاتح كونتااك العربيه هدور من بره مدورتش بقا توصيله ... بطاريه تانيه يعنى ... وخد بالك لو وصلت غلط بيبقى فيه مشااكل يعنى لو العربيه انشكشن تبقى بلوه ... انما لو عاده عاادى ممكن تعدى

ـــــــــــــــــــــــــ ـــــــــــــــــــــــــ ـــــــــــــــــ

ثانيا : مشكله سخونه الماتور
ـــــــــــــــــ

الماتور ممكن يسخن لاسباب كتير اهما ممكن تكون مروحه المسؤوله عن التبريد مش شغاله ... او الشكماااان .. واحد يقولى ايه اللى دخل الشكمان فى سخونيه العربيه ...؟؟؟ اقول له ممكن تكون فيه علبه فى الشكمان مسدوده بتسخن العربيه .. واديما يشكو اصحاب العربيات الحديثه من سخونيه الماتور .. وفى الاخر نلاقى علبه الشكمااان مخبوطه تحت ... بسبب ان العربيه صحبها مسقطها المهم يعنى دا موضوع تانى .. تالت حاجه ممكن تسخن العربيه هى التكيهات ... بس دى تبع الميكانيكى .. فى حاجات تانيه ممكن تسخن العربيه ... المهم دلوقتى هوا لو انت ماااشى بالعربيه وفجأه لقيت العربيه سخنت بالنسبه للعربيات الحديثه .. الامبير بتاع الحراره مش بيعدى النص لو عدى النص يبقى المروحه مشتغلتش هتقولى طب انا دلوقتى مساافر وعلى الطريق ولازم اشغلها .. راايح مصيف يا عم الحاااج مش وقت مرووح دلوقتى اقولك على حل انت ممكن تعملو ... بس اهم حاجه وقبل اى حاجه مش تفتح غطاء الريدانير والعربيه سخنه لان دا فعلا خطر جدااا سبها تبرد شويه . ولو الموضوع دا حصل فى عربيه قديمه شويه يعنى من موديل 90 وانت طاالع هتلاقى فى حاجه اسمها ساعه ترومستات .. هى دى اللى بتتحكم فى تشغيل لمروحه يعنى لما العربيه تسخن الساعه دى توصل والمروحه تشتغل لحد ماالعربيه تبرد ... المهم الساعه دى داخل عليها سلكين .. دخلهم فى بعض ... هتقولى برضو دخلتهم فى بعض ومش اشتغلت ... هقولك بسيطه .. شووف الفيوزات اللى فى العربيه عندك هتلاقى الفيوز اكيد ضاارب .. لو مش ضاارب يبقى ممكن تكون المروحه نفسها اللى فيها العيب .. ودى بقا لازم تصلح وفى حاجه مهمه جداا لما العربيه بتسخن المياه اللى فى الريداتير بتخلص او بمعنى اصح بتتبخر .. علشان كده ممكن وااحد يلف حوالين نفسه والمروحه برضو مش تشتغل .. لان لازم يكون فى مياه فى الردياتير .. لان المياه هى اللى بتشغل ساعه الترومسات وعلى

كتير جدا لما الناس بتسافر .. من غير ما تعمل صيانه على الماتور الاول او على الاقل السيور بتاعه التكيف .. البااور والدنامو وكده بيحصل ان ممكن سير منهم ينقطع... ودا اساسى لازم يسخن العربيه لان السير بتاع الدينمو لو انقطع طرمبه الميااه مش بتشتغل .. المهم يعنى ... لو لمبه الدينمو اضأت وانت ماشى .. كده الديمانمو مش شغااال براحه كده توقف العربيه واول حاجه تشوف السير ... لو السير سليم يبقى تمام اوى كمل الكلام دا لو عربيه حديثه ... انام لو عربيه قديمه ولقيت السير سليم ولمبه الديمنو اضأت .. هقولك على طريقه حلوه ممكن تعملها بس لو كتوات الشحن عندك خارجى ... هتقولى ايه يا عم انت كتاوت ايه بس وديمانو ايه انت كده دخلتنى فى شجره هقولك والله بسيطه ... العربيه علشان تشتغل لام تلت حاجات بالنسبه للكهربا .. بطاريه .. مارش .. دينامو .. البطاريه بتشغل المارش .. الديمانو بيشحن البطاريه وفى حاجه اسمها كتاوت شحن دا المنظم بتاع الشحن .. يعنى لما البطاريه تكون مشحونه مش يبعت شحن للبطاريه .. ولما تكون محتاجه يودى لها الشحن المطلوب المهم يعنى فى منه كتاوت داخلى وغالبا قى العربيات اليابانى .. بجميع انواعها وفى منه كتاوت خارجى .. هتلاقى برضو دااخل على الكتاوت سلكين اقفلهم على بعض كده انت لغبت المنظم دا .. لو اللمبه طفت اووكى .. على اول كهربائى يشوف لك الكتاوت دا انما لو مش طفت وكده .... اخبط على الديمانو باى حااجه ممكن تكون فى شربونه معلقه وعلى فكره فى الغالب بيشتغل بالخبط .. سواء بقا حديث قديم

ـــــــــــــــــــــــــ ـــــــــــــــــــــــــ ـــــــــــــــــ

ثالثا : لو العربيه دخنت تعمل ايه
ـــــــــــــــــــــــــ ــــ

دلوقتى لا قدر الله ... بيحصل او ممكن وانت مااشى تشوف واحد عمال يطفى فى عربيته وهى برضو بتولع ... طبعا اسباب ان العربيه تولع او يحصل فيها مااس حاجات كتيير جدا بس الاهم انك لو شفت حد لو انت نفسك شميت وانت مااشى بالعربيه ريحه شياط سلوك وعلى فكره ممكن تحصل فى العربيات الحديثه وخصوصا فى مكان الولاعه ... المهم على طوول تشيل كابل البطاريه ... اى واحد مش مشكله ... لانك لو السبب ماس كهربائى .. لو جبت خرطوم مياه واعدت تطفى ... مش هتنطفى .

تانى حاجه .. دلوقتى اى حاجه فاصله عندك فى العربيه ... زجاج كهربائى الاشارات النور الصغير خالص ... طبعا اول حاجه تشوفها هى الفيوزات ..وكل العربيات الحديثه ,, مرسوم شكل على العلبه بتاعه الفيوزات .. يعنى مثلا لو الاشارات مش شغاله وانت عاوز تشوف الفيوزات .. هتلاقى سهمين .. يعنى انت ممكن تعمل الحاجات دى .. بدل ما تروح الى متخصص ع الفاااضى ..

تالت حاجه فى العربيات الحديثه .. ممكن تلاقى لمض فى تابلوه العربيه اضأت اونت ممكن تكون شلت فيشه من مكانها وركبتها تاانى يعنى حاجه بسيطه ... المهم الاول تعمل حاجه بالظبط اكنك بترستر نظام العربيه وخصوصا الصناعه الالمانى .. واليابانى .. يعنى تفك كابل من البطاريه .. وتفتح كونتاك .. وبعد كده تشيله وتحطه كذا مره وتركبو تاانى ... هترجع كل حاجه تمام وانا مجرب الموضوع دا كتيييييييييير وشغاال تمام

نصيحه ب قا لو انت معاك عربيه حديثه ... وحصلت لك اى مشكله بخصوص الكهربا ... اقدر اقولك ان كل ما العربيه بتزيد فى السعر كل ما نسبه الامان بتزيد فيها يعنى كا حاجه فيها على فيوز ... لو المروحه بتاعه التبريد مش اشتغلت هتلاقى فيوز ... لو الكلاكس عطلان .. برضو فيوز .. دا لو انت مدخلتش بيه فرح وخربته انما مثلا لو لمض او اى اضاءه غالبا ما هتلقيها .. حاجات بسيطه .. يعنى مثلا لو لمبه مش شغاله ... هتلافى لمبه محروقه وياريت لو غيرتها تجيب احسن نوع .. لان الصسنى اونطه اوى وبيتحرق بسرعه ... غالبا اللمض اللى بتنحرق فى العربيات الحديثه هى نور الفرامل ... ليه بقا الله اعلم وبجد نفسى اعرف لان الموضوع دا بجد انتشر

ـــــــــــــــــــــــــ ـــــــــــــــــــــــــ ـــــــــــــــــ

رابعا : لو المفتاح مش راضى يتشغل
ــــــــــــــــــــــــ

سعات كتير اوى .. الواحد يدخل فى امان لله علشان يدور المفتاح مش يلف .. او يدخل المفتاح ومش يطلع .. زيى ما يكون فى واحد جوه الكونتاك ماسك فيه ... هقولك على حل هوا مؤقت لحد ما تصلح المفتاح .. ازاااى تدور العربيه من غير مفتاح وانت جوا العربيه ... لازم طبعا يكون معاه مفك .. ( عده ) تفك الفبره بتاعه الديكسيون اللى بيكون جواها الكونتاك .. وعلى ولو عرفت تفك الكوناك تبقى تمام .. وغالبا بيكون مفتاح 13 .. لو عربيه يابنى .. مش تحاول مش هتعرف تحلو .. هتلاقى فيشه الكونتاك .. فيها اربع سلوك .. دا لو عربيه عاديه ممكن تلاقى فيشتين .. زى ما فى الشاهين مثلا ... المهم لازم برضو يكون معاك سلك بيكون لازم فى واحد كهربا عموميه .. يعنى تمسك سلك وتخلع الفيشه ..وتبدأ بقا باللون الاسود وتلمسو بالسلك اللى لونه احمر .. العربيه هتلف سريع ومش هدور .. لو حصل لحد كده اوكى هتلاقى فيه سلك بنى او ازرق .. لمسو الاول مع الاسمر .. هتلاقى لمض الكونتاك اضائت .. كده انت تمام باى سلك تانى وتلمس السلك الاسمر بالسلك الاحمر ... ودووس بنزيييين فى واحد يقولى ايه دا يا عم انت .. انا هعمل دا كلو ... انا بقول كده بس لو انت فى مكان مش تعرف تجيب فيه حد ... وفى نفس الوقت مش تعرف تدورها من بره

ـــــــــــــــــــــــــ ـــــــــــــــــــــــــ ــــــــــــــــــ

خامسا : مشـــكله الانذار ...وحلها
ـــــــــــــــــــــــــ ــ

طبعا الايام دى كل واحد عندو عربيه بيحاول يركب لها انذار ... يعنى قبل ما اقول المشكله لازم برضو اعرف ازاى بيشتغل السنتر لوك والانذار .... السنتر لوك بيكون من اربع او خمس قطع لو هتركب فى الشنطه ومعاهم كتاوت ... الكتاوت دا بسيييييييييط جدا يعنى بتاخد له كهربا وارضى ... وبس
انما الانذار فيه شويه قلق .. يعنى فى سلك يروح لزرار الباب .. علشان لو حد فتخ الباب يرض سارينه .. وعندك سلك بيروح للكبوت علشااان لو الكبوت فتح يضرب لك ساارينه بصوت تانى ... بحيث وانت اعد جوا البيت تعرف ايه اللى بيسرق بالظبط .... يعنى لو الكابوت هتلاقى تانى يوم البطاريه مش موجوده انما لو جوا العربيه هتلاقى الكاسيت .. او ممكن مش تلاقى العرابيه المهم يعنى .. بيكون فى حساااس معاهم دا لو حد خبط العربيه ... بس المهم بقا ان فيه كتاكوت انا مش عارف فى حد بيركبو ولا لا .. بس انا طالما جااى لى انذاار للتركيب لازم اشغل كل المميزات اللى فيه .. الكتاوت دا مهمته انه يفصل الدواره عن العربيه .. يعنى انت دلوقتى قفلت العربيه والسنتر لووك ... ولو فيه وحده رفع للزجاج ولا حااجه وكلو تمام .. واحد حراامى محترم كده عرف يفتح الباب .. وعمل كل الحوارات بحيث ان السارينه مش تشتغل وعاوز ياخد العربيه .. بكل بساطه مش هيعرف لان الكتاوت دا مش بيشتغل غير بالريموت .. المهم يعنى ... انت دلوقتى دخلت محطه البنزيين .. تغسل العربيه .. واحد يقولى ايه يا عم اللى جاب محطه البنزين جنب الكلام دا كلو ... اقولو بقا ان غسيل العربيه هوا الحاجه الوحديه اللى ممكن تخرب الكتاوت دا .. بعد ما يغسل العربيه يعد يدور ومش عاوزه تدور .. ويجيب ميكانيكى .. ويعمل احلى قلق .. وفى الاخر يطلع الكتاوت معلق ... دلوقتى بقا لو صااادف لك اى مشكله فى الانذار ... هتلاقى فيه فيوزااات ع حسب بقا اللى مركب الاجهزه . اسأله هما فييين .. ولما يعلق معاك ولا حااجه شيل الفيوز وحطه تااانى ... لو مشتغلش شيل فيش الكتاوت وحطها تاااانى ولو فى فبريكه العربيه .. شيل الكابل وحطو تااانى وريح الدمااااااااااااااغ

وع فكره يا شباب اخطر شئ بالنسبه للى يملكون عربيات موديلات عاليه ... غسيل العربيه عن محطه بنزيين ... الراجل فى المحطه بيشجع وقلبو جاااامد .. وهوا مش يعرف ان العربيات كلها دلوقتى بقت بالكهرباا يعنى الكهرباا داخله فى كل حاجه ... فى العربييه .... كتير جدا ينضرب جهااز الانجكشن ... بسبب شويه مياااه ملهوش لزمه ... يعنى من الاخر ممنوع غسيل الماتور نهائيا بالميااه .... للعربيات الانجكشن ودى نصيحه من اخ ليكو شاااف ناااس بتلعن اليوم اللى راحت فيه تغسل العربيه

ـــــــــــــــــــــــــ ـــــــــــــــــــــــــ ـــــــــــــــــ

منقول للافادة لا اكثر

أخى الفاضل لحضرتك خالص التقدير والاحترام والشكر كلامك كله مظبوط الله يبارك لك فى صحتك واسرتك الكريمه \\ أمييييييييييييين \\ ولا تنسى بأن الله سبحانه وتعالى يحاسبنا على العلم هل نشرناه أم كتمناه ؟؟؟ GIFT4U