المشاركة الأصلية كتبت بواسطة AboNoRa (المشاركة 470932)

اميركان باشا ازيك .. اهلاً بيك وبرجالة ال IT كلهم SLAM

انا طبعاً مقدر غضبك واستيائك وليك كل الحق فى ده بس بطلب من حضرتك وباقى الاعضاء ضبط النفس وعدم استخدام الفاظ غير لائقة بساحة حوارية عامة

نيجى بقى لاصل الموضوع

بصراحة وبكل وقاحة انا طول عمرى شايف ان موضوع الحجز والاستلام ده من اكبر مشاكل ومساؤى سوق السيارات فى مصر وبالاخص سوق التوكيلات طبعاً

ليه ؟؟

لان انا شايف ويمكن اكون غلطان ان التوكيلات بتستغل شغفنا بالعربيه وتلم فلوس تشتغل بيها ليس اكثر انما موضوع وفكرة ومبداء الحجز نفسه مفتقد تماماً

المفروض الحجز كمبداء انك بتحجز عربيه بعينها
انت خلاص اعلنت نيتك للشراء الجاد وحددت عربيه وموديل ومواصفات ولون والمفروض يبقى الحجز برقم الشاسية كمان - المهم انت ساعة ما اعلنت نيتك ديه كان على اساس المواصفات والسعر
قيمة مقابل نقود
كل ما يتبقى ان حضرتك تمضى محضر استلام للعربيه بنفس المواصفات اللى حجزت عليها وتدفع باقى المبلغ

لكن اللى بيحصل غير كده خالص
حضرتك بتروح زى الشاطر تديلهم فلوسك وبس
العربيه هتيجى امتى ؟ شكلها ايه ؟ بكام ؟ كل ده حسب التساهيل

طب ده كلام ؟

انا بصراحة ضد مبداء الحجز والاستلام بالكيفيه اللى بتم فى اغلب التوكيلات تماماً

يمكن ناس بتحسبها انها اوفر من انها تشترى من معرض

بس انا شايف انى اروح اطلع فلوسى فى عربيه شايفها قدام عينى اريح بكتير لان فى الواقع ان زى ما استاذنا الفاضل حكى هو فعلياً بيبقى خلاص اهل نفسه ان الفلوس ديه اتركنت للعربيه ومستنى بفارغ الصبر يستلمها

وبالتالى لما التوكيل ميتابعهوش ويتصل بيه بيدايق ولما بيتأخر الاستلام بيدايق اكتر ولو اتغير السعر لازم لازم يدايق ويقول تييييييييييييييييييييييت كمان

فانا ادعو اطراف مجتمع سوق السيارات مستهلكين ووكلاء وبالاخص المسئولين عن خدمة العملاء والمهتمين بمدى رضاء العميل وامتنانه الى مراجعة سياسة الحجز والتسليم بدقة لانها بالشكل ده هتسبب مشاكل وهتخسر الماركة مستهلكين كتير اكتر من القيمة المادية المتحققة من سيولة اموال التحصيل


اعتذر عن الاطالة وتقبلو احترامى جميعاًَ

المشاركة الأصلية كتبت بواسطة AmericaN (المشاركة 470693)

جارى سحب مقدم الحجز

كلمت الراجل وهيمشيلى فى اجرءات سحب المبلغ

بفكر فى ماركه تانيه ! بس ابعدونى عن موديلات هيونداى كلها !

ايه رايكم فى الكيا كارينز ؟

او نيسان صنى ؟

وبالنسبه للميتسوبيشى نزل منها 2012 ؟

المشاركة الأصلية كتبت بواسطة m.elhasafy (المشاركة 471117)

أحلى حاجة حضرتك قولتها ... و حتى لو الشكل ما إتغيرش العربية برضة كويسة جداً ... و فكر تزود شوية و تجيب تويوتا كورولا ... أنا شخصياً من الأساس صعب أدفع مبلغ كبير فى عربية كورى و كمان توكيلها (تيت)!...