رد: الحقوني العربيه بتنتش علي السرعات العاليه...مش عارف اعمل ايه؟
 

للتأكد أن مفيش بوش في أكس البوابة حتمسكه من جسم بكرة واير البنزين لأنها راكبه عليه و تحاول تحركه فوق و تحت أو يمين و شمال المفروض يبقي محكم و ميلوقش لأن البوش حيأثر علي قراية ال tps لان الأكس داخل فيه من الناحية التانية ده غير أن لو مبوش حيخلي البوابة وضعها مش مظبوط علي السلانسيه و الهواء يتسرب بشكل غير منتظم من حوالين القرص و يخلي الكنترول يتجن و يحاول يصحح من خلال صمام الأيدل و نفس المشكلة لو فيه أي تنفيث من جسم الثروتل سواء من جوان أو خرطوم

رد: الحقوني العربيه بتنتش علي السرعات العاليه...مش عارف اعمل ايه؟
 

عموما هوانا لسه جايب العربيه من شهرين وكانت حالتها في صوت الموتور مايعلم بيها الا ربنا وكانت لو مسخنتش تنتش وتلاقيها بتمشي وتقف وتبقي منظرها مسخره وكان في سلكين من اسلاك البوجيهات مشقوقين

فطبعا انا غيرت ببوجيهات الكتروني دلوقتي وجيبت اسلاك جديده تقريبا ب 50 جنيه واعتقد ان الحريق كويس ومعقول وللاسف مش هقدر ارجع للحاجات القديمه اللي كانت في العربيه لانها كانت بالفعل زباله.

انا كان عندي مع التنتيش تفتفه علي السلانسيه وكل ده راح اما غيرت فلتر بنزين ونضفت ال تي بي اس والبوابه وغيرت اسلاك وبوجيهات

بس مشكلتي حاجتين دلوقتي:
1- بحس ان الموتور بينتش مع اقل حرق بنزين كأنه اتكبسله بنزين كتير مره واحده
مش عارف اذا كنتوا هتفهموني ولا لا
( اقصد كانك دخلت بنزين ازيد من اللازم فالموتور بيتخنق في الاول وبعد كده تقوم سرعته زايده فاجأه نظرا لزياده كميه البنزين داخل الغرف وطبعا كل ده بيحصل في لحظات) وتلاقي الموتور نتش فعشان كده شاكك في حساس الاكسجين او حساس تاني لاقيت الاستاذ سمير عياد كاتب عنه بس معرفش هو موجود في الدايو ولا لا اسمه الماب

2- استهلاك البنزين مش عارف حاسس انه قليل قوي 180 كيلو في الصفيحه انا سمعت انها تعمل 250 كيلو علي اقل تقدير وده بيزود شكي في الحساسات.

وشاكر ليك جدا يا بوينتر باشا اهتما حضرتك وعموما انا ممكن اضحي شويه واغير الحاجات اللي كفائتها 50% حتي عشان اشتري دماغي قدام وخصوصا اني لسه شاري العربيه واحب اعمل شغل نضيف وكامل بس اشتري دماغي لفتره

رد: الحقوني العربيه بتنتش علي السرعات العاليه...مش عارف اعمل ايه؟
 

ابوحميد باشا شكرا علي شرحك الممتاز هجرب اللي قولتلي عليه واشوف النتيجه وهرجعلك اقولك لاقيت ايه

بس كان عندي سؤال:
هي الدايو فيها حساس كامه؟

اصل كنت بفكر اجيب تي بي اس وحساس اكسجين وكرنك جداد واركبهم واخلص
فكنت عايز اعرف في حساسات تانيه بتتحكم في جوده الاحتراق ونعومه الموتور ولا لا؟!!

ولوتعرف حاجه عن الاسعار ياريت تفيدني
انا كنت بس سألت قبل كده عن حساس الاكسجين لاقيت ألماني ب 190 جنيه في شارع دمشق

رد: الحقوني العربيه بتنتش علي السرعات العاليه...مش عارف اعمل ايه؟
 

اللانوس مفيهاش حساس كامة بس النوبيرا فيها
و اللانوس فيها map
بس أنصحك بلاش خطوة تغيير الحساسات مرة واحدة
حاول تحقق إتصال مع المالك السابق و أعرف منه تاريخ العربية
و كأجراء وقائي جرب أستخدم منظف دورة وقود و ممكن لاحقا تحتاج تنظيف رشاشات بالألترا سونيك

رد: الحقوني العربيه بتنتش علي السرعات العاليه...مش عارف اعمل ايه؟
 

للاسف موضوع المالك السابق ده كان مقضيها بيومي ولا متابع حاجه في العربيه لاني لغايه دلوقتي صارف علي العربيه 2500 جنيه من تغيير 4 مساعدين وتيل فرامل وبلي امامي وخلفي كامل وطقم سيرفيس وقواعد موتور وتغير زيوت كامله وكان شغل الكهربا في العربيه زي الزفت ده غير الفرش والنابلوه اللي فكتهم وظبطهم بنفسي وعدلت الاضاءه وخليتها حمراء وشويه حاجات كتير حلوه بس اما اخلص بالكامل هعمل بيها موضوع نستفيد منه كلنا بس بردولسه العربيه فيها مشاكل بردو زي موضوع التنتيش واستهلاك البنزين وبحس ان العفشه سايبه او مش عارف ايه اللي بيحصل بس بحس ان درجه تحكمي في العربيه من بعد سرعه 80 زي الزفت
زي ميكون الدركسيون مبوش وطبعا الاكيد اللي بقي قارفني وبيخليني امشي بالعربيه جنب الحيط هو موضوع الفرامل ده لاني فعلا بحس ان العربيه مفيهاش فرامل فعلا وده بيخليني افكر اعمل تعديل امامي في الفرامل زي مشوفت هنا في المنتدي عشان احس بالآمان وانا سايق العربيه.

وبالنسبه لموضوع الرشاشات البيه اللي كانت معاه العربيه مركب فيها رشاشات هيونداي بس العربيه مش بتغيب في الدواره ولا البوجيهات مهببه ولا بتطلع دخنه في الاول فأعتقد ان مشكله استهلاك البنزين مش مشكله رشاشات في الدرجه الاولي

وعموما جاري الفحص طبقا لأرائكم وبحاول اقرا كتير في موضوعات المنتدي المفيده عشان اتعلم عن اللانوس وبالفعل ابتديت اظبط وانفذ حاجات بايدي في العربيه لاني بحب الموضوع ده جدا