مصر موتورز مجتمع السيارات - سؤال بخصوص الفتيس الاوتوماتك ارجو التوضيح

اقتباس:

المشاركة الأصلية كتبت بواسطة نوجا28 (المشاركة 442753)

السلام عليكم لو سمحتم لى سؤال لانى محتارة فيه دلوقتى فى الصورة دى
فيه وضع الd انا بجيب الفتيس على الd فى حالة انى هتحرك طبعا طيب انا شفت صورة مكتوب فيها جنب الd 1,2 ,3 السؤال بقى انا اللى بنقل السرعات دى ولا بجيبها على d وهو ينقل مع نفسه ولو انا اللى بنقل بين السرعات دى ايه بقى الفرق بينه وبين المانيوال انا فاهمة ان الاوتوماتيك انا كل شغلى فيه بنزين وفرامل وبس وعلشان كده حباها ياريت حد يفهمنى النقطة دى قبل ما اشترى بعد اذنكم

ودى الصورة اللى بقصدها هى مفيهاش ارقام فيها سالب وموجب يعنى نفس المعنى

http://img101.herosh.com/2011/05/28/896850984.jpg

ومعلش لى سؤال تانى انا لما اجى ادور العربية ادورها وهى على وضع الn ولا p
انا فاهمة انى بدور على وضع n واسخن وبعدين اجيبها على dوادوس بنزين واطلع ده صح ولا انا فاهمة غلط وميرسى مقدما لكل اللى يضيفلى معلومة

بصى يا ست الكل المعلومات دى حتهمك اوى عند شراء سيارتك
اولا عند بدايه تشغيل المحرك وهو بارد حندوس زر الاوفر درايف فى الفتيس الاوتو فى وضع الاغلاق يعنى حينور فى التابلوه O/V OFF ده اولا يبقى كده اول خطوه لاغينا الاوفر درايف اثناء تسخين المحرك عشان ميستهلكش بنزين خلاص كده والا مش مفهوم؟مفهوم!!!!!!
نيجى بقى لثانيا وركزوا معايا المحرك سخن خلاص وبقى تمام التمام حنعمل ايه بقى حنروح ضاغطين على الزر الموجود فى الفتيس الاوتوماتيك حيطلع لبره والللمبه حتطفى بتاعه التابلوه معنى كده ان الاوفر درايف شغال وده الوضع الطبيعى فى السير على فكره فى الطريق ان الاوفر درايف يكون شغال واللمبه تكون فى التابلوه اوف كده ثانيا خلاص اظن واضح جدا لحد كده
نيجى بقى لثالثا والاهم الفتيس الاوتوماتيك فيه رقم 1 ورقم 2 صح كده؟؟؟ رقم واحد ده فايدته ايه بقى
اولا رقم واحد ده نستعمله لما نكون طالعين مرتفع جبلى يعنى يكون فيه رمل او عند نزول المنحدرات وده اهميته انه بيتحكم فى سرعه دوران المحرك ويحكمه عشان السياره تفضل تحت طوعك وتقدر تتحكم فيها بس المهم بقى وده الاهم ان عند التحويل لرقم واحد ده منزدش عن 50 كيلو متر فى الساعه يعنى المحرك ميزدش عن خمسين بس رابعا
لو حبينا نزيد عن كده يعنى السرعه نزودها عن 50 وبرضه اثناء القياده فى نفس الظروف السابقه يعنى طلوع طريق رملى او نزول منحدرات يبقى ننقل الفتيس للنقله رقم 2 لغايه 95 كيلو متر ساعه منزودش عن كده ابدا طول مالسرعه فى الفتيس معشقه على رقم 2 حلو الكلام؟ يعنى السرعه التانيه فى الفتيس من 51 لغايه 95 حد اقصى اظن لغايه كده مفهوم اوى صح؟
خامسا
انا دلوقت مثلا على الوضع D حبيت اعدى سياره ادامى وعاوز تجميع عالى عشان عربيتى تلم معايا واقدر اعدى السياره اليى امامى او انى طالع مرتفع عالى مثلا ومحتاج عزم شديد وانا على 100 كيلو مثلا حعمل ايه بقى حروح دايس دواسه البنزين للاخر خالص فى الدواسه ودى بقى اسمها العلمى كيك داون حيحصل ايه بقى ساعتها!!!!حيروح الفتيس نازل على السرعه 3 مثلا لوحده لو فرض مثلا ان المائه كيلو اليى كنت ماشى عليهم كانت السرعه الرابعه حيروح الفتيس محول اوتوماتيك للسرعه الاقل على طول يعنى دى بتتحسب على حسب سرعه السياره اليى انا كنت ماشى عليها لو كنت على الرابع مثلا الفتيس حيقل نقله عشان يدينى عزم لحد كده حلو؟
نيجى بقى لسادسا
اى سياره مانوال بيكون العادى بتاعها 4 سرعات اماميه وواحده خلفيه عدا السيارات الحديثه بيكون عدد سرعات المانوال 5 غير المارشدير طبعا فايده الغيار الخامس ده يا جماعه الخير انه بيريح الماتور وبيخفض استهلاك البنزين طبعا وده بيكون فى الطرق المفتوحه ____اما فى السيارات الحديثه الاوتوماتيك بيكون عدد الغيارات فيها 4 +مارشدير وطبعا الغيار الرابع فى الاوتوماتيك بيريح السياره جدا ويخفض استهلاك الوقود لان الموتور ساعتها بيكون مرتاح حلو لحد كده!!!!!!
نيجى بقى لسابعا
انا دلوئت ماشى على سرعه 110 كيلو مثلا وحعتبرها السرعه الرابعه فى الفتيس الاوتوماتيك مثلا وماسك شمالى وادامى سياره وجنبى سياره وفيه مسافه بينهم حبيت اعدى بين العربيتين دول ومحتاج عزم عشان اقتنص الفرصه دى واهرب منهم حعمل ايه بقى!!!
حروح دايس على الزر بتاع الاوفر درايف عشان اقفله من الفتيس ساعتها حتنور اللمبه فى التابلوه تفيد انى قفلت الاوفر درايف o/v off حيحصل ايه بعد كده بقى ؟ حينزل الغيار من السرعه الرابعه للتالته وحيدينى عزم كبير جدا للسياره يعنى بالعربى حتجمع معايا سرعه اكبر عشان اقدر اعدى بين السيارتين دول بعد ميجمع معايا الموتور بقى واقدر اعدى بين السيارتين حروح ضاغط تانى على الزر الموجود فى الفتيس حيطفى فى التابلوه طبعا وحيشتغل الاوفر درايف وحيقدر يدخل على السرعه القصوى للفتيس اليى هى الرابعه حروح دايس بنزين حتلائى السياره طارت بأقصى سرعه وابقى قابلنى لو حد بقى من العربيتين دول عرف يحصلك لانك ساعتها حتكون طيرت بالسياره لانه حتكون خدت سرعتها خلاص على الطريق
الخلاصه يا جماعه الخير الاوفر درايف بيكون شغال معانا على طول يعنى سيبه مفتوح لانه بيوصل بالسياره لاقصى سرعه فيها ولما بيكون شغال اللمبه فى التابلوه بتكون مطفيه طبعا حالتين بس حنطفيه فيهم من الاخر وساعتها اللمبه فى التابلوه حتكون منوره تفيد انه مش شغال
الحاله الاولى عند تسخين السياره وخصوصا لو الجو بارد بعد متسخن حنشغل الاوفر درايف ونمشى بالسياره
الحاله التانيه بقى لو زادت سرعتنا عن 110 والكلام ده فى الصنى اوتوماتيك عشان يبقى كلامى واضح وحبينا نسقط نقله عشان نقدر ندى السياره عزم عشان تقدر تهرب من عربيتين مثلا او لزياده العزم عشان الموتور يجمع بسرعه فى توقيت اقل وبعد كده نشغل الاوفر درايف تانى عشان نقدر نوصل للنقله الرابعه والاخيره فى السياره الاوتوماتيك الصنى ومازلت بقول الصنى
اليى هى توازى النقله الخامسه فى الفتيس المانوال برضه فى الصنى
اظن كده مفيش حد حيقدر يقول مفهمتش ولو حد قال مفهمتش معنديش كلام تانى اقوله غير انه يبيع السياره ويجيب سياره بدون اوفر درايف ويريح نفسه ويريحنى ههههههههه ودمتم بخير
ملحوظه اخيره خلى الاوفر درايف شغال على طول يعنى تكون اللمبه فى التابلوه مطفيه نطفيه بس فى الحالتين اليى قولنا عليهم غير كده لا حتلائى استهلاك البنزين ممتاز والسياره فى منتهى الراحه والامان ان شاء الله واخيرا فايده الاوفر درايف لما بيكون شغال ومش منور فى التابلوه انه بيديلك الغيار الاخير فى السياره يعنى الاوتوماتيك بيديلك الغيار الرابع لكن لو منور فى التابلوه يبقى ملغى وبكده السياره بيكون اخرها الغيار التالت بس يعنى الرابع بيكون ملغى وده طبعا بيكتف السياره عشان كده انصح بتشغيل الاوفر درايف وفى الحاله دى بيكون اللمبه مطفيه فى التابلوه لو ماشيه فى طريق مستقيم بقى ودى الخلاصه خليكى على dعلى طول وريحى نفسك من الصداع وطبعا لما تحبى ترجعى للخلف خليكى على r ولما تقفى فى اشاره يأما تخليكى على n لو كانت السياره تقف فى طريق مستقيم اما لو واقفه على مطلع مثلا يفضل شد فرامل اليد وتخليكى على وضع p بس لازم تشدى فرامل اليد لان التحميل فى الحاله دى كله بيكون على الفتيس وده غلط اصلا لازم يكون مع فرامل اليد ودمتم بخير