مصر موتورز مجتمع السيارات - انا من شباب التحرير

هأكمل معاكوا اللي حصل بعد ماسيبت ميدان التحرير وانا مروح

قلت اعدي علي مبني الحزب الواطي وانا مروح لقيت عمليات نهب منظم بدأت تحصل
ولقيت اول عربية مطافي بتحاول تدخل وكانت عربية واحده بس وجت بعد ساعتين او اكتر من حريق الحزب وكان السواق شجاع جدا بس كان خايف يدخل وحد يتعرضله ولكنه توكل علي الله ودخل

وصلت لغاية التلفزيون ولقيت الحرب شغالة هناك
قوات الشرطة العسكرية الجيش يعني واقفة في نص الشارع وسايبه قوات الشرطة جوا التلفزيون شغالة قنابل ورصاص وغيره علي الشباب
وعلي بعد خطوات لقيت مدرعة للحرس الجمهوري واقفه قدام وزارة الخارجية ومحدش من الشباب راح عند الوزارة دي رحت انا وسلمت علي قائد المجموعة وكان عقيد وخذني بالحضن وقالي هو ايه اللي بيحصل في التحرير قالي بيقولو في اللاسلكي المتحف بيتنهب والضرب اللي هناك علشان المتحف
قلتله مافيش ولاشرطة ولاجيش قدام المتحف والضرب كله عند مجلس الشعب والداخلية
وجتله اشارة واستسمحني بكل ذوق وانصرف

وعلي مرمي البصر كان في مجموعات نهب منظمة سمعت ان كان بيقودها الشرطة شغالة نهب وسرقه في اركاديا والنايل سيتي بعد ما شربوا خمره من كازينو الشجرة كما قيل لي ساعتها
وكانوا بيحولوا المسروقات بعربيات نقل وكارو وموتسيكلات فعلا مجموعات منظمة ومتخصصة في السرقة ومحدش عارف يوقفهم وكان ردهم علي اي حد انه محدش له دعوه ده حقنا

وبعدين ربنا كرمني بعربية وصلتني لاقرب مكان للبيت وروحت
وكان ده اهم يوم في حياتي واعتقد انه اهم يوم في عمرالثورة

وكان احساسي في نهاية اليوم ان النظام انتهي واننا خلصنا عليه
لغاية ماطلع الريس المخلوع بطلعته البهيه واكدلي انه لسه فيه الروح

ان شاء الله احكيلكوا علي معركة السيطره علي وزارة الداخلية
وعلي الطيران الحربي اف 16

وانتظروا اصعب واطول ايام الثورة الاربعاء الدامي

ربنا يتقبل هذه الاوقات ويجعلها في ميزان حسناتنا