مصر موتورز مجتمع السيارات - العربيه اتسرقت عز الضهر بالمنصورة

الحمد لله العربيه رجعت
اللي حصل كالتالي :النهارده 29 ديسمبر حوالي 3 عصرا لقيت اتصال من المباحث بيقول اننا لقينا عربيتك مركونه في عزبة الشال (حي من احياء المنصورة بس هو اسمه كده) بجوار حي الاستاد اللي حصلت فيه السرقة و فيه المخبر واقف جنبها و عايز المفتاح التاني علشان يدورها و تاخدوها ... طبعا مش قادر اوصفلكم الفرحة كانت قد ايه... و جريت انا و الحاج علي المكان اللي ضابط المباحث قاللي عليه و الحمد لله لقيت العربيه و اصحاب المحلات اللي حوالين العربية قالوا لنا انها كانت هنا من تلات اربع ايام مركونه فشكينا في امرها و بلغنا القسم و جم بتوع المباحث و شافوها و طلبونا في التليفون .... و اخدنا العربية و رحنا بيها علي قسم ثان المنصورة و اتعمل محضر تسليم للعربية و الحمد لله استلمناها بعد الاكراميات و الحلاوة و الذي منه طبعا و الف حمد و شكر انها جت علي قد كده .. و طبعا الحرامي قلب العربيه غطا و كوريك و شوية ملابس جاهزة كانو في العربية وقت السرقة ز الف حمد و شكر لك يا رب ان العربية نفسها موجوده ... و الف شكر لكل الاعضاء الافاضل اعضاء مصر موتورز عل المشاركة و الردود و ربنا ما يوريها لحد بجد موقف صعب صعب صعب ربنا ما يحكم بيه علي حد و ياريت كل واحد يخلي باله و يحط عينيه في وسط راسه زي ما بيقولوا حفظنا الله جميعا من شر السرقة و السلام عليكم و رحمة الله و بركاته