مصر موتورز مجتمع السيارات - حد خوفنى من اللوجان وقال كلام انا مش فاهماه انها كلها كمبيوتر وبتخسر جامد فى اعادة بيعها

اخوانى الاعزاء

دخلت الموضوع ده لاستعيد ذكرياتى مع لوجانتى الجميلة لانى بعتها من شهر بسبب ازمة مالية

احب احكى قصة عن تجربتى مع لوجان قد تكون طويلة لكن سوف احاول تغطية بعض الانتقادات والسلبيات التى وجهت الى اللوجان، من خلال عرض تجربتى فى تسعة شهور

وسوف اشير الى بعض السلبيات التى شكها منها بعض الاعضاء وتحتها تجربتى، وقبلها سوف اضع بعض القواعد عند التقييم على السيارة قبل البدء

*** سوف تجدون هذا الموضوع فى صفحات اخرى فى المنتدى

****أننى لست خبير فى السيارات لكنى كان عندى لانوس لفترة واشتريت اللوجان زيرو

***أن السيارة سعرها من 68 الف الى 72 الف يعنى اى حد عايز يقارنها يقارنها بسيارات فى الفئة السعرية بتعاعتها يبقى معانا تقريبا (لانوس- فيرنا- اسبرنزا m11- ساجا- اسبرنزا 516- افيو مانيوال اول فئة وهكذا ......

*** العربية لما تلين من الزيرو فترة تليين اللوجان فى الكتالوج 3000 كم والسرعات لاتزيد عن 90 كم ويفضل 70 كم /الساعة فى تلك الفترة، ومدد السواقة يفضل ان تكون داخل البلد علشان تستخدم كل حاجة غى السيارة يعنى جميع الغيارات والدورانات بالدريكسون والمارشدير وهكذا

*** أن السيارة الى حد ما حديثة الانتشار فى السوق المصرى

*** أن اسم رينو اسم له دلالة فى السوق العالمى حتى لو مقترن بسيارة ب 72 الف جنيه

وهذه بعض ارائى فى السيارة

يشكو البعض من ارتفاع صوت الموتور

أرى: معظم السيارات الاوروبية تمتاز بهذه الصفة

يشكو البعض عضة فى الفتيس

بالفعل حدث مع البعض ذلك وخاصة فى الغيار الاول والمارشدير والسبب فى ذلك ان دبرياج اللوجان لازم تتغط عليه فى الاخر علشان ياخذ معاك بالاضافة اننا مجرد ما بنطلع بالعربية بندى الغيار التانى وبذلك الغيار الاول لا يستخدم كثيرا واللى كان عندهم المشكلة دى قالولى انها انتهت بعد فترة كل واحد بيدى سبب لانتهاؤه لكن اعتقد انها فترة التليين (3000كم)

يشكو البعض من نشفان العفشة

بصراحة دى حاجة غريبة قد لا اكون مبالغ ان قلت ان عفشة اللوجان انعم من الكيا سيراتو وانا ركبت الاتنين داخل المدينة فى المطبات والحوارى فى الفيوم لو حد من حضراتكم من الفيوم وينصح بالنيتروجين لتعبة الاطارات مع نعومة العفشة هتحس بفرق كبير لكن ادى لنفسك فرصة علشان تقارن العفشة بعربية (فى نفس سعرها) امشى فى شارع واركب عربية تانية فى نفس الشارع ولو بالسيراتو والله هتحس بالفرق

يشكك البعض فى ثبات العربية

انا عن نفسى فى اول سفرية على طريق اسيوط جبت بيها 165 كم والله ما حسيت باى حاجة رغم انى فى مرة كنت مسافر وكان عدادى 120 عربية فيرنا عدتنى ركزت معاها لقيت بتعوم قدامى

يشكو البعض من التكييف

ودى حاجة غريبة جدا التكييف انا كنت بشغله من شهر 5 الى شهر 9 ولا مرة دورت العربية الا لما شغلته حتى وانا واقف فى الاشارات لدرجة انى كنت فى شهر رمضان بنزل اشغل التكييف وهى واقفة فبل المغرب من شدة الحر، بالاضافة ان فيه واحد صاحبى لوجاناوى كان بشكو من حاجة بسيطة فقالى بالهزار يعنى هو انا اشتريت تكييف ب 69الف( سعر العربية وقتها) لشدة البرودة فى التكييف.

يشكك البعض صاج العربية

برضه غريبة جدا لان سماكة الصاج فى العربية دى اقوى من الافيو نفسها وتصدقوا اقوى من الاكسنت والاكسنت آر بى وغيرهم ودى معلومة اخذتها من تقارير اجنبية مش فاكرها دلوقتى لما كنت بقارن بين النيو اكسنت والافيو واللوجان
وعن تجربتى انا خبطنى اكصدام حديد بتاع ربع نقل والله يا دوب ريح مكان لمسة العربية فى حين ان خبطة شبيها فى الافيو لواحد اعرفه دخلتله الباب كله جوه العربية ومعاها اجزاء من الرفرف

يشكو البعض من ارتفاع الار بى ام وارتفاع صوت الموتور

اعتقد ده سببه ان صاحب العربية ما ادهاش فرصة كافة للتليين وبيقرص على البنزين من غير ما يدى الغيار المناسب

يشكو البعض من الوكيل

انا مستغرب انصح بالفروع الرئيسية الفرع اللى قدام القلعة كنت بروحه ... بصراحة احترام غير عادى ورد على كافة الاستفسارات وضيافة للعملاء وبلاش تروح المراكز المعتمدة ياريت الفرع الرئيسى

فى النهاية اقدر اقول بعض المزايا فى العربية دى

السعر تنافسى جدا
اتساع رهيب فى الشنطة
الكنبة اللى ورا بتشيل معايا بجد اربعة رفيعيييييين او ثلاثة تخااااااااااااااان جدا ومسافة كافية جدا لفرد الرجلين
وضعية الكرسى مريحة جدا للظهر وخاصة الكنبة اللى ورا
صاج فى العربية قوى
ثبات غير عادى على السرعات حتى 165 كم
جنوط 15 ودى ميزة قوية تساعد على الثبات
شكل مقبول وغير تقليدى
علامة تجارية مرموقة عالميا
عوامل امان عالية (مرايات كبيرة- 5 حزام امان- ايرباج- قفل ابواب للاطفال_ .. ...)

اسوء حاجة فى العربية هو سعر اعادة البيع انا بعت العربية ب 55الف كانت عاملة 15 الف كم بس كان فيها تاثير حادث رهيب لكن ان شاء الله بعد انتشارها هتمسك سعرها

فى النهاية
انا والله نفسى اشترى العربية دى تانى لكن هستنى لشهر 6 لما تنزل تعديلا العربية لانى سمعت ان مفاتيح الزجاج هتبقى فى الابواب والكلكس هيبقى الطارة ومعاه بعض ازرار التحكم
والله دى عربية هايلة فى سعرها المتاح

وأسفعلى الاطالة