مصر موتورز مجتمع السيارات - مخطط تصفيه الثوره ,,

أغبى شخص ممكن تقابله في الوجود.. هو اللي شاف فيلم سينمائي جديد 6 مرات.. و بعدين قرر يشوفه مرة سابعة.. و معتقد إن نهايته ممكن تتغير.. أو يتفرج علي فيلم الفك المفترس 6 مرات مثلا و يشوفه مرة سابعة.. و كله أمل إن سمكة القرش متاكلش حد المرة دي.....!
أخيرا طلعت علينا قائدة و أيقونة الثورة اليمنية "توكل كرمان" من فيلتها المكيفة في أسطنبول بتويتة، تبكي فيها علي حال اليمن...
الغريب إن اليمن من الدول اللي نجحت فيها الثورة.. إتشال الحاكم الشرير.. و اتعمل انتخابات و جه حاكم جديد بمباركة الثوار.. و اتحيدت القوات المسلحة اليمنية.. و كل دا بمباركة "توكل" و أنصارها من الثوار في العالم العربي.. بس يبدو إن السادة أنصار الربيع العربي لازم يركبهم شخص ما، باعتبارهم نوع من أنواع الدواب اللي بتستخدم للانتقال.. فمرة يقولك "الإخوان ركبوا".. "الحوثيون ركبوا".. "داعش ركبوا"..
المهم إنك لو نبهته و أنقذته من الدور اللي بيلعبه كبعير بيتركب.. يعمل عليك بني آدم مفكر عميق.. و يبدأ في الكلام الخزعبلي اللي مالوش آخر.. من أول "الثورة الفرنسية نجحت" و مرورا بـ"لازم نهدم الجيش عشان نبنيه علي نضافة".. و انتهاء بإنه يروح يتركب مرة أخرى في سعادة.. و يرجع يقولك "ركبوني"...
فين تاني الثورة نجحت؟ في ليبيا.. قالوالنا "في مصر الرئيس السابق لسه موجود و دا بوظ الثورة و ثورة مضادة و الخ الخ"..
حاضر... في ليبيا بقى إتلم مجموعة ثوار طيبين علي الرئيس السابق و بعدين ذبحوه و هم بيهتفوا "سلميه".. و بعدها حطوا جثته في معرض بمباركة السفير الأمريكي عشان الناس تتفرج على رمز العهد السابق اللي انتهي... و حكمت الثورة ليبيا.. و من فرط الديموقراطية بقى فيها 4 حكومات و برلمانين و كل الجهات دي بتطلع قرارات عكس بعض.. و اللي عايز حاجة بيعملها.. اللي بيتفسح بدبابة.. واللي راكن تحت بيته راجمة صواريخ.. و لو فيهم حد قرا الكتاب اللي كان مع المرحوم "محمود شكوكو" في فيلم "عنتر و لبلب" بتاع "كيف تهبط الطائرة".. ماحرمش نفسه من اقتناء مقاتلة .. و في سوريا السادة الثوار اللطفاء اللي هم في الواقع البغال الإرهابية اللي اسمهم "الجيش الحر" سيطروا على جرابلس و الرقة و مرقدة و الحسكة و نص سوريا أكتر من 3 سنين.. أهي نص الدولة السورية حكمت فيها الثورة و سيطرت عليها...
كل حلب الشرقية و احيائها، منها بستان الشام و مساكن هنانو.. محور اعزاز و ريف أدلب بالكامل... حد شاف مدرسة اتبنت في الحتت دي؟؟ مستوصف طبي؟؟ كشك سجاير طيب؟ حد شافها بقت سويسرا؟؟؟
بما انهم كانوا مسيطرين على مصانع و حقول النفط والغاز.. حد شاف طريق بيترصف أسفلت..؟ حد شاف البترول بيتباع و المناطق دي و سكانها بيستفيدوا منه؟ فككوا مصانع البترول و باعوها لتركيا.. و باعوا النفط نفسه ببخس الثمن.. و المواطن اللي في نطاق سيطرتهم مش لاقي الرغيف..شفت "عدالة إجتماعية"؟ شفناهم حاطين ستات في أقفاص.. بيدبحوا أطفال.. بيقتلوا شيوخ.. بيقتلوا علماء.. بيهربوا آثار.. إلخ...
و البهوات المركوبين عندنا في مصر مسميينهم "ثوار" و "معارضة" و "مقاومة".. هي دي بقى ثوراتكم و أهدافها؟
تونس.. اللي قاسمت الحكم مع الإخوان.. و الإرهاب بيضربها في بن قردان و بتتفجر فيها الفنادق و انخفضت السياحة للحدود الدنيا و الاحتياطي انحدر لمستويات غير مسبوقة و بتتمشي علي حافة الإفلاس؟
دا مش حايحصل عندنا... تتنطط.. تقف على دماغك.. تمشي علي الميه.. تقولي ثورة و غلابة.. مش حانسمح بدا يحصل..