|
|
رد: أدب الرحلات
مش عارف انام والافكار حاضرة والذكريات دى زى الابداع الفكرى لما بيحضر الألهام الكاتب بيستمر
ونقول كمان ولازلنا فى القطارات العادية وفى يوم راكب من دمياط ومتفهمش ايه اللى خلانى اركب القطار من هناك لانه بيتاخر جدا وبياخد ساعة ونص للمنـصورة ويقف ربع ساعة يغير اتجاه الجرار وساعة لطنطا وربع ساعة يغير اتجاه الجراروساعة للقاهرة وباجمالى 4 ساعات تقريبا هو تقريبا وانا رايح اركب الميكروباس سمعت صوته حنيت وجريت ركبت تلقائى بدون تفكير (م انا قلت قبل كده انها عشرة والعشرة متهونش) المهم وصلنا المنـصورة بسلام وهناك ركب واحد معاه ييجى 5000 نسخة مثلا او اكتر من سلاح التلميذ لما تفكر فيها تستعجب ازاى ده اساسا دخل بيهم محطة المنـصورة وعلى القطار م غير اتجاه الجرار يادوب كان خلص دخولهم جوه القطار وماشاء الله ربع العربية من ورا لحد السقف مليااااااان المهم الكمسارى راح له / عايزين مشال ل دول (نولون عفش) 50 جنيه بس اى خدمة ياعم صاحبهم بلهجة دقهلاوى / ياعم انى (انا ) راكب القطر دوة(ده)علشان اوفر اوجرة (اجرة ) عربية تقوم تقول 50 جنيه هيمسكو ف بعض فانا قلت اخلصهم من بعض / خلاص ياعم سيد الراجل من حقه برضه والراجل كأنه وقع من فوق برج الجزيرة ولقانى مستنيه وقال بعد م اخد نفس عميق / قل له يابيه والكمسارى اندهش/ حقه ازاى قلت له / هو ليه 25 كيلو يركب بيهم و دول مش هيكملوهم فبص لى وغمز لى وقال / ماشى علشان خاطرك نمشيها وبص له وقال / انت نازل فين المحلة ياباشا المهم بعد المحلة جالى عم سيدوقال / بقى ياضلالى دول ميكملوش 25 كيلو فقلت /اه طبعا ازاى (باستغراب) قلت دول حوالى 525 كيلو مش 25 كيلو وضحكنا |
اقتباس:
بتصب على الحكومة اقتباس:
شكرا ياخلود على المعلومات متابع معاك |
رد: أدب الرحلات
ومكملين
فى يوم راكب القطار المكيف الفرنساوى بتاع الساعة 11 وربع صباحا من القاهرة على اسكندرية المهم القطار اتاخر حوالى ساعتين وفى 3 عربيات تكييفهم بايظ وبعد جهد جهيد( والله جهد جهيد ترجمتها المبالغة فى بذل الجهد ) م اتصلحوش وبعد جهد اخر جهيد برضه رئيس القطار وافق يكتب تقرير فقط عن التكييف مش التأخير ونظرا لان الزباين مش فاهمة الفرق فراحو شباك التذاكر صرفو فرق التكييف وكان فى ضرب وخناق وشتيمة لان اللى دافع 20 جنيه فوجىء انه بياخد جنيه ونص واللى دافع 30 فوجىء انه بياخد 3 ونص ولقيت عم ابراهيم رئيس القطار جنبى اول م شافنى كانه شاف ملك الموت قال بقول لك ايه اعمل معروف متتكلمش احسن تودينى ف داهية انا غلبان وانت فاهم قوانين السكة الحديد وان كان على تذكرتك هدفعهالك من جيبى وانا ضحكت بتدينى رشوة ياعم ابراهيم؟؟؟ استغفر الله عيب يابيه دى ملاليم كلها ماشى ياعم مش عايزين منك حاجة وانا هسكت خالص بس تعزمنا على شاى بالليل انت هترجع امتى هرجع فى 930 (8 وربع بالليل من اسكندرية) ماشى ياعم ابراهيم وغمزت له ومشيت وبالليل اتقابلنا وبعد م خلص شغل جينا بعد طنطا القطار فضى وجالى ها هتشرب الشاى والا حاجة تانية ياراجل انا كنت بهزر انت صدقت اصل احنا غلابة وانت حقانى واحنا هنتفرم فى النص عارف وعلشان كده سكتت وضحكنا ووصلنا بالسلامة طبعا انتو مش فاهمين انا سكتت عن ايه وايه اللى خلانى سكتت كتيييييييييير وبنسبة99.9% من ركاب السكة الحديد ميسمعوش عن حاجة اسمها التأخير الكلى والتأخير الكلى ده معناه / ان القطار لو اتاخر ساعة عن موعد وصوله لاى محطة يعتبر متأخر تأخير كلى ويسترد الراكب قيمة التذكرة بالكامل بدون اى خصومات والقطار هنا متأخر ساعتين طب انا سكتت ليه لان رئيس القطار لو كتب تقرير بتأخير القطار تأخير كلى وسلمه للركاب ممكن يتنقل فيها او يمشى من السكة الحديد خالص و ده قرار غير مكتوب وانا عارفه وبيسموه اساءة التعامل مع مهام وظيفته ولذلك مبيكتبش تقرير فى التكييف بسهولة الا بعد مشاكل مع الركاب لانه بياخد فى تقرير التكييف جزاء ادارى الا لو ثبت تعدى الركاب عليه والقرارين دول غير مكتوبين لكن كل الكمسارية ورؤساء القطار ات عارفينهم وبيخافو منهم وهم اصلا مظاليم ومهضومين مثل باقى اصحاب الوظائف الصغيرة فى السكة الحديد ولذلك لما شافنى نازل من القطار اترجانى اسكت علشان اصلا الركاب زعلانين من فرق التكييف طب الركاب زعلانين ليه لان الراكب دافع 20 جنيه فاهم انه هيروح ياخد 20 لكن الحسبة مش كده الحسبة كالأتى 10 جنيه اجرة توصيل بالقطار العادى( الناس وصلوك برضه صحيح وصلت مسلوق لكن وصلت /استهبال والله ) 3 جنيه خدمات (خدمات ايه مش عارف / المقصود الحمام الشبه نضيف(مش نضيف اوى )والبوفيه والهبل ده ) 7 جنيه فرق تكييف طيب الراكب بياخدهم جنيه ونص ليه مش 7 وسمعت اعجب اجابة للسؤال ده يقول لك يابيه اصل احنا لما بناخد غير لما بندى بقى ده كلام ؟؟؟؟؟؟؟والا دى دولة بتحترم آدمية الناس؟؟؟؟؟؟ تخصمو 80% من قيمة فرق التكييف ؟؟ وصراف التذاكر قاعد على الشباك تديله التذكرة (ولانه عارف اللى هيحصل) يرميلك الجنيه ونص بوقاحة ولما تعترض او حتى تفكر تسأل ليه جنيه ونص وانت ددافع 20 جنيه يروح بنفس الوقاحة رامى لك التذكرة ف وشك وياخد الجنيه ونص ويقول لك روح اشتكى الله يرحمك ياعم منصور فاكرينه؟؟؟ صراف التذاكر المكيفة ف طنطا |
رد: أدب الرحلات
ولايزال قطار الذكريات مستأنفا مسيره
وعمك مصطفى ده راجل لايعتبر نفسه سائق قطار وانما قائد طيارة ومسمى نفسه الكابتن مصطفى الطيار وبسبب سرعاته العالية يشتغل شهر ويوقفوه عن العمل شهرين وهكذا ومرة بقول له ياعم مصطفى ليه كده قال / يابنى انا طيار مش سواق قطار واستطرد قائلا ( مش هشرحها عيب اوى يعنى لما اشرحها ) ايه الفرق بينى وبين قائد الطيارة الطيارة بكام فقلت حوالى 200 مليون دولار قال والقطار ؟؟ قلت الجرار 20 مليون جنيه و14 عربية فى مليون ب14 مليون و5 مكيف فى 2 مليون ب10 مليون والاجمالى 44 مليون جنيه قال/ يعنى بفــلوس كتير برضه صحيح مش محصل تمن طيارة لكنه غالى تمام يااخويا على راى توفيق الدقن فى فيلم السوق تمام الطيارة بتشيل كام واحد بالكتير 300 انا هنا بشيل شوية الاف يبقى انا زى الطيار واحسن منه لان الارواح اللى معايا اكتر كلامه منطقى لكن ده يخليك تجرى ياعم مصطفى رد رد عجيب قال الناس بتبقى راجعة من اشغالها بتدور على البيت فين وعايزين يوصلو بدرى تعبانين وهلكانين وانا بجرى علشان اوصلهم بدرى وانا الوحيد اللى معنديش نسبة تاخير هنبقى احنا والسفر والشغل عليهم؟؟؟؟ تمام ياخويا مش تمام ياعم مصطفى لان السرعات دى بتحددها السكة الحديد بناء على حسابات السكة نفسها المهم بعد المناقشة دى باسبوع راجع من المنـــصــورة للقاهرة ومدخل بنها عبارة عن دائرة غير مكتملة وبالتالى جميع القطارات بتهدى السرعة عندها وبينزلو السرعة من 120 الى 60 كيلو فى الساعة لكن لقيت القطار داخل يجرى على الملف قلت أأأأأأأأه ه ه ه ه عم مصطفى هو اللى سايق استر يارب ومفيش ثوانى لقيت القطار اتهز هزة جاااااامدة جدا وانا طرت فوق فى الهوا ونزلت على الركاب اللى جنبى وناس و قعت فوقى والشنط وكل حاجة اتدهولت وفقت بسرعة وببص لقيت القطار واقف على حيله زى ماهو وحمدت ربنا انه متقلبش وقف القطار 5 دقايق وبعدين مشى ووصلنا مصر وجريت اشوف مين سايق لقيته عم مصطفى حييته وقلت له حرام عليك كنت هتقلبنا ف بنها مش هتبطل بقى فضحك وقال حمدا لله على السلامة وديل القط عمره م يتعدل فضحكت وقلت هو القط برضه ياعم مصطفى فقال مشيها القط وخليك مؤدب هههههههههههههه وضحكنا وسبته ومشيت كفاية كده دلوقت مع ان الافكار حاضرة كتير لكن انا عايز انام اشوفكم و بكرة ان شاء الله م بقينا بكرة خلاص ههههههه |
رد: أدب الرحلات
اقتباس:
|
| الساعة الآن 06:56 PM. |
|
Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017