رد: يا جماعه اشغل الاوفر درايف ولا اسيبه مش شغال ارجو الرد للاهميه
 

فيه ملحوظه تانيه مهمه يا جماعه الخير بخصوص النيسان صنى الاوتوماتيك والمانوال اليى هى ايه بقى اننا منحاولش بأى حال من الاحوال تجاوز سرعه 170 كيلو فى الامبير الخاص بالسرعات فى الفتيس الاوتوماتيك و175 كيلو فى الفتيس المانوال وده على حسب تعليمات صانعى السياره طبعا فيه ناس حيقول انا كنت بجيب بسيارتى سرعه 200 او 210 وفيه ناس حيقول انا كنت مقفل الامبير 220 كل ده كلام حلو اوى بس احب اعرف الاخوه الافاضل اليى بيعدوا السرعه المحدده فى المانوال الخاص بمصنعى السياره ان لكل سياره لها سرعه قصوى للعمل بشكل طبيعى غير كده لو زودت ده بيكون خطر جدا على الموتور وبتحتاج تعمله عمره بعد فتره اقل بكتير من فتره استخدامه الطبيعيه تحت الظروف المحدده للسرعه القصوى للمحرك 170 اوتو او 175 للمانوال لو زودت عن السرعه المذكوره يبقى انت بتسارع من عمليه عمل عمره للموتور فى فتره وجيزه اما لو التزمت بالسرعه المحدده كحد اقصى للسير يبقى انت كده بتطول فتره اعاده العمره للموتور لاطول فتره ممكنه وبتحافظ عليه وفيه نقطه اهم بقى بكتير من كل ده وده وناس كتير جدا متعرفهاش اليى هيا ايه بقى ان كافر السياره نيسان صنى مكتوب عليه ايه بقى 15r/65/185طبعا محدش عارف حرف r ده معناه ايه اليى بعد كلمه 15 ولو حد عرف معناها وتجاوز سرعه 170 كيلو بالسياره يبقى بيعرض نفسه لخطر جسيم ان احتمال كبير جدا الكافر يضرب على سرعه ازيد من 170 كيلو متر لان مصطلح r ده على الكافر الخاص بالسياره معناه انا اقصى سرعه سيادتك ممكن تمشى عليها حتكون 170 كيلو متر فى الساعه غير كده لا قدر الله ممكن الكافر يضرب منك على طول وخصوصا لو الجو صيف وحراره الاسفلت عاليه عشان كده بنبه الاخوه الافاضل اليى بيحبوا يطيروا بالسياره ان كمان غير ان الموتور سوف يضر بالسرعه التى تفوق 170 فى الاوتوماتيك فى نيسان صنى وكذلك 175 فى المانوال ان كمان الكافر بتاعهم لا قدر الله ممكن يضرب وبمنتهى السهوله ايضا فى حال تجاوز السرعه 170 كيلو -اللهم بلغت اللهم فأشهد كذلك للعنايه بالموتور اطول فتره ممكنه يجب تغيير الزيوت فى مواعيدها الاساسيه كل 1000كيلو او كل 10000 كيلو حسب نوع الزيت المستخدم كذلك ويكون 2.5لتر بدون تغيير فلتر زيت اما لو حبيت تغير فلترالزيت يبقى الكميه المطلوبه 2.80 لتر يعنى اقل من 3 لتر والزيت الخاص بالجيربوكس الاوتوماتيك 4 لتر يتم غياره على 40000 الف كيلو حد اقصى للمحافظه على الجيربوكس الاوتوماتيك من التلف ولو بقى حبيت تشيل الجيربوكس كله من مكانه وتشيل كل الزيت اليى عليه فى الحاله دى حتحط 8 لتر مش 4 لانك ساعتها حتفرغ محتويات زيت الجيربوكس الاوتوماتيك بالكامل ودمتم بخير وسعاده وكل عام وانتم جميعا بخير وسلام وسلامى الخاص جدا للاخوه البوسعايده والاستاذ حسام البورسعيدى بما انى اسكندرانى اصيل واحب بور سعيد وناس بور سعيد كلهم تحيه خاصه جدا ليهم ولجميع اهل بلدى الكرام مصر ام الدنيا الجميله الطيبه بناسها الطيبين الوحشين لا وخصوصا اليى بيندسوا فى المظاهرات بين الناس تحت شعار الاعتصام للتخريب واتلاف ممتلكات البلد والغير ايضا دول ملهومش سلام منيى خالص او حتى كلام هههههه

رد: يا جماعه اشغل الاوفر درايف ولا اسيبه مش شغال ارجو الرد للاهميه
 

على فكره يا استاذ احمد على انا كمان سيارتى لسه شاريها فى 14-12-2012 نيسان اوتوماتيك ex صالون 2012 وربنا يبارك لك فيها ويباركلى فيها يا رب ويبارك لكل اعضاء نيسان صنى فى سيارتهم وعلى فكره نيسان سياره محترمه جدا جدا ولا داعى للقلق بشأن اراء البعض لان فى الاول والاخر لا يخلو على وجه الارض شيىء بدون عيوب فالكمال لله وحده وبخصوص اى سياره احتمال يكون فيها عيوب تصنيع ده امر وارد جدا وطبيعى جدا وهى فى الاول والاخر مسأله حظوظ وعلى فكره كمان فيه ملحوظه هامه جدا لاحظتها بكل اسف ان معظم الناس اليى بتشتكى من السياره ويحاول انه يشوه مظهرها امام الآخرين ده بيكون فلول هههههههه اى انه وكيل لشركات اخرى او موظف يعمل فى شركه سيارات اخرى ويحاول جاهدا انه يشوه مظهر السياره بشتى الطرق وفيه ناس تانيه بيكون فعلا سوء الحظ له جانب كبير فى سيارتهم وفيه ناس تانيه بيكون سوء الاستخدام ايضا هههههههه ومع الاسف هو مبيكونش عارف ان العيب فيه مش فى السياره عشان كده دع الامور تسير على جانب الله سبحانه وتعالى وان شاء الله تستمتع بسيارتك العريقه المحترمه جدا جدا نيسان صنى لانها بالفعل سياره تستحق الاشاده بها بكل فخر واعتزاز وربنا يبارك لنا فيها وفى اعضاء نيسان صنى المحترمين ولكل شخص فى سيارته يارب العالمين

رد: يا جماعه اشغل الاوفر درايف ولا اسيبه مش شغال ارجو الرد للاهميه
 

ده رد على نفس السؤال انا كنت جاوبته قبل كدة واعيده هنا للفائدة
-----------------------------------------------------
بالنسبة للفتيس الاوتوماتيك (اللى مهواش CVT)

الأوفر درايف over drive كلمة دارجة فى البلاد المتكلمة بالإنجليزية وتعنى اعلى نقلة فى صندوق سرعات السيارة
يعنى فى اى عربية مانيوال الأوفردرايف هو النقلة الخامسة، يعنى لما بيجيب على الخامس يبقى انا كدة بجيب الأوفردرايف

وفى العربيات الأوتوماتيك بنظام التروس الكوكبية (يعنى النظام المعتاد بتاع الأوتوماتيك مش الستيبترونيك ولا ال cvt ) الأوفردرايف هو النقلة الرابعة

وبالتالى فإن خاصية التحكم فى الأوفردرايف فى العربيات المزودة بهذة الخاصية( سواء عن طريق زرار فى العصاية او حارة فى مسار العصاية) تعنى ببساطة السماح للجير بوكس بأن يستخدم الغيار الرابع او منعه من ذلك، وعادة تصمم السيارة بحيث ان لمبة الأوفردرايف فى التابلوه تضيى عندما تكون خاصية الأوفر درايف مطفية، يعنى معنى ان اللمبة منورة فى التابلوه هو ان الفتيس غير مسموح له يجيب الرابع وبينقل بين الأول والتانى والتالت فقط، ولذلك لو دققت فى اللمبة هتلاقى مكتوب عليها O/D off، يعنى اللمبة بتقول ان الأوفر درايف مطفى

وخاصية الغاء الأوفر درايف مفيدة للقيادة التنافسية على سرعات متوسطة(تحت ال100 كيلومتر فى الساعة) لأانها بتمنع الفتيس من انه يروح على الرابع(المقابل للخامس فى العربيات المانيوال) وبالتالى بتفضل العربية على RPM عالية تمكنها من الإستجابة اللحظية للتسارع، لكن طبعا على حساب استهلاك الوقود وبشكل ما على حساب عمر المحرك على المدى الطويل جدا

الكيك داون هو ببساطة ان الفتيس بياخد غيار تنازلى مع كبس البنزين بشدة علشان يعلى ال RPM ويحسن استجابة السيارة للتسارع

طيب إيه فرق الكيك داون من الاوفر داريف:

الفرق فى المثال البسيط الآتى: لو الجير الاوتوماتيك بتاعك جايب الرابع (الغيارت دى داخل الجير نفسه ومافيش حاجة قدامك تقول الجير بتاعك على انهى غيار غير تعودك على عربيتك ومعرفتك انهى RPM تقابل انهى سرعة على انهى غيار، يعنى مثلا انت بتكون عارف انك لو ماشى 80 والrpm 3000 يبقى الجير على التالت لكن لو انت ماشى 80 والrPM 2000 يبقى كدة الفتيس جايب رابع)، المهم، لو الجير الأوتوماتيك بتاعك جايب رابع وانت رحت دايس زرار الاوفر درايف ، الفتيس هينزل على التالت(هتلاحظها من النتشة وصوت الموتور وعداد ال RPM هينط لفوق) ، وهيفضل على التالث وعمره ماهو رايح للرابع مهام سرعتك عليت لحد ما تدوس زرار الأوفر درايف تانى، لو انت قبل ما تدوس زرار الاوفر درايف كنت على التالى او التانى او الأول فلما تدوس زرار الأوفر درايف مش هيعمل اى حاجة ومش هتحس بأى تأثير له، لكن لما سرعتك تعلى العربية مش هتنقل للرابع وتفضل شغالة اول وتانى وتالت بس لحد ما تدوس الأوفردرايف تانى واللمبة بتاعته تطفى

اما لو انت ماشى رابع ورحت عامل كيك داون الجير هينزل للتالت ، وشوية مع التسارع هيرجع للرابع تانى
ولو انت ماشى تالت وعملت كيك دوان الجير هينزل للتانى وشوية مع التسارع هيطلع للتالت ولو فضلت كابس عليه هيروح للرابع تانى

بالنسبة للفتسي CVT

الفتيس ال CVT يختلف عن الفتيس الاوتوماتيك العادى بشكل كلى وجزئى حيث انه يعتمد على منظومة تسمى continuous variable transmission وهى تعتمد-بدلا من التروس- على منظومة من اسطوانتين مخروطيتين احداهما متصلة بالتغذية من المحرك والأخرى متصلة الكورونا والعجلات وبينهما سير يتم تحريكه للأمام والخلف بواسطه مجموعة هيدروليكية وعن طريق تحريك السير يتم تغيير نسبة التخفيض،
ويقوم التحكم فى الفتيس ال CVT على المحافظة على ال RPM للمحرك فى حدود افضل اداء وتغيير سرعات السيارة عن طريق تحريك السير على الجيربوكس
وهكذا يكون لدينا اختيارين لمدى RPM للمحرك

مدى افضل كفاءة(اقل استهلاك للوقود والمحرك) ومدى افضل اداء(افضل تسارع واستجابة)

ويتم الإختيار بين هذين الإختيارين باستخدام عصا الفتيس التى نختار بواستطها البرنامج الإلكتروميكانيكى المرغوب سواء كان برنامج افضل كفاءة او افضل اداء

فالوضع D (اختصار drive) هو الوضع العادى الذى يعمل على حفظ المحرك فى مدى افضل توفير

والوضع DS (اختصار drive sprot) هو الوضع الرياضى الذى يعمل على حفظ المحرك على مدى RPM عالى يحقق افضل استجابة وتسارع

ببسطة، لو انك سايق relaxed خليها على D

ولو سايق ومتوقع تجرى وتشد وترجع تفرمل وتشد تانى وهكذا (راكبك عفريت الأسفلت يعنى) خليها على Ds بس اول ما العفريت ينصرف ارجع لل D تانى

فى السفر وعلى الطرق السريعة خليك على ال D وليس DS علشان الRPM متعلاش بدون داعى( فى اللانسر على ال DS وصل عداد ال RPM الى اكثر من 6000 على 140 كم/ساعة ، لكن مع D بيكون اقل من4000 )
ولا ينصح بالتغيير من D الى DS على سرعات اكثر من 80 (ممكن تزود على الDS زى ما انت عايز لكن متغيرش من D الى DS لو سرعة العربية اكثر من 80)<!-- google_ad_section_end -->

الكلام منقول للأمانة من م/سبعاوى

رد: يا جماعه اشغل الاوفر درايف ولا اسيبه مش شغال ارجو الرد للاهميه
 

ما شاء الله عقدتونى فى الاتوماتك

رد: يا جماعه اشغل الاوفر درايف ولا اسيبه مش شغال ارجو الرد للاهميه
 

للاسف حضرتك فاهم الكتالوج غلط لانه معرب كترجمة حرفية

رد: يا جماعه اشغل الاوفر درايف ولا اسيبه مش شغال ارجو الرد للاهميه
 

تشغيل الاوفر درايف يكون وقت الحاجة اليه وليس شغال على طول او يترك شغال ولانصيحه بعد شرح الكتالوج .
وربنا يكفيك شرها ويديك خيرها.
ROSE4U