|
رد: اغيثونا يا ولاد البندر فى جوان وش السلندر
اليوم الثانى : شراء قطع الغيار
حكيتلكم فى اليوم الاول اننا بعد الفك طلعت بقائمة القطع المشتبه فيها وكانت طربمة المية مشترك مية ( عبارة عن مشترك حرف تى من خامة بلاستيك او فايبر من ناحية فيه طبة والناحية التانية فتحتين مواسير مية واخيراً الجوان طبعاً وهنا نرجع لعمو الميكانيكى اللى قال ان الوش سليم ووافقنى انه مش محتاج خراطة بس قالى لازم نركب الجوان الجرينجريد مش الصاج بالاضافة لل 3 حاجات دول سالته على حالة السيور والدنيا واذا كان فيه حاجة محتاجة تتغير فقالى لاء كله تمام ممكن تجيب بس طقم بوجيهات جديد لكن غير كدة كله تمام ده بالاضافة للبنود ديه زيت جديد للتغيير فلتر زيت جديد فلتر هواء وانبوبة سليكون stp وعلبة wd 40 شوية الحاجات ديه دخلت فى الف جنية ومحدش يقولى ليه علشان ده كدة اقل واجب مثلا طربمة المية اخدت فيها اسعار 450 لحد 250 وده كله بالنسبة للقطع الاصلية اليابانى الجديدة مبتكلمش عن استيراد او صينى او تايوانى ولا الكلام ده خالص ليه الفرق ده فى الاسعار على حسب المصدر لو من الموزع المعتمد او الوكيل سعر من برة الوكيل والموزع المعتمد سعر تانى طيب بسيطة يبقى نجيب كل حاجة من برة الوكيل والموزع المعتمد كان غيرك اشطر لان مش كل القطع موجودة بره وخاصة القطع الهايفة (فى حالتى كانت مشترك المية) فيه قطع مش هتلاقيها غير عند الموزع والحركة الواطية والزبالة فى الموضوع ان الموزع ميرضاش يطلعها لوحدها ولازم يطلعهالك فى شروة قطع غيار بالاسعار السياحية بتاعته وبراحة راحته ومفيش فصال باختصار بعد خناقات وتهديدات وحوارات اكتر من ساعة عرفت اطلع بالمشترك ده من الموزع لوحدة وبسعر 285 جنية فى حته مشترك مية فيبر لو لقيته فى الشارع هتشوطة برجلك الخلاصة ضيعت يجى 4 - 5 ساعات فى الشارع والفصال والمواصلات وصرفت الف جنية قطع غيار وطلعت على الورشة وعمو الميكانيكى رجع يشتغل بعد ما ضيعتلو انا نص اليوم نص اليوم التانى المفروض كدة ان كله تمام وقطع الغيار كلها عندة وتخيلت واهما انى ممكن استلم على اخر اليوم بليل ان شاء الله واحدة ولا اتنين لكن عمو الميكانيكى كان عندة مفاجئة وهى انه تعب جداً وكان لازم يروح كدة دخلنا فى اليوم التالت المشكلة كمان انه فاجئنى برضو بانه مش هيعرف يقفل لوحدة ومحتاج خراط معاه ليه يا عم قالك علشان يظبط التاكيهات مال الخراط بالتاكيهات قالك هو سلو بلدنا كدة بنظبط التاكيهات عند الخراط فقولتلو طيب يبقى انت مبتعرفش تظبط تاكيهات وعايز توديها عند حد يظبطها لاء جيبه هنا يظبطها انا مش هودى المكنة فى حتة وخلصنا على كدة انه هيبقى فيه كمان ظبط تاكيهات |
رد: اغيثونا يا ولاد البندر فى جوان وش السلندر
خناقة المصنعيات والحساب
اخر حاجة كنت اتوقعها فى الموضوع ده هو ان الحساب يبقى فيه مشاكل وكمان يبقى خناقة ومحل اختلاف !! وكان لى اسبابى اولاً صاحب الورشة صاحبنا ووعدنى نلم الدنيا لدرجة انه تفضل مشكوراً وقالى مش عايز حساب الورشة ... بس حاسب الصنايعى !!؟ ثانياً بالمستوى والامكانيات اللى شوفتها من الميكانيكى المفروض انا اللى اخد منه فلوش مش اديلو ثالثاً انا سالت صديقى صاحب الورشة عن رينج الاسعار برضو وبعد الحاح شديد قالى ان نفس الميكانيكى ده بيتحاسب فى الشغلانة اللى زى ديه فى عربيه زى ديه ب 500 جنية يعنى على الموضوع المفروض يتراوح من 300 جنية ل 500 جنية فاخدت معايا 300 جنية وقولت يا ياخدهم وبس يا يبقى ليه حساب يكمل بعد العيد استلام العربية 1- العربيه كانت رايحة متسخة (جداً) روحت اخودها متسخة (جداً جداً جداً ) وده طبعاً لانها اتركنت فى الشارع 3 ايام وصديقى العزيز مهانش عليه يبيبتها جوة الورشة 2- حوض العربيه وتحديداً ارضية المصفح بتاع الموتور زى الطين غرقانة بقى مزيج من التراب والزيت والجاز وكل حاجة فى الدنيا وديه بالمناسبة اكبر مصيبة علشان لو فيه تسريب اى حاجة مستحيل كدة تعرف 3- العربيه دايرة وكلة تمام بس الزيت والمية عليهم لسه اثار الطيحنة طب ليه يا عم الحج منظفتش قالك معلش بس امشى شوية بالزيت ده وارجع سقطة وحط زيت !! 4- مستلمتش اى قطع غيار قديمة وكان اتفاقنا ان كل حاجة تتساب فى العربيه بس روحت ملقيتش حاجة لا الجوان الصاج ولا الطرمبة القديمة والمشترك كان ضاع فى الورشة من يوم الحل العظيم :( ايوه يعنى معملتش انت الحاجات ديه ليه برضو لحد دلوقتى مش لاقى اجابة ولا هو جاوبنى !! وبالتالى استلمت منه العربيه والساعة كانت بعد 12 بليل وانا حاسس انها هى هى زى ما راحت زى ما جت شكلاً على الاقل مش موضوعاً [COLOR="rgb(139, 0, 0)"] طب حسابك كام يا عمنا وهتعمل معانا واجب قد ايه قالى عايز 850 جنية انا : بجد ولا بتهزر الميكانيكى : لاء بجد انا : يبقى اكيد بتهزر [/COLOR] طبعاً اتاكدت انه بيتكلم بجد وعايز ياخد 850 فعلاً وكمان مفقطهملى 700 جنية مصنعية ايد الباشا 150 جنية حساب ظبط التاكيهات وكهربائى ليه الكهربائى قالك علشان يوصل الفيش او حاجة كدة !!! طبعاً كل شياطين الدنيا كانت بتتنطط فى وشى ومعنديش خلق لطول المناهدة وهو من نفسه بعد شوية راح منزل ال 85. ل 500 قولتله انا هاخد العربيه ومعايا 300 جنية وليك وهتاخد واكدت عليه انت خلصت شغلك تمام قالى تمام التمام يعنى بعد العيد محتاج اجيلك اربط على الجوان ولا كدة تمام قالى لاء يا باشا تربيط ايه مفيش الكلام ده الوش سليم وتمام وبالتالى كنت هروحلة بعد العيد بس احاسبه واذا كنت هعمل شغل جديد مكانش فيه كلام خالص عن شغل مش خلصان وبس كدة سلام سلام اللى حصل بعد كدة انى اول اليوم العيد اخدتها وطلعت الشروق لقيت الاتى سحب ضعيف جداً برجلة حصلت اكتر من مرة فى الفتيس ويسقط للغيار التالت وتفضل كدة لحد ما اركن على جمب وافصل وادور تانى وكل ما اركنها فى حته تسقط زيت زيت ايه منين الله اعلم رجعت من المشوار متنكد ورميتها تحت البيت تانى لبعد العيد بعد العيد جيت اخرج بيها يادوب مشيت كيلو متر مثلا ولقيتها سخنت تانى بطلت وبردت وزودت مية ورجعتها تحت البيت تانى النتيجة النهائية دلوقتى بقيت شاكك فى كل حاجة فى العربيه فيه تسريب زيت معرفش منين المية بتنقص والعربيه بتسخن لسه اثار الطحينة لسه موجودة فى المية والزيت طبعاً لان الباشا مغسلش حاجة ومعرفش اذا كانت قديمة ولا لسه فيه مشكلة فى الجوان من ناحية الورشة والميكانيكى كلمتهم اول ما سخنت وقولت لصديقى صاحب الورشة شوفلى لو سمحت صنايعيى تانى لان ده كدة بيتعلم فيا قالى ما كلهم كدة !! وانتهينا على ان نصيحته ليا اجيب العربيه لنفس الصنايعيى تانى !! كده انا محتاج اكمل الموضوع بنفسى واتاكد من 3 حاجات 1- لحد ما اعرف سبب المشكلة الاصلى اللى مكتشفهوش الميكانيكى والمية بتروح فين خاصة بعد تغيير مشترك المية والطرمبة 2- واتاكد ان الجوان اتصلح صح فعلاً ومش محتاج تغيير تانى 3- اعرف سبب تسريب الزيت واتاكد ان مفيش اى مشاكل تانى ظهرت فى العربيه الموضوع لحد دلوقتى دخل فى مصاريف الف ونص قطع غيار ومصنعيات ومصاريف نثرية ومواصلات والعربيه زى ماهية ان لم تكن اسواء [COLOR="rgb(139, 0, 0)"]والاغرب ان الميكانيكى انهارده يكملنى باسلوب اقل ما يقال عنه انه مستفز وليه عين يطالب بفلوس والاعجب ان صديقى العزيز كان قاعد جنبة وكلمنى بعدة وواخد نفس موقفة وشايف ان كل اللى حصل ده عادى وانى المفروض اوديله العربيه تانى واديلو فلوس طبعاً [/COLOR] وانا موقفى النهائى انى مش هوديله العربيه تانى ابداً [COLOR="rgb(139, 0, 0)"]ولما اصلح العربيه واعرف فيها ايه لو ليه فلوس هياخدها ولو انا لى فلوس برضو هاخدها وبس [/COLOR] كده انا حكيتلكو مأساتى وعايز رايكم ونصائحكم بأمانة وبدون مجاملة او تحيز لى ولصديقى العزيز صاحب الورشة ولعمو الميكانيكى اللى عايز 850 جنية |
رد: اغيثونا يا ولاد البندر فى جوان وش السلندر
عايز 850 بأمارت إيه ابن التيييييييييت ,, طيب ليه حضرتك مرحتش او تروح للأخ حمدى (مخترع الفتيس بدون دبرياج)لأن من كلامك فى فك الموتور والطمبورة وضبط التكيهات يعنى مستر ميكانيك ده أخره يلم الرولمان بلى علشان يعرف يقوله رولمان مش رومان وسيفتى بالف مش سكس بالف ,,الله يخرب بيت البقر (وحضرتك ,,استغفر الله العظيم استغفر الله العظيم ,,حضرتك يارب بزمتك ينفع كده !! وزعلان من صانيعى طمبوره عايز 850 جنيه حق مامبوظ ولامابوز ولامابوذ والله مانا عارف بتتكتب إذاى ,المهم عايز فلوس بعد كل هذا الحب القاتل ,, ماهو عنده حق إذا كان باباه بيقول حضرتك يارب (اعوذ بالله) يبقى حضرتك ياباشمهندس وائل مش عايز خبير وكالة ناسا مايطلبش 850 جنيه لالالالا حضرتك ظالم هذا الكائن الخرافى ظلم بين !!المهم الف سلامة وربنا يكرمك وتنتهى من المشكلة دى وترجع العربية بأذن الله لحالتها الطبيعية وأحسن ,, مرة إخرى بأقترح على حضرتك ان تذهب الى الأخ حمدى وإنسى الأخ E.T
|
رد: اغيثونا يا ولاد البندر فى جوان وش السلندر
نفسي افهم يعني اية خراط يظبط تاكيهات عيب عليك ازاي تعدي عليك
المهم اغسل الموتور غسلة حلوة واكبس دورة المياة وقبل الكبس اغسل الدورة |
رد: اغيثونا يا ولاد البندر فى جوان وش السلندر
أنا برضوا من رأيى عم حمدى المخترع
بس لو تعرف تعمل لها عملية منظار إستطلاعى زى ما قالك الأستاذ عمرو يبقى أفضل, عالأقل تعرف الطحينة و السخونه دى منين. و بعدين لو حضرتك غيرت الزيت بزيت جديد و برضو بقى طحينة (إكشف عليه من المقياس مش الغطاء) يبقى كده أكيد الوش كان محتاج خراطة و عمو الميكانيكى محتاج خناقة. أعانك الله |
رد: اغيثونا يا ولاد البندر فى جوان وش السلندر
اقتباس:
بس تمن الكشف عندنا ب 850 جنية ماشي ولا اية |
رد: اغيثونا يا ولاد البندر فى جوان وش السلندر
اقتباس:
فكر كدة فى يوم تنزلنا ونعمل مقابلة نتجمع كلنا ونستناك :Bravo: |
| الساعة الآن 11:38 AM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017