مصر موتورز مجتمع السيارات - خد بالك وانت بتشتري عن طريق إعلانات النت

المشكلة يا جماعه هي في السلوك الاخلاقي و الضمير لمعظم (وليس كل) التجار

كثير جدا من التجار يفتقد الي معيار المصداقية في التعامل و ده عن تجربة شخصية

بيبيع العربية وهو علي دراية تامة بها و يعرضها عليك كان ملهاش اخت ، و عربية حكاية و فبريكة و سعرها لقطة و انه مثلا عاوز 40000 ج و انه بالامس اتعرض عليه 39000 و مارضاش يبيع أو يقول لك انه شاريها بـ 39000 مثلا و كلام من ده

و في حقيقة الامر بيكون علي اقصي تقدير شاريها بـ 30000 جنيه مثلا.

و كمان ناهيكم علي ان العربية ممكن تكون مشغولة اصلا و بتتباع علي انها فبريكة ، ده النهارده فيه صنايعيه مخصوصين لرش الدواخل و بعدين يزفروها باسلوب يخلي معظم الناس تصدق انها فبريكة فعلا .....

ناهيك عن جشعهم لما تكون بتبيع و همه اللي بيشتروا منك ،، بتبقي عارف حالة عربيتك و كل حاجة بس يفضلوا يطلعوا فيها القطط الفطسانة و دي فيها و دي بيها و يكرهوك في عيشتك و دائما ابدا يدعون بأنه معروض امامهم او انهم حتي اشتروا الاحدث منها و الاحسن حالة بنصف الثمن اللي انت طالبه ،، و ممكن كمان يزق عليك واحد و اثنين يسمعوك اسعار في الارض علشان يخلوك تقتنع ان السوق بقه في الارض

و الله انا ياما شوفت تجار بيشتروا عربيات من اصحابها برخص التراب و لا يقتنعوا الا بمكسب من 5000 الي 10000 جنيه (و ده للعربيات متوسطة السعر ) و بدون ما يصرفوا علي العربية جنيه واحد

للأسف هوه ده سلوك الاغلبية منهم