مصر موتورز مجتمع السيارات - BYD و الصينى والكورى والأوروبى .. فهل نحن زبائن درجة ثانية !!!

مقال رائع كالعاده من كاتب مميز
بس على اد ما المقال جميل وفيه معلومات قيمه جدا على اد ما بيأكد الواقع المؤسف اللي احنا عايشين فيه
وللاسف العربيات نموذج يعمم على كل حاجه بنشتريها و ندفع فيها اضعاف القيمه الحقيقيه مع انها للاسف غير مطابقه للمواصفات الادميه
تصور لما واحد ينزل يشتري اكل للكلب بتاعه فيجرب يجيب له علبه بلوبيف محلي و يعزف الكلب عنها !!!
ان اغلب حلويات الاطفال من زيوت النخيل المهدرجه الثقيله علشان تديها دسم وامراض مستقبليه قاتله
ده غير الالوان الصناعيه و مكسبات الطعم ... بطاطس بالكباب و الفراخ و الجبنه المتبله ... يا سلاااااام
اي علبه عصير مكتوب عليها ايه ... نكتار .. خلاصه القشر و البذر ومياه بسكر ..
وياريته سكر

انا اسف لتطرقي لنقاط خارج الموضوع

اضافه للموضوع
اوبل فكترا ... الجيل التالت (اخر فكترا وصلت عندنا بالايزي ترونيك )
دخلت مصر في 2008 على انها الفكترا الجديده .. هي فعلا كانت جديده بالنسبه لينا
لكن بالنسبه ليهم كانت الفكترا القديمه اللي محدش عايز يشتريها علشان الناس كلها مستنيه الانسينيا 2009
والغريبه انها فضلت تتباع في مصر على انها موديل 2009 ويمكن 2010 كمان و لولا ان المخزون خلص كانت اتباعت لحد النهارده لانه مش متوقع نشوف الانسينيا قبل قبل 4 - 5 سنين لما ينزل موديل جديد مكانها
مع الاعتذار لملاك الفكترا .. العربيه جميله معترضناش .. لكن ليه يتعمل فينا كده

ميتسوبيشي لانسر ( بطه ) الموديل انتهى بنزول الجيل الجديد شارك من 2007
والناس بتجيبها لحد النهارده زيرو ويقولك ياباني ياباني ...
ياباني منين يا عم اذا كان في موديل جديد نزل و بيتباع مكانها بقاله 3 سنين
لكن احنا اتعودنا ان العربيه ينزل عليها موديلين و تلاته و الموديل الاول لسه بيتباع بعد 18 - 20 سنه زي احدث سيارات شيفروليه الانوس !!!
او الفيرنا او النوبيرا او الاوبترا
الفيرنا الجديده نزلت بره واحنا هنا يقولك النيو اكسنت سبورت و هي عباره عن شويه نواكل و فانوس ليفت .. قصدي فيس ليفت

انا مش قصدي اهاجم العربيات دي او اقلل من شأنها
لكن للاسف احنا بيتضحك علينا كل يوم و التاني و احنا عارفين ... لكن ما باليد حيله
خصوصا مع وجود صحافه مدفوعه هدفها الرئيسي فلوس الاعلانات
وتبقى اي عربيه هي الاحدث و الاوسع و الاكبر و الاقوى .... مذيله بالكلمه السحريه ..
في فئتها
ما هي اصلها كل عربيه فئه في حد ذاتها .. فئه الدولار و الين و اليورو .. وكله بفئته

الف شكر على الموضوع الرائع ... و اه يا دماغي ...

ادعوك لقراءه هذه الموضوعات

الصحافه المدفوعه و الراس المصدوعه
الصحافه المدفوعه ..... و الرأس المصدوعه <<<< الجزء الثاني
الصحافه المدفوعه … و المراره المفقوعه