رد: انحراف السيارة مع الضغط على الفرامل
 

انت محتاج فراملجى مش ميكانيكى روح لفراملجى احسن يبصلك عليها هيفيدك اكتر من الميكانيكى

رد: انحراف السيارة مع الضغط على الفرامل
 

معنى ان السيارة بتلف من ورا ان الضغط للفرامل الخلفية مش متساوي اواحتمال تكون الامامية برده لاني ماشفتش العيب بنفسي و انصحك بالتالي:

1- اول حاجة تتأكد ان الزوايا سليمة و كذلك الكاوتش
2- مش معنى ان الخراطيم الامامية جابت زيت يبقى سليمة ممكن يكون ضغط الزيت مع الفرامل مختلف من ناحية اليمين عن الشمال ..لازم تتفك و يتكشف عليها لان ممكن تكون فيها سدد جزئي و ده هاتعمله للاربع خراطيم امامي و خلفي
3- تراجع التيل الخلفي و تعمل رجلاج للفرامل بحيث تبقى عالشعره بلغة الصنايعية يعني لو العربية مرفوعة تلف العجل بأيدك يلف عادي بدون اي مقاومة و لو رفعت فرامل اليد تكه واحدة يبقى في مقاومة وتتقل جامد وانت بتلفها
4- غير زيت الفرامل عشان لو في شوائب في المواسير او الخراطيم ينزلها بس خللي الميكانيكي يفضي من الاربع جهات و طبعا لازم ياخد هوا بعد تغيير الزيت

ان شاء الله العيب هايتصلح و اهو تبقى عملت صيانه كاملة لنظام الفرامل كله

و بالتوفيق ان شاء الله

رد: انحراف السيارة مع الضغط على الفرامل
 

بص يا باشا انا كانت عندى مشكلة مشابهة فى عربية لادا كانت عندى كل ما افرمل اللعجلة الشمال ورا تصرخ والعربية تحدف والميكانيكى كل مرة يفك التيل يصنفرة ويغسللى الطنابير بالجاز و3 مرات على كده يباشا ويومين وترجع لحد مغيرت التيل الخلفى كلة وخرطت الطنابير عند الخراط فاختفى الموضوع

رد: انحراف السيارة مع الضغط على الفرامل
 

أنا كان عندى كدة غيرت فرامل أماى فكيت الخلفى لاقيت فيها رايش كتير بعد ما اتنضف العربية مبقاش فيها مشكلة

مش عارف كانت المشكلة من الأمامى و لا من الخلفى بس شكلها أمامى

رد: انحراف السيارة مع الضغط على الفرامل
 

السلام عليكم ورحمة الله وبركاته

لازم نعرف ان المشكلة دي ممكن يكون ليها اكتر من سبب
1 - ممكن يكون الكاوتش
2 - ممكن التيل الخلفي ( اتعب وبدل التيل مكان بعضه وشوف النتيجة)
3 - ماستر من مساتر العجل الخلفي فيه مشكلة ومش بتظهر غير عند الضغط عليه
4 - التيل الامامي (بدل التيل مكان معضه )

اعتقد ان الحل مش هايخرج عن كده

وربنا يتسرها معاك وانشاء الله تتحل المشكلة لان ده خطر لو مسكت فرمله والارض فيها تراب او ميه وكنت بتجري بسرعة

رد: انحراف السيارة مع الضغط على الفرامل
 

متابع ومشتاق اعرف الحل

رد: انحراف السيارة مع الضغط على الفرامل
 

السلام عليكم
الموضوع ده حصل معايا في البولونيز من زمان...شوف الاحتمالات ده مش هيخرج منها انشاء الله:
1-ممكن يكون عندك ركبه من ركب العفشه لحامها فك.ف لما بتدوس فرامل الفرده اليمين بترجع شويه لورا...ف العربيه بتنحرف يمين وده علاجها سمكري شاطر ولازم تلحقها لانها خطيره وممكن الركبه كلها تنفصل من الشاسيه وانت ماشي
وخلي واحد صاحبك يقف وامشي بالعربيه وفرمل قدامه خليه يشوف الفرده هترجع ورا وللا لا
2-ممكن يكون خرطوم من خراطيم مصاطر الفرعيه فيه سدد او اختناق ..ما يؤدي لانه بيوصل زيت بكميه اقل من الجانب الاخر فيؤدي لانحراف العربيه زي ما انت بتوصف..وحله انك تفكه وتسلكه كويس وتغسله وتركبه تاني
3-ممكن يكون مصطر الامامي بتاع الفرده اليمين (قافش) يعني بعد ما تشيل رجلك من على بدال الفرامل ...البستم بتاعه مش بيرجع للاخر.ما يؤدي ان لما تدوس فرامل تاني ,البستم بيوصل التيل للطنابير اسرع من الجنب الشمال..فيؤدي للانحراف . وحل الموضوع ده انك بتفك الماصطر من بعضه وتنضفه وتغسله كويس وتتاكل انك فكيت القفشه.او تغيره لو كان عما عتب او شفه عشان ميعلقش تاني
4-وممكن يكون عندك الجنب اليمين التيل مليان والجنب الشمال التيل متاكل فلما تفرمل ..برضه الجنب اليمين يمسك اسرع من الشمال