المشاركة الأصلية كتبت بواسطة nawwara (المشاركة 550206)

انا معاك يا استاذ شريف ومقدرة موقفك , لكن ده مش معناه ان مافيش راجل ممكن يعمل حادثة زى دى , بالعكس ممكن تبقى حادثة اغبى كمانانا نفسى سعات باشوف ستات بيعملو حاجات غريبة تفور الدم, بس للامانة بردو باشوف رجالة بيعملو نفس الشئ , وده اللى خلانى اعتنق فكرة ان الموضوع قائم على المهارة قبل ما نبص مين اللى هايسوء رجل كان او امرأة ..
اللى عايزة اقوله ان الامر ده نسبى وبيعتمد على عدة عوامل فى الشخص سواء رجل او امرأة
انا حاسة فعلا بالرجالة وضيقهم من الستات اللى بتسوء فى الشوارع , بس عايزة اقولهم يا جماعة الحاجة هى اللى اضطرتنا لكده , ومعلش استحملونا بقى , وفى نفس الوقت بتضايق لما القاى راجل يقول (آآآآه ماهى واحدة ست) لما يلاقيها عملت حاجة غلط , كأن الستات بقو هما سبب كل خطيئة فى القيادة والرجالة منزهين , لا , فى كده وفى كده من كلا الجانبين .. قد تكون نسبة الاخطاء فى النساء اعلى من الرجال وده راجع لخبرة الرجال الاكتر فى مجال القيادة , يعنى لو واحدة ست بتسوق بقالها 20 سنة وراجل نفس الكلام اعتقد انهم هايبقو شبه متساويين فى المهارة والخبرة ..
من ناحية القانون ممكن تكون الست واخدة امتيازات عن الرجل شوية , انما من ناحية الدين ليه مش مقنع ؟ هو الدين حرم او كره شئ فى الموضوع ده ؟ , ونظريا ليه مش مقنع ؟
وتحياتى لك

المشاركة الأصلية كتبت بواسطة احمد على 1999 (المشاركة 549750)

هو فى نية يمنعوا سواقة السيدات فى مصر ؟!!!!!!

المشاركة الأصلية كتبت بواسطة nktis (المشاركة 549758)

اتفق معاكي يا مروه في نقاط واختلف معاكي في نقاط...
خلينا في الاختلاف وهي انها لا تناسب طبيعه الانثي الرقيقه....كلام مظبوط
تعملي ايه لو الكاوتش نام وعايزه تغيريها؟؟؟ اظن امر متعب وصعب علي السيده..
الخلاف الثاني وهو لا قدر الله حادثه وحصلت فيها وفاه لطفل مثلا.؟؟؟؟ حاجه زي كده الراجل بيستحمل انما بيتهيقلي لو حصلت مع سيده ممكن يدمرها نفسيا وهتحس طول حياتها بالذنب....

انا مش معترض علي سواقه السيدات بس متحفظ قليلا .... يعني يسوقوا فقط للضروره .....امال احنا بنعمل ايه ؟؟؟ ولا اشتكينا ولا حاجه؟؟؟؟:010104~171:

المشاركة الأصلية كتبت بواسطة nawwara (المشاركة 549833)

السلام عليكم ورحمة الله وبركاته
هحاول ارد على كلام الاخ اللى كتب المقالة دى , وان كنت لا استغرب بعض الكلام اللى قاله , قوليلى ليه؟ , اقولك لان الرجل ببساطة سعودى الجنسية , يعنى ايه الكلام ده؟ , يعنى فكرالكاتب ونشئته وتربيته وحياته كلها كانت فى مجتمع بيحاول جاهدا انه يصد اى تغيير يطرأ على نظام الحياة فى بلده , دى اول حاجة استشفتها من بداية المقال ..
ندخل بعد كده للمقدمة اللى بيقول فيها ان الغرب بيشن حملات شرسة لتغيير التفكير المتعلق بالمرأة وحياتها ومساواتها بالرجل , فى دى الراجل معاه حق , فعلا الغرب بيعمل كل ما فى وسعه عشان يغير مفاهيم كتير بشأن المرأة وطبعا بيغيرها للأسوأ , فى دى انا متفقة معاه ..
نيجى بعد كده للمبرر الفقهى اللى ذكره الاخ إياه , بيقول فيه ان دفع المضار اولى من جلب المنافع ..
تماااااااااااااام , انا معاك ودى قاعدة فقهية صحيحة , لكن فين المضار اللى حضرتك عايز تدفعها واللى هى اولى من جلب المنافع , تعالى نطبق الكلام ده على مصر .. البلد منفتحة والكل تقريبا فى الشارع والنساء والرجال راس براس فى الاتوبيس والمينى باص , قل لى برأيك لو المرأة بتركب مواصلة والرجالة حواليها من اربع جهات ولا حتى من جهة واحدة وكل واحد بيلزق فيها بشكل او بآخر ده افضل ولا تسوق بنفسها عربية ترحمها من ذل المواصلات وما فيها من قلة الأدب والمهانة؟ , اعتقد كده الفكرة وصلت ..
حاجة كمان : الاخ بيقول ان ( ما افضى الى حرام فهو حرام ) , ومين قال لحضرتك ان السواقة اللى هى فى الاصل من المباحات ممكن تفضى الى حرام فى كل الاحوال؟!!! , لما واحدة تستخدمها غلط يعنى مثلا تركب معاها شباب والذى منه وتعمل بيها او فيها محرمات , حتى دى ماقدرش اقولها سواقتك حرام انما اقول لها ان الافعال اللى استخدمتى فيها العربية هى اللى حرام ..
كمان : وكلامى للاخ كاتب المقال , هل تتوقع ان كل رجل هايتحمل مسؤلية توصيل نسائه فى كل مكان , هل تتوقع انه هايكون فاضى لهم , طب والنساء اللى معاهمش راجل يعملو ايه , يولعو فى نفسهم مثلا؟!!!
وبعدين فى حاجة تانية , على كلام الاخ اللى بيقول ( حتى لو اضطر لجلب رجل اجنبى لتولى هذه المهمة ) , لو اعتبرنا ان ده فيه مفسدة فحضرتك شايف ان المفسدة الخاصة نضحى باننا نكتر منها عشان نمنع مفسدة اعم , فى حين ان السواقة ليست مفسدة من الاساس؟!! طب ادينى عقلك بقى ..
حكاية الخلوة بالرجل الاجنبى فى السيارة يمكن تكون مبلوعة شوية فى السعودية لانها بلد فاضية , عدد سكانها قليل جدا بالمقارنة بمساحتها , يعنى فى مناطق فاضية كتير ممكن تتعرض فيها المرأة للأذى , لكن الوضع مختلف فى مصر خالص , هنا البلد مليانة ناس ..
معنى كده ان المرأة لما تكون مع الرجل لوحدها فى العربية دى مش خلوة لان الناس حواليهم فى كل مكان وممكن اى حد يشوفهم ببساطة وبالتالى انتفت شروط الخلوة , يمكن فى السعودية الامر يكون مختلف لكن فى مصر هو ده الوضع القائم , وبالتالى العربية افضل للمرأة من عدم وجودها , انا باتكلم عن مصر يا جماعة عشان ماحدش ياخد كلامى بوجه عام ..
حكاية ان المرأة تقر فى بيتها ده امر صحيح , لكن واقع الحياة بيفرض على المرأة غير كده ..
اعتقد ان المرأة اللى مش محتاجة تنزل الشارع دى واحدة غنية تقدر تجيب كل حاجة وهى قاعدة فى البيت او عندها اللى يجيب لها وهى معززة مكرمة فى البيت , انما اللى ماعندهاش حد يجيب لها تعمل ايه ..
اللى عايزة اقوله فى الفقرة دى بالذات , ان العصر بيتغير والفتوى بتتغير بتغير الزمن ومقتضيات الحياة , وبالتالى لابد ان الواحد يكون عنده فقه الواقع قبل ما يتكلم فى اى مسألة فقهية , وهذا ما لا اجده فى كلام الأخ , اللهم الا اذا كان بيتكلم على حال بلده وهو ادرى بها ..
ده ردى على اول مبرر من 6 مبررات , اعذرونى على التطويل فى الوقت , لان ايدى بتوجعنى من الكتابة الكتيرة , وهاكمل الرد على بقية المبررات تباعا ..

المشاركة الأصلية كتبت بواسطة nawwara (المشاركة 549851)

2- المبرر الاخلاقى :
الاخ بيقول ان من المفاسد المترتبة على ذلك , (هجران المنزل والسفر بغير محرم، والتعرض للمضايقات، والاختلاط بالأجانب، والتوسع في مجالات عمل المرأة المتعلقة بشؤون النساء السائقات، إضافة إلى مشكلات صيانة مركباتهن ضمن أجواء لا تناسب المرأة المسلمة، مع الاضطرار لكشف الوجوه)..
تعالو نرد على الكلام ده واحدة واحدة ..
- هجران المنزل : يبقى البنت مش متربية بقى من البداية انما ماتجيبش الأمر فى العربية , ولا ايه يا جماعة ..
-السفر بغير محرم , فى دى معاه حق المرأة فعلا المفروض لا تسافر بدون محرم , والاحاديث الصحيحة كتير فى الموضوع ده , انما ده مش مترتب على ركوبها للعربية , ما هى ممكن تسافر بالمواصلات الخاصة بالسفر , ليه ربطت الأمر بالسيارة ..
-التعرض للمضايقات : المرأة بتتعرض للمضايقات بالسيارة وبدونها , ومع وجود السيارة بتضمن بنسبة اعلى ان من يضايقها لن يلمسها لوجود حاجز بينهم مش زى ما تبقى امامه مباشرة بدون اى حواجز بينهم حتى لو ازاز شباك العربية ..
-الاختلاط بالاجانب : الاختلاط موجود بالفعل بعربية وبغيرها , يعنى وجود العربية لم يغير شىئ, يبقى ايه الضرر منها حتى الآن ؟ لا شئ ..
-التوسع في مجالات عمل المرأة : نفس الرد بتاع الاختلاط بالاجانب ..
- مشكلات صيانة مركباتهن ضمن أجواء لا تناسب المرأة المسلمة : يمكن تكون الاجواء دى موجودة فى السعودية , انما فى مصر لأ ..
-الاضطرار لكشف الوجوه : مش عارفة بصراحة فين الاضطرار فى كده , نساء كتييييير فى مصر بتسوق ولابسة نقاب والعملية زى الفل ولم تضطر يوما لخلع نقابها وانا واحدة منهم , اللهم الا ان كان فى ضرورة , والضرورة تقدر بقدرها ..
الاخ بيقول( والسيارة كمركبة متحركة داخل المجتمع ليست حصنًا للمرأة من أن تُنال بسوء، أو تتعرض للفتنة، أو تعرض غيرها للافتتان ) , الرد: المرأة معرضة للإساءة فى اى وقت بعربية وبدون ومعرضة للفتنة او ان تفتن غيرها برضه بالعربية وبدون , يبقى ماتحطش العربية هى المعيار لوجود اساءة وفتنة من عدمه , يبقى الافضل لها انها تكون داخل العربية كحاجز بينها وبين اى مسئ احسن من مفيش ..
الاخ بيقول ( ولا سيما عندما تتعطل مركبتها في أماكن لا تأمن فيها المرأة على نفسها ) : دى حاجة ممكن تحصل لأى واحدة فعلا عشان كده الواحدة بتظبط عربيتها قبل اى مشوار عشان ماتعملش معاها حركة نص كم فى السكة ..
معلش واحدة صاحبتى جاتلى هاكمل الرد على بقة المبررات الاربعة بعد ما تمشى ان شاء الله .. سلام مؤقتا

المشاركة الأصلية كتبت بواسطة chevy_lumina (المشاركة 549903)

في الزمن دا مينفعش الست متشتغلش لازم الراجل و الست يشتغلوا عشان يأمنوا مصروف البيت و الاولاد و دي حاجة معروفة الست هتروح شغلها ازاااي؟ هتقول ماتسوقش العربية مااشي يا سيدي خليه تركب ميكروباص او توكتوك او تكس طيب دي اكبر مشكلة الواحد مش ضمنهم يكونوا صيع بلطجية مسجلين و انتم عرفيين الظروف في مصر عاملة ازاي الي عايز يعمل حاجة يعملها مفيش شرطة فلو الست ساقت العربية هتبعد عن الاشكال دي و حكاية اختلاط و ما اختلاط فده راجع لتربية البنت بإختصار مترميش بناتاك لسواقين مستغلين او او او:120102~318: