|
رد: يا جماعه اشغل الاوفر درايف ولا اسيبه مش شغال ارجو الرد للاهميه
اقتباس:
اولا عند بدايه تشغيل المحرك وهو بارد حندوس زر الاوفر درايف فى الفتيس الاوتو فى وضع الاغلاق يعنى حينور فى التابلوه O/V OFF ده اولا يبقى كده اول خطوه لاغينا الاوفر درايف اثناء تسخين المحرك عشان ميستهلكش بنزين خلاص كده والا مش مفهوم؟مفهوم!!!!!! نيجى بقى لثانيا وركزوا معايا المحرك سخن خلاص وبقى تمام التمام حنعمل ايه بقى حنروح ضاغطين على الزر الموجود فى الفتيس الاوتوماتيك حيطلع لبره والللمبه حتطفى بتاعه التابلوه معنى كده ان الاوفر درايف شغال وده الوضع الطبيعى فى السير على فكره فى الطريق ان الاوفر درايف يكون شغال واللمبه تكون فى التابلوه اوف كده ثانيا خلاص اظن واضح جدا لحد كده نيجى بقى لثالثا والاهم الفتيس الاوتوماتيك فيه رقم 1 ورقم 2 صح كده؟؟؟ رقم واحد ده فايدته ايه بقى اولا رقم واحد ده نستعمله لما نكون طالعين مرتفع جبلى يعنى يكون فيه رمل او عند نزول المنحدرات وده اهميته انه بيتحكم فى سرعه دوران المحرك ويحكمه عشان السياره تفضل تحت طوعك وتقدر تتحكم فيها بس المهم بقى وده الاهم ان عند التحويل لرقم واحد ده منزدش عن 50 كيلو متر فى الساعه يعنى المحرك ميزدش عن خمسين بس رابعا لو حبينا نزيد عن كده يعنى السرعه نزودها عن 50 وبرضه اثناء القياده فى نفس الظروف السابقه يعنى طلوع طريق رملى او نزول منحدرات يبقى ننقل الفتيس للنقله رقم 2 لغايه 95 كيلو متر ساعه منزودش عن كده ابدا طول مالسرعه فى الفتيس معشقه على رقم 2 حلو الكلام؟ يعنى السرعه التانيه فى الفتيس من 51 لغايه 95 حد اقصى اظن لغايه كده مفهوم اوى صح؟ خامسا انا دلوقت مثلا على الوضع D حبيت اعدى سياره ادامى وعاوز تجميع عالى عشان عربيتى تلم معايا واقدر اعدى السياره اليى امامى او انى طالع مرتفع عالى مثلا ومحتاج عزم شديد وانا على 100 كيلو مثلا حعمل ايه بقى حروح دايس دواسه البنزين للاخر خالص فى الدواسه ودى بقى اسمها العلمى كيك داون حيحصل ايه بقى ساعتها!!!!حيروح الفتيس نازل على السرعه 3 مثلا لوحده لو فرض مثلا ان المائه كيلو اليى كنت ماشى عليهم كانت السرعه الرابعه حيروح الفتيس محول اوتوماتيك للسرعه الاقل على طول يعنى دى بتتحسب على حسب سرعه السياره اليى انا كنت ماشى عليها لو كنت على الرابع مثلا الفتيس حيقل نقله عشان يدينى عزم لحد كده حلو؟ نيجى بقى لسادسا اى سياره مانوال بيكون العادى بتاعها 4 سرعات اماميه وواحده خلفيه عدا السيارات الحديثه بيكون عدد سرعات المانوال 5 غير المارشدير طبعا فايده الغيار الخامس ده يا جماعه الخير انه بيريح الماتور وبيخفض استهلاك البنزين طبعا وده بيكون فى الطرق المفتوحه ____اما فى السيارات الحديثه الاوتوماتيك بيكون عدد الغيارات فيها 4 +مارشدير وطبعا الغيار الرابع فى الاوتوماتيك بيريح السياره جدا ويخفض استهلاك الوقود لان الموتور ساعتها بيكون مرتاح حلو لحد كده!!!!!! نيجى بقى لسابعا انا دلوئت ماشى على سرعه 110 كيلو مثلا وحعتبرها السرعه الرابعه فى الفتيس الاوتوماتيك مثلا وماسك شمالى وادامى سياره وجنبى سياره وفيه مسافه بينهم حبيت اعدى بين العربيتين دول ومحتاج عزم عشان اقتنص الفرصه دى واهرب منهم حعمل ايه بقى!!! حروح دايس على الزر بتاع الاوفر درايف عشان اقفله من الفتيس ساعتها حتنور اللمبه فى التابلوه تفيد انى قفلت الاوفر درايف o/v off حيحصل ايه بعد كده بقى ؟ حينزل الغيار من السرعه الرابعه للتالته وحيدينى عزم كبير جدا للسياره يعنى بالعربى حتجمع معايا سرعه اكبر عشان اقدر اعدى بين السيارتين دول بعد ميجمع معايا الموتور بقى واقدر اعدى بين السيارتين حروح ضاغط تانى على الزر الموجود فى الفتيس حيطفى فى التابلوه طبعا وحيشتغل الاوفر درايف وحيقدر يدخل على السرعه القصوى للفتيس اليى هى الرابعه حروح دايس بنزين حتلائى السياره طارت بأقصى سرعه وابقى قابلنى لو حد بقى من العربيتين دول عرف يحصلك لانك ساعتها حتكون طيرت بالسياره لانه حتكون خدت سرعتها خلاص على الطريق الخلاصه يا جماعه الخير الاوفر درايف بيكون شغال معانا على طول يعنى سيبه مفتوح لانه بيوصل بالسياره لاقصى سرعه فيها ولما بيكون شغال اللمبه فى التابلوه بتكون مطفيه طبعا حالتين بس حنطفيه فيهم من الاخر وساعتها اللمبه فى التابلوه حتكون منوره تفيد انه مش شغال الحاله الاولى عند تسخين السياره وخصوصا لو الجو بارد بعد متسخن حنشغل الاوفر درايف ونمشى بالسياره الحاله التانيه بقى لو زادت سرعتنا عن 110 والكلام ده فى الصنى اوتوماتيك عشان يبقى كلامى واضح وحبينا نسقط نقله عشان نقدر ندى السياره عزم عشان تقدر تهرب من عربيتين مثلا او لزياده العزم عشان الموتور يجمع بسرعه فى توقيت اقل وبعد كده نشغل الاوفر درايف تانى عشان نقدر نوصل للنقله الرابعه والاخيره فى السياره الاوتوماتيك الصنى ومازلت بقول الصنى اليى هى توازى النقله الخامسه فى الفتيس المانوال برضه فى الصنى اظن كده مفيش حد حيقدر يقول مفهمتش ولو حد قال مفهمتش معنديش كلام تانى اقوله غير انه يبيع السياره ويجيب سياره بدون اوفر درايف ويريح نفسه ويريحنى ههههههههه ودمتم بخير ملحوظه اخيره خلى الاوفر درايف شغال على طول يعنى تكون اللمبه فى التابلوه مطفيه نطفيه بس فى الحالتين اليى قولنا عليهم غير كده لا حتلائى استهلاك البنزين ممتاز والسياره فى منتهى الراحه والامان ان شاء الله واخيرا فايده الاوفر درايف لما بيكون شغال ومش منور فى التابلوه انه بيديلك الغيار الاخير فى السياره يعنى الاوتوماتيك بيديلك الغيار الرابع لكن لو منور فى التابلوه يبقى ملغى وبكده السياره بيكون اخرها الغيار التالت بس يعنى الرابع بيكون ملغى وده طبعا بيكتف السياره عشان كده انصح بتشغيل الاوفر درايف وفى الحاله دى بيكون اللمبه مطفيه فى التابلوه ودمتم بخير |
رد: يا جماعه اشغل الاوفر درايف ولا اسيبه مش شغال ارجو الرد للاهميه
و الله يا استاذ الجداوى كلام عشرة على عشرة
جزاك الله خيرا الحاجة الوحيدة اللى مش فاهمها ليه عند التسخين الغى الاوفر درايف ؟ بس متقوليش بيع العربية انا لسة جايبها الله يكرمك ههههههههههههههه اللى انا فاهمه ان لما زرار لغى الاوفر درايف بضغط عليه و اللمبة تنور اللى بيحصل ان كنترول الفتيس بينقل على بروفيل تانى من خصائصه : تأخير النقلات و لغى اخر ترس زى ما حضرتك تفضلت و قولت لكن مبيحصلش فصل ميكانيكى لحاجة هو مجرد لعب بسوفت وير |
رد: يا جماعه اشغل الاوفر درايف ولا اسيبه مش شغال ارجو الرد للاهميه
اقتباس:
شكرا جزيلا طبعا للاستاذ الجداوى على توضيحه المفصل لخاصية الاوفر درايف .. بس انا ليا تعليق على نقطتين : اولا خاصية الاوفر درايف ملهاش اى علاقة بتسخين العربية او اذا كانت بارده او سخنه .. والاوفر درايف مفيش اى فائده منه غير فوق سرعه 40 تقريبا (اقل سرعه العربية ممكن تاخد فيها الغيار الرابع) ... ثانيا بالنسبة لاستاذ احمد على .. الاوفر درايف مش بيأخر نقلات خالص .. وظيفته الوحيده على فصل وتشغيل الغيار الرابع اثناء المشى بالعربية ... قصة تأخير النقلات دى ليها زرار تانى بيكون اسمه power او PWR وبيكون موجود فى بعض العربيات الاتوماتيك (معتقدش انه موجود فى الصنى) بس هو موجود فى الانوس والنوبيرا والفيرنا الاتوماتيك مثلا .. وموجود عندى برضو فى الأفانتى 97 (اللى هيا إلنترا 97) وده بيخلى النقلات تتأخر والعربية تحرق على كل غيار بزياده علشان تستفيد اقصى استفاده من عزم الموتور وتاخد منه اداء رياضى ممتاز ..... |
رد: يا جماعه اشغل الاوفر درايف ولا اسيبه مش شغال ارجو الرد للاهميه
حسام باشا كبير البورسعيدية مش حبقى اشوفك فى بورسعيد بقى و لا أيه ؟
كده احنا متفقين فى موضوع التسخين لكن حكاية لغى الاوفر درايف انه بيأخر النقلات فدى فعلا عندى واضحة جدا فى ال i10 زى ما تقول كده 2 فى 1 منها فعلا ميجبش ترس الاوفر درايف اللى هو عندى الرابع و منها فعلا بيأخر النقلات |
رد: يا جماعه اشغل الاوفر درايف ولا اسيبه مش شغال ارجو الرد للاهميه
اقتباس:
يا ريت يا باشا ده يبقى شرف كبير اوى ليا يا هندسة ويبقى الواحد كسب اخ كبير وصديق عزيز والله ... تمام .. هو الموضوع كله معتمد على كنترول الفتيس .. هو اللى بيتحكم فى كل حاجة انا مثلا عندى الاوفر درايف بيلغى الرابع بس ... وعندى زرار تانى فيه 3 اوضاع : - PWR : وده بيخلى العربية سحبها جامد اوى وبتحرق جامد على الغيار (وضع رياضى جدا) - HOLD : وضع هادئ جدا بيخلى العربية تاخد غيارات عاليه على سرعة قليلة وده حلو اوى فى السواقة الهادية او التمشية .. وبيخليك متحسش بالنقلة - وضع وسط اللى هو الوضع العادى .... |
رد: يا جماعه اشغل الاوفر درايف ولا اسيبه مش شغال ارجو الرد للاهميه
تمام كده يا حسام باشا بان المقصود
و بعون الله المرة الجاية اللى حاجى فيها بورسعيد نتقابل على خير ان شاء الله و الله حبقى سعيد جدا |
رد: يا جماعه اشغل الاوفر درايف ولا اسيبه مش شغال ارجو الرد للاهميه
اقتباس:
ثانيا سيدى الفاضل مبروك عليك السياره وربنا يبارك لك فيها يا رب ويكفيك شر الحاسدين قول امين ههههههه ثالثا اسف على عدم ردى على حضرتك فى حينه نظرا لانشغالى الفتره السابقه رابعا ندخل بقى فى المهم لكى اجاوب سيادتكم وكذلك اجابه الاخوه الاعضاء الاخرين بشأن ان الاوفر درايف ليس له علاقه بتسخين السياره -بنظره من حضرتك والاخوه الافاضل الذين لديهم السياره المذكوره فى كتالوج السياره الصفحه رقم 11-5 حتلائى عباره واضحه وصريحه بتقول ايه بقى لا يعشق وضع السرعه الزائده حتى يدفأ المحرك بناء على هذه المقوله من واقع مانوال السياره طبعا وليس من واقع الافتاء فأنه يتم فصل الاوفر درايف للحد من استهلاك البنزين فقط فى بدايه تشغيل السياره وعند وصول درجه الحراره الى المستوى المطلوب للاقلاع بها نقوم بوصل الاوفر درايف مره اخرى بحيث تكون اللمبه بالتابلوه مطفيه واستمتع بقياده سيارتك بشكل طبيعى جدا وبعدين ان كنترول الفتيس بينقل على بروفيل تانى من خصائصه وان مبيحصلش فصل ميكانيكى وانه مجرد سوفت وير احب ان احيط علم حضرتك انه بيحصل فصل ميكانيكى طبعا بدليل ان الاوفر درايف فى السياره بيفصل السرعه الرابعه عن الموتور فى حاله عدم تشغيله واللمبه فى التابلوه تنور وده بيكون عن طريق امر من الفتيس الخاص بالسياره الاوتوماتيك عند الضغط على زر فصل الاوفر درايف فيه بيوصل الامر ده لكمبيوتر السياره وبالتالى فأنه بيفصل السرعه الرابعه فى الموتور ويخليه لغايه السرعه الثالثه فقط بس انت الكلام ده مش حتشعر بيه غير لما تكون مثلا على سرعه عاليه فوق90 كيلو والكلام ده فى نيسان صنى سرعه 90 وبكررها مش 40 زى بعض الاخوه مقالوا وطبعا دى بتختلف من سياره لاخرى وجرب كده وانت على سرعه 90 والاوفر درايف شغال واللمبه مطفيه جرب ودوس الزر الخاص بفصل الاوفر درايف من الفتيس حتلائى السياره صوت الموتور بقى عالى غير ان rpmفى هذه الحاله سوف يزيد فى تابلوه السياره دليل على ان الحرق على الغيار الثالث يزيد لاعطاء السياره المزيد من العزم ومتخافش لان سرعه 90 فى السياره المذكوره بتكون امان وده حتعرفه لما تفصل الاوفر درايف حتلائى المؤشر فى السياره الخاص بالrbm لا زال فى وضع طبيعى يعنى بالبلدى كده موصلش للعلامه الحمرا والمهم بقى انك متزودش بنزين فى الحاله دى بحيث ان المؤشر الخاص بالrbm يوصل للعلامه الحمراء اوعى لان طول ما انت قبل العلامه الحمراء انت فى امان غير كده لو وصلت للعلامه الحمراء لا قدر الله تبقى كده ممكن تجيب موتور لا سمح الله بعد كده طفيه بحيث ان الفتيس ينقل على السرعه 4 والاوفر درايف يعمل فى هذه الحاله وحتلائى اللمبه فى التابلوه انطفأت ودوس بنزين حتلائى السياره انطلقت بأقصى سرعه لها فى هذه الحاله .....الخلاصه بتفصل الاوفر درايف عند تسخين السياره وخصوصا لو الجو بارد لكى تحد من استهلاك الوقود اولا وثانيا لكى يعمل نظام الاوفر درايف بشكل جيد وبكامل خصائصه لابد من تسخين المحرك جيدا قبل الاقلاع عارف كده بالبلدى زى متكون سايق سياره مثلا مانوال وجيت الصبح دورتها وروحت دايس بنزين على طول وحبيت تطلع بيها بسرعه فى الحاله دى عمر السياره محتنطلق بيك بسرعه عاليه الا اذا سخنت بشكل جيد فى الحاله دى بس حتلائيها بتستجيب للضغط على دواسه البنزين غير كده مهما تدوس حتشعر ان استجابه السياره رخمه فى بادىء الامر معاك وعشان تستجيب لك لابد من تسخينها فى بادىء الامر بشكل جيد وخصوصا فى فصل الشتاء اتمنى اكون افدتك انت وسائر اعضاء المنتدى الكرام بخصوص جزئيه فصل الاوفر درايف اثناء تسخين السياره فى الصباح ودمتم بخير |
| الساعة الآن 02:47 AM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017