رد: يلا نضحك ع بعض
 

ايون كلوا يقر ويعترف

انا وانا صغيره كنت بحط البشاوره علي كرسي الميس علشان تقعد عليها وتوسخلها هدومها


وكنت متصاحبه علي صاحب محل كده بتاع مقالب جبت من عنده ريحه واحشه اوي شبه ريحه المجاري وخليت المستر بتاعي يحطها علي ايديوا والله كانت هتعلق اليوم ده

وكان في مياه كده بتتحط علي الكرسي ولو حد قعد عليها كانت بتلسوعوا علشان عامله زي الشطه كده
برضوا عملتها في المستر ده برضوا
اول ما اتخرجت من المدرسه ورحت ثانوي كان المستر ده بيرقص منكتر المقاب اللي عملتها فيه
ولي عوده في ذكريات تانيه

رد: يلا نضحك ع بعض
 

من فترة كبيرة أمي كانت بتخزن رز في غرفة ، المهم فار كبير استوطن الغرفة عشان ياكل من الرز، فمرة قلت ندخل نشمر ونقتله، وكان معايا صاحبي العزيز إلا هو بق نسيبي بعد كدة، المهم صاحبي ده بيخاف جدا من الفيران، لكن قال يدخل معايا يتفرج من بعيد.
المهم عمل حركة غبية شوية: حط كرسي قدام الباب ووقف عليه، والمشكلة إن الباب بيفتح لجو، يعني هو كدة بق سادد الباب بجسمه.
المهم قعدت أدور على الفار لا حس ولا خبر فتشت الغرفة كلها لدرجة إني فضيتها كلها مفيش فائدة.
وبعد عناء قلت أرفع الدولاب الحديد إلا كان في الغرفة لعل وعسى يكونوا مستخبين حوليه. الدولاب ده له قدمين مجوفين من الداخل، أنا يا دوب بأرفع الدولاب من الناحية اليمين ولقيت ثلاث فيران بحجم كف اليد، وفي قمة القوة والعنفون فضلوا يجروا في الغرفة، من سرعتهم خلوا الأرضية البيضة بقت سودا.
صحابنا الفيران بق وهم بيجروا عايزين إيه؟ طبعا عايزين يخرجوا.
ففضل صحابنا الفيران يجروا وينطوا يخبطوا نفسهم في الباب (طبعا الباب إلا صاحبي إلا بيخاف من الفيران سدوا بجسمه على الكرسي)، وصاحبي مات من الهلع، وفضل يصرخ عشان مش عارف ينزل ومش عارف يخرج. وأنا سبت الفيران وفطست من الضحك على صاحبي.

رد: يلا نضحك ع بعض
 

انا جي الموضوع ده اضحك وخلاص

فكرتني يا مهند بخالي بردك في فار كان مجننه في الشقه وفضل يطارده لحد ما اتزنق في المطبخ واستخبي في الفرن بتاع البوتجاز راح خالي مولع الفرن عليه تقريبا كان الجوع قتله في اليوم ده ونفسه هفته علي الفيران وشواه في الفرن يا معلم احلي جريل تتخيله

رد: يلا نضحك ع بعض
 

رد: يلا نضحك ع بعض
 

كنت بسال عليك لا تكون اتصبت ولا حاجه ف احداث السويس
الحمد لله اطمنا عليك

رد: يلا نضحك ع بعض
 

ارجوا من الاخوه في وجه قبلي يطولوا بالهم شوية
كنت ف اخرسنه في الكلية في بورسعيد وقاعد في شقه من شقق الطلبه في بورفؤاد في شارع هادي جدا وبعدين دكتور في الكلية قالي لوعندك مكان فاضي في الشقه لابن اخويا قلتله فيه ولو مافيش نفضيله مكان يافندم (هوا انا ف ديك الساعة اللي ابن اخوا الدكتور يسكن معايا وسلملي على التقدير والتراكمي والمشروع)
المهم الدكتور جاب ابن اخوه وجه الشقه الدكتور على فكره من المنصورة لقيت شاب اسمر اوي وطويل ومطقم الوانات وكوتش من ابو لسان الكلام ده سنه 97 قالي ما هوا ابن صديق عزيز يعني زي اخويا وسابنا ومشي وبقيت انا واسامه وال3 زمايلي في الشقة وشا لوش لوشوشهم
وبدات المحادثه اسمك ؟ اسامه منين ؟ من لجصر(الاقصر) تعرف الدكتور منين ؟ صاحب والدي من ايام السعوديه في سنه كام ؟ اول سنه ف الكلية همممممم؟ نظرة استغراب وندهوني التلاته على جمب وقالولي مشيه
ماقدرش انا محرج من الدكتور / مشيه / امشيه ازاي / اتصرف / طب ليه / ياعم ده شكله صغير وصعيدي هوا احنا لسه هانربي ونعلم / مايجراش حاجه ما احنا كلنا كنا كده / ياعم اي حاجه هاتحصل هنا هاينقلها /
قلتله يابني فيه حاجات لازم تعرفها وانت براحتك احنا ما بنذاكرش خالص / وماله اللي عاوز يذاكر بيذاكر لو معدي عليه جطر (قطر) / بنعمل اكل مع بعض ويمكن ما يعجبكش / يااخوانا المطاعم موجوده لو ماعجبنيش حاروح مطعم / كوتشينه ودومنه (دومينو)ودوشه وأرف / دومنه ؟ هوا البحاروة بيعرفوا دومنه / سجاير ودخان ؟ / ياراجل سجاير ايه بقالي ساعه معاكم ماحدش ولع سجاره (ولا واحد فينا كان فعلا بيدخن )
وبعدين راح قايل العبارة الصدمه اللي حولت موقفنا 180 درجه قال ياجماعه ( بتعطيش الجيم ) انا شايف كده انكم عايزين تزحلجوني ( تزحلقوني) م الاخر كده / سكتنا / قال بصوا دخان عسل ابيض جرد ( قرد ) انا ما ماشيش واصل (ابدا)
وراح فاتح الشنطه بتاعته ومطلع جلابية بيضا او كانت في يوم بيضا وراح مغير هدومه وقالي يا طامر (تامر) بدون اي القاب ) فين الاوضه اللي هاجعد فيها ؟
المهم على زي الساعة 8 بليل في نفس اليوم وقبل ما يكمل اربع ساعات معانا كان عمرو السويسي معقده ف الجلابية البيضا او اللي كانت بيضا راح جايلي / ياطامر / نعم / تعرف المحلات دي اللي بيبيعوا فيها جلاليب / خدته ونزلنا التجاري وهناك اقنعته ان البجامات اريح واحسن ورحت منقى له بيجامه لونها طوبي لذيذه وعليها خطوط وكتابه بالابيض ورجعنا الشقه وهوا اتكسف يلبس البيجامه / يابني ربنا يهديك / طيب انت جاي من سفر خش الحمام وغير هدومك والبس البيجامه المهم دخل الحمام من هنا ورفاق السوء خدوا الجلابية وخفوها فين الله اعلم ؟وبقى امر واقع البيجامه الطوبي
وتعبت ونمت وعلى حدود الساعة اتنين الفجر لقيت هاتف بيصحيني م الغيبوبه
هانجولك (بقولك ) يا طامر الدلابية بتاعتي فين راحت؟
دلابية ايه؟ / انا سألت كلهم جالولي انت اللي تعرف / دلابية ايه يابني؟ / ياراجل عيب عليك اصحى كده وشوفلي الدلابية فين ؟ / طيب ماينفعش ندور عليها الصبح وكنت بدأت افوق واستوعب / ياراجل بجولك ما داينيش نوم في البدامه دي / خرجت الصاله وعمال اتأمل مين ده ؟
وهوا عمال شغال / يا واااااااااااااااااحد(ده تعبير كان دايمايقوله بمعني ياربي او رحمتك يارب من العالم دي) .... ياعم اديني الدلابية عاوز انام والسؤال لسه بيتردد مين ده؟ والله ما كنت فاكره / طب انت رميتها ؟/ هيا ايه ؟ / الدلابية ؟ /
الجلابيه ؟ طيب سالت عمرو ولاشريف ؟ / كلهم قالولي طامر / ياولاد ال..... / وكان جمبنا شقه على اليمين فيها طلبه من المعهد الفني الصناعي بيقضوها سهر للصبح لقيت اتنين مطلعين رقابتهم م البلكونه وبيقولوا اديله الجلابية يااخي قلبتوا دماغنا والشقه اللي ع الشمال لقيت صوت تخين اوي شبه صوت المعلمين بكسر الميم جدع انت وهوا اتلموا بقى بدل ما اجيلكم وصاحبنا شغال الدلابية الدلابية الدلابية
فجأه افتكرته انت اللي الدكتور جايبك تقعد معانا ؟ / لحظة سكوت منه / افتكرتك انت اسامه مين اللي مزعلك ؟
يا وااااااااااااحد
والله كانت ايام حلوه صاحبي وحبيبي اسامه ولو تعرف تتصل بيا او تبعتلي ايميل
اصل احنا صحوبيتنا كانت قبل الموبايل والتليفونات والجلاليب والبيجامات والانترنت ايام ما كان الراجل راجل والصعيدي صعيدي والاصحاب اخوات واكتر

رد: يلا نضحك ع بعض