|
رد: الفرق بين اسبرانزا ولانسر
D2 r2ik y2 b2sh y2 r2it m2 te3mamsh
th. |
رد: الفرق بين اسبرانزا ولانسر
فرق في السرعات سيدي الرئيس
لانسر ولا اسبرانزا اكيد اللانسر احسن بكتير الاسبرانزا سمعت فيها كلام كتير زي ماتكون خارجه من مليون مصنع 4 معارف جايبنها واحد بس بيشكر فيها و الباقي بيشتموا فيها و كل واحد عنده عيب مختلف الباب بيزيق لا حساس ايه الازاز مش بيفتح محدش بيفهم فيها ولا حتى التوكيل بس في الاخر دي عربيه مش واحده قريبتي و انا مالي العربيات نادر ما تلاقي 2 بيتفقوا على عربيه طب سمعت واحد صاحبي اتقلب بمرسيدس علشان المقص طار من العربيه و سمعت ان متور لانسر 2007 فوت بعد شهر من شراها عادي يعني يا رجاله بس لانسر ولا اسبيرانزا يبقى لانسر طبعا |
رد: الفرق بين اسبرانزا ولانسر
لانسر طبعا ياباشا انا حمايا(ابو مراتى ) راح معرض يتفرج عليها وهى لسه جديدة ما اشتغلتش (زيروووو) بيفتح الشنطة ويقفلها مرتين تلاته كده يجربها الشنطة علقت فى الفتح والقفل وصاحب المعرض قاله ماهى فيها عيوب صناعة كتيره اتكل على الله وهات لانسر يا شيخ بلا اسبرانزا بلا قرف وكفايه ان مالهاش قطع غيار فى السوق يعنى لازم تروح التوكيل بها عشان اى قطعة غيار وطبعا الدفع فى التوكيل ما بيكونش دفع عاى دا دفع رباعى ههههههههه ptmnlo123per172 |
رد: الفرق بين اسبرانزا ولانسر
بالنسبة للاساتذ اللى بيسأل كلامى هيكون موجه لحضرتك فقط ومش عايز ادخل فى اى مناقشات غير موضوعية مع احد
مينفعش اقولك لانسر ولا 516 لانهم نفس الفئة اللترية ونفس الحجم ونفس درجة الصالون والاختلاف فى بلد الصنع(يابانى او تجميع مصرى لانتاج صينى) والسعر والسعر طبعا عارفين ان الانسر بتتباع فى مصر اغلى من تمنها بكتير تمنها الدولى اقصد ال516 بتتباع قريب من تمنها الدولى بس متشال منها حاجات زى الاير باج وفتحة السقف والسنسور الخلفى نيجى بقى للقرار بتاع الشراء اللى هوا راجع ليك اساسا : توافر قطع الغيار : الاتنين موجودين فى شارع دمشق واسعار قطع غيار ال516 انا اعرفها لانى راكبها وصلت لاسعار اقل من الدايو بكتير الان امثلة لل516 : فانوس امامى = 200 او 340 جنية التوكيل = 800 جنية فانوس خلفى = 280 جنية التوكيل = 450 جنية سير كاتينة = 120 جنية التوكيل = 360 جنية طقم نيل = 70 او 80 جنية التوكيل = 285 جنية على فكرة هى نفس الجودة انما فرق سعر التوكيل محدش عارف اية مبررة كالعادة التوكيلات فى مصر اخر تخاريف امثلة للانسر : للاسف معنديش وممكن احد ملاكها يقولولك امثلة علشان تعرف الاسعار نيجى بقى للشهرة وخبر الميكانيكية فى الاصلاح: الانسر طبعا تتفوق فى النقطة دى بكتير نيجى لنقطة الاداء لو كنت من محبى السيارات القوية : محرك ال516 1600 سى سى 2 كامة علوية فتيس عادة قدرة 108 حصان عند 6000 لفة فى الدقيقة عزم دوران 144 ن . متر عند تقريبا 4200 لفة فى الدقيقة معامل انضغاط = 10 معدلات التخفيض بتاعت كل غيار كانت معايا بس مش فاكر وديتها فين وهى عموما جيدة جدا على الغيارات العالية محرك الانسر الشكل القديم مش الجديدة ال1500 الشارك 1600 سى سى كامة علوية واحدة منفردة فتيس عادة قدرة حصانية = 105 حصان عند 6000 لفة ايضا العزم = 138 ن.متر عند 4500 لفة فى الدقيقة معامل انضغاط = 9 يعنى من الاخر محرك ال516 الصينى المصنع فى مصنع AVL اقوى واحدث وكفائتة اعلى حراريا ( مش سخونة ) دة مصطلح بيعبر عن كفائة المحرك ! وبيعبر عنه معامل الانضغاط كلما زاد معامل انضغاط المحرك كلما زادت كفائتة الحرارية وكلما زادت الكفائة الحرارية معناه انك لما تحرق هنا لتر بنزين هتاخد بية قدرة اكبر من لو كنت هتحرق اللتر دة فى محرك الانسر ! دة ببساطة قوى وبدون فنيات نيجى بقى لوزن السيارتين وهما بدون ركبا : ال516 = 1220 كجم يعنى كل حصان بيجر حوالى (11 كجم من وزن السيارة الفارغة ) الانسر = 1115 كجم يعنى كل حصان بيجر حوالى (10.5 كجم من وزن السيارة الفارغة) الوزن الاعلى افضل للثبات على السرعات بس فى نفس الوقت لازم يقابلة زيادة فى قدرة المحرك وهوا دة اللى حاصل فعلا ! التسارع = السحب : ال516 عزمها اكبر من عزم الانسر وعند عدد لفات محرك اقل يعنى الطلعات هتكون لصالح ال516 والقدرة الحصانية لكل كجم لصالح الانسر ووخللى بالك الكلام دة كلة فروقات اجزاء من الثانية والموضوع فى الاخر بيفرق فى مهارة السائق مش اكتر انما نظريا على الورق والحسابات ال516 هتتسارع فى وقت اقل من الانسر نيجى للكاوتش والجنوط : نفس الجنط 15 بوصة مع اختلاف مقاس الاطارات حاجة بسيطة ال516 : كاوتش واطى رياضى 195/55/15 الانسر : كاوتش اعلى شوية علشان يحسسك بالراحة 195/60/15 نيجى للتجهيزات : الفرامل : ال516 : ديسكات امامى وخلفى + ABS + EBD الانسر : ديسكات امامى فقط وخلفى طنابير + ABS فقط واعتقد انه مش نازل فى كل الموديلات دى مش مأكد منها التكيف : الاتنين فيهم نفس سعة التبريد ونفس سعة الكباس تقريبا فروقات بسطة لصالح ال516 بس بسيطة الاير باج : ال516 : التوكيل التعبان وهوا بيجمعها شال منها ايرباج السائق والراكب الامامى للاسف على الرغم من انها اساسى خارج مصر فيها ايرباج لانسر : فيها ايرباج للسائق والراكب الامامى الاوبشنز بقى : من غير ما اتكلم ال516 فيها اوبشن عالى جدا جدا جدا : انذار مفتاح ريموت ماكينة رفع الزجاج فتح الشنطة من الريموت الاريال بتاع الراديو موجود فى الزجاج الخلفى زى معظم السيارات الالمانية يعنى عمرة ما هيبوظ ولا يتكسر ولا يتسرق الفوانيس الاماية بها موتور بتحكم داخلى للسائق فى ارتفاق الانوار الامامية شبورة امامى وخلفى كاسيت جاااامد جدا بس سماعاتة الخلفية تعبانة وعايز تغير لو انتا بتحب الصوت العالى انظمة امان لفصل كهربة السيارة وفصل كهربة المحرك لمنع السرقة حتى لو تم قطع سارية الانذار انظمة حماية للبطارية السيارة بتفصل كل كهربتها بعد 3 دقايق لو انتا ناسى كل الانوار مفتوحة وغيرها كتييييير الانسر : طبعا اكيد اصحابها هيحكو عنها احسن منى بكتير لان فى تفاصيل فى الاوبشن مش بتبان غير للمالك وللى راكب العربية فعلا فياريت لو حد من ملاك الانسر يوصف لحضرتك اهم الاوبشنز الىل عجباه ومهمة اه نسيت اقول لحضرتك ان ارقام مواصفات الانسر انا جايبها من كتالوجها ومن وكيلها المعتمد فى مصر ! كدة اعتقد اكون غطيت لحضرتك معظم الجوانب ولو فى اى استفسار اخر انا تحت امرك وربنا يهديك لقرار كويس ومناسب ليك وللمبلغ اللى معاك ان شاء الله وياريت بلاش اى تعليقات غير مجدية على الموضوع لان كدة احنا هنشتت الراجل مش هنساعدة وكل واحد يتكلم يفتكر انه بيكون سبب فى ان صاحب الاستفسار ياخد قراره فا ياريت نتقى الله فى اللى بنقوله |
رد: الفرق بين اسبرانزا ولانسر
شكرا ليك يا استاذ عبده على التقييم الكامل للعربيه ....
بس في استقسار من حضرتك و اكيد برضو حيفيد صاحب قرار الشراء العربيه بقالها مع حضرتك اد ايه ؟؟ ووجهه نظرك في اعتماديتها مع الاستخدام ... و جوده الخامات و المكونات والتقفيل المحلي ؟؟ وربنا يباركلك فيها ويديك خيرها و يكفيك شرها وشكرا مره تانيه |
رد: الفرق بين اسبرانزا ولانسر
العربية معايا من شهر 8 2007
والحمد لله حتى الان مفيش اى اعطال او سخافات العربية عملتها معايا بخلاف اخرام الكاوتش من شوارعنا النظيفة وكسر الزجاج الخلفى علشان الشباب كانوا بيهزروا مع بعض بالطوب والحمد لله على كدة وفى برضو خبطة من ميكروباص ترامكوا على السريع كدة واتعملت فى الحرفيين والحمد لله الصنيعية هناك قالوا ان صاجها هايل ومحمل ! وبالنسبة لجودة الخامات حتى الان جيدة ومفيش حاجة باظيت ولا التابلوة ساح من الشمس زى ما الناس كانت بتقول على العربية ههههههههه ! وبالنسبة للتقفيل المصرى .............. للاسف دة اكتر حاجة منزلة من قيمة العربية للاتى : اولا الوكيل وهوا بيجمع شال منها حاجات كتير بتنزل اساسى زى الاير باج والسنسور الخلفى ومثبت السرعة ثانيا التجميع نفسة كان فية مشاكل فى موديلات 2006 و 2007 وكلها ليها علاقة بالفنيش الغير جيد فى التربيط وخلافة وتم حل المشكلات دى فى الموديلات التالية 2008 و 2009 وتمنها ارتفع حوالى 5000 جنية التوكيل هوا اسواء ما فى العربية ولكن الحمد لله الان قطع غيارها موجود فى شارع دمشق ورخيصة وزى الفل وكمان الصنيعية عرفوها شوية وفى كام واحد بقى بيفهم فيها وفى صيانتها جيدا ملاك الاسبيرانزا يعرفوهم وبتعاملوا معاهم بعد خروجهم من التوكيل بس كدة والعربية ممتعة جدا جدا جدا واحلى حاجة فيها السفر اخر راحة والحمد لله اه حاجة كمان بالنسبة للناس قصيرى القامة ( القصيرين يعنى ) هيتعبوا شوية من ابعادها والشنطة الخلفية المرتفعة عن مثيلاتها وهيتأقلموا معاها بعد حواىل 2000 كم على طول |
رد: الفرق بين اسبرانزا ولانسر
اسم الموضوع استفزني بصراحه وحبيت ارد لاني امتلك الانسر 2005 1300 اتوماتك واسبرانزا 2008 1600 مانوال,, واكيد فيه فرق بين الاتنين والاسبرانزا فيها عيوب بس مش زي ما بنسمع انها بتسيح وتعطل وتفرقع وكده بالنسبه للسفر السرعه الاسبرانزا تتفوق في السرعه القصوى يعنى بتجيب سرعات عاليه ببساطه ,, لكن الثبات الانسر احلى والاسبرانزا ممكن تتمرجح في اي موجه على الطريق على السرعه العاليه الا لو كانت محمله ,, الفرامل المفاجئه الاسبرانزا طبعا بتعمل مغناطيس في الارض ودا عشان الاي بي اس ,, بالنسبه للراحه الداخليه الاسبرانزا الكرسي بتاعها ضخم شويه ومش متعب خالص في قاعدته اما الانسر فكرسيها تحس انه معمول بالمقاييس وبرضو مريح ,, عزل الصوت انا كنت فاكر ان الانسر عزلها وحش لاني كنت بقارنها بالكرولا لكن لما جبت الاسبرانزا حسيت بنعمة الانسر لان الاسبرانزا عزل الصوت فيها رديء جدا وتسمع اي حاجه في الطريق داخل البلد بالنسبه للطلعه الاولى للسياره من اشاره مثلا او مطب الانسر تتفوق لان الاسبرانزا نيه ولازم تدوس لها بنزين عالي عشان تديك الطلعه المطلوبه ودا لان دواسه البنزين بتاعة الاسبرانزا بالكهربا وفيها حساس متحكم في الدوسه انا شايف انها لو وير عادي كانت هتبقى احلى بكتير ,, التكيف الاسبرانزا لو الطبلوه بتاعها سخن من الشمس مش هيسقع تستنى ربع ساعه كده لما يبرد لكن الانسر مش بيفرق معاها الطبلوه سخن ولا ساقع لكن لو بليل او مكنتش راكنها في شمس هتلاقي الاتنين زي بعض ,, المطبات لو الطريق فيه حفر ونقر ودبش يبقى الاسبرانزا مش هيعجبها الوضع وهتسمعك حاجات مش كويسه وخاصه من الدركسيون الي لسه ما عملوش ليه تعديل لغاية دلوقتي لكن الانسر هتتهز في المطبات ومش هتسمع حاجه بمقارنه مع الاسبرانزا لكن الاسبرانزا ناعمه جدا في المطب الصناعي العادي الي مافيهوش رزع واعتقد دا عيب الطرق بتاعتنا لان حاسس ان الخواجه الصيني صمم الاسبرانزا انها تمشي على طريق مسفلت محطش في دماغه الحاجات الي عندنا ولو مش عاوز تسمع صوت المطبات في الاسبرانزا امشي براحه خالص في المطب هتلاقيها ناعمه وكويسه جودة الخامات الانسر مافيهاش غلطه في خامة التصنيع لكن الاسبرانزا حاجات وحاجات فمثلا الطبلوه حلو قوي من فوق ومحمل لكن تنزل تحت عند الدواسات كده وخاصه الجزء الي خلف الكاسيت هتلاقيه ورق لكن الصفه العامه كوس وخاصه انهم عاملينه من خامه جيده في الاجزاء الي انت ممكن تتعامل معاها ,, الزراير هي خفيفه في استخدامها بس شكلها كويس ومش بتعمل مشاكل او تهيس ,, فرش الباب في الاسبرانزا حلو ومحمل ,, زراير التكيف في الاسبرانزا رديئه جدا يعني لازم تلبس قطن في ايدك قبل ما تدوس وانا شايف ان زراير الكاسيت احلى بكتير وانهم كانو المفروض يبدلو زراير الكاسيت بدل التكيف علما بان تكيف الاسبرانزا تتش ,, الكشاف الي ورا بذات رديء هوا التاني لو حد سند عليه ممكن يتكسر في الاسبرانزا لكن الامامي جامد ومش بيتكسر بسهوله حتى مع الحوادث العمر الافتراضي الانسر بغير فيها حاجه مش بتعطل تاني طبعا معمره ,, الاسبرانزا الله اعلم هي لسه لغاية دلوقتي مفيش حاجه اتغيرت لانها اجدد الاعطال مفيش نظره عامه الانسر المفروض ما نتكلمش عنها لكن الاسبرانزا مضمونها جيد فيها بعض الحاجات الي اصحابها عارفينها وتاقلمو معاها زي علبة الدركسيون ودبدبة العفشه خامات مش كويسه في بعض الاماكن منها وانها نيه شويه وكده واعقد ان سعرها القليل يشفعلها اننا نتغاضى عن الحاجات دي وخاصه انها عربيه لما بتقصدها في مشوار اي كان مش بتقول لا وتتكسر وتسيح ولا تعطل ولا عجلها يفك من مكانه واي حد يقول كده مش صحيح خالص ولو حد واثق من عكش كده يصورلنا العربيه المكسوره الي بتسيح ويوريهالنا عشان نصدقه وفي الاخر ما ينفعش نقارن بين واحد في 6 ابتدائي بواحد في 3 ثانوي ونقول زي بعض لكن ممكن نقول الي في 6 ابتدائي مجتهد ومستقبله احسن وكويس قوي ان الصين قدرت تعمل منتج زي دا في عدد قليل من السنين ويخلو الناس تضرب اخماس في اسداس والكلام الغلط الي بينتقد بيه العربيه دي في صالحها مش ضدها ودا شيء كويس ليها وخاصه ان معظم الكلام عنها غلط وهتثبت مع الايام انها مش كده وهتبقى جديره بالاحترام ,فاي حد عاوز ينقد العربيه دي عشان تبقى وحشه في عين الناس يدور على حاجه غير انها بتسيح وتتكسر ptmnlo123per122 |
| الساعة الآن 11:46 PM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017