|
رد: أزاى تعمل نظام صوت صح وميتضحكش عليك؟
مشكور على المجهود الرائع...............
|
رد: أزاى تعمل نظام صوت صح وميتضحكش عليك؟
اقتباس:
أنا ياباشا عندى الكينوود منه صب 1200 وات, وسماعات 350 وات على ما أذكر, الصوت حلو مش وحش, بس مش اللى هو, البايونيير أحسن من كينوود, والسونى متنازع عليها وناس بتفضلها وناس لأ, بس أن مقلتش أن كين وحشة, بالعكس السماعات كويسة والبيز بتاعها بيبقى بيهز الباب, بس مش اللى هى برضه, ومش عارف ليه عندى أحساس أنهم هيبوظوا من الشمس:(, ده غير أنك تبص عليها تلاقى الصمغ اللى لازقين بيه حواف الرق باين, سواء الصب أو السماعات وده مضايقنى قوى. أما الصب فأنا مشغلها فى البيت, واللى هيجننى أنها شغالة زى الصاروخ على أمبليفاير 15 وات ماكس, بس هى 4 أوم والأمب 8 فتقدر تقول هى شغالة على 30 وات أو أكثر شوية, وبتبهدل الدنيا, وده أنا مستغربله جدا وحاسس أنها لو أشتغلت على أمب أقوى هتنفجر:), بس لما الميزانية تظبط هجرب. الموضوع مجرد تفضيل شخصى لا أكثر, ممكن شخص تعجبه البايونيير أكثر من الباقى, وشخص بيموت فى السونى, وشخص السيمفونى عنده أحسن من غيرها, بس كده لا أكثر. و@ snoop ال rms هو وات ياباشا برضه, لكن الوات الكبير اللى بيبقى على العلبة بيبقى أقصى وات السماعة تقدر تشتغل بيه لثوانى معدودة, دبة بيز مثلا, أما ال Rms بيبقى الوات اللى السماعة تقدر تشتغل عليه على طول بدون ضرر ليها أو صوت سئ, وهو اللى بيحدد بنسبة 80% أذا كانت السماعة تستحق الشراء ولا لأ, و10% للماكس وات, والباقى لحاجات تانية أرذل ومالهاش لازمة فى بلدنا. وألف شكر لكل من مر وعلق أو شكرنى على الموضوع المتواضع, ربنا يكرمكواROSE4U |
رد: أزاى تعمل نظام صوت صح وميتضحكش عليك؟
الف شكر يا انجكشن والله انت فنان ربنا يوفقك فى امتحاناتك يا جميل
|
رد: أزاى تعمل نظام صوت صح وميتضحكش عليك؟
باشا واللة انتا باشا ومفيش زيك انا قريت مواضيع كتير قبل كدة علي الصوتيات واكتريتهم مكنتش بفهم منهم حاجة من كتر المصطلحات الغريبة بس انتا مفسرلنا كل حاجة وانا واللة من جمال الموضوع قريتة كلة لحد الاخر واستفت بمعلومات كتيرالف شكر لحضرتك بجد
وانا كان ليا سؤال بعد ازنك انا معايا عربية ابيزا وهيا فاضية خالص بس انا معايا صب اكسبلود بس مفيش كاسيت ولا سماعات ولا امب فير ولا حاجة ومعايا 1000 جنية ومش عارف اجيب اية بمعني اصح مش عارف اوفق كل حاجة مع بعضها زي الامب والكاسيت والسماعات فياريت لو تفيدني ومرة تانية الف شكر لحضرتك علي الموضوع الهايل |
رد: أزاى تعمل نظام صوت صح وميتضحكش عليك؟
اقتباس:
ألف شكر ياباشا على كلامك الجميل, ربنا يكرمكROSE4U. دلوقتى أحنا قولنا الأنظمة اللى الواحد يقدر يعملها ملهاش عدد, فهنفضفض مع بعض شوية. دلوقتى حضرتك محتاج هيد يونت, كاسيت يعنى, لو حضرتك عايز حاجة حنينة وكويسة, فى موديلات متعددة من بايونيير وكينوود وسونى, فى حدوود من 500 الى 650 جنيه,و ومميزاتها كتير, وفيها مخرج للأمبليفاير. وعندك البايونيير ال 2150ub أو ال 3250 وده فى حدود 550 الى 600 جنيه وال 3150 وده أغلى شوية فى حدود 650 والموديلات كتير, بس أبقى فاصل كويس ولف شوية على المحلات. وفيه الكينوود اللى بينزل مع الشيفروليه اللانوس الجديدة, ده رخيص وكويس بس البايونيير أفضل فى رأيى, وفيه الرودستار بتاع الفيرنا كمان. فدلوقتى يفضل حاجتين, ممكن تجيب طقم سماعات بيضاوى نضيف فى حدود 300 وات فى حدود 250 جنيه من الماركات السابق ذكرها, ولو فى مكان فى الباب لسماعات تانية هتجيب طقم مدور فى حدود 200 وات أكثر شوية أو أقل سنة, ودول هيعملوا فى حدود 150 جنيه حسب المحل والوات والنوع, وهيركبوا على الكاسيت الجديد.. بس كده مش هيفضل فلوس تجيب بيها أمبليفاير للصب, بس هتسمع من الكاسيت والسماعات صوت نقى وكويس جدا والبيز هيسمع فى العربية. فلو فضل معاك فلوس للأمبليفاير, هتتضطر للأسف تلجأ للمستعمل علشان تجيب أمبليفاير للصب لو عايز تشغلها, وهتجيب أمبليفاير فى حدود 300 الى 600 وات قناتين علشان تركب الصب على القناتين. وعندك من كينوود ال 350 وات القناتين ده كويس قوى http://i.seimg.net/images/15501/main/kac5203.jpg أو جى أم سيمفونى 600 وات 2 قناة دول سعرهم حنين ويشغلوا الصب كويس والتحكمات اللى فيهم فى البيز هتنفعك. بس خد بالك لسه السلوك ومصنعية التركيب, وصندوق الصب كمان هيعمل لوحده حوالى 120 جنيه على الأقل لو كويس. وربنا يوفقك, وياريت اللى عنده رأى أخر أو معلومة زيادة يتفضل. |
رد: أزاى تعمل نظام صوت صح وميتضحكش عليك؟
وحاجة تانية ياباشا, النظام الصوتى قوته بأضعف حاجة فيه.
يعنى مثلا لو معايا أمبليفاير بيطلع 600 وات وصب 2000 وات, كده أنا كاتم الصب بقوة الأمبليفاير فقط ومش هقدر أشغلها بكل قوتها. ولو عندى نفس الأمب وسماعات 200 وات, مش هقدر أعلى الصوت عن درجة معينة علشان السماعات هتخروش من القوة لأنها ضعيفة. وفى الحالتين اللى بيحكم النظام الصوتى هو المكون الضعيف فيه, سواء الأمب أو السماعات. فى حالة حضرتك, الكاسيت هيكون بيطلع فى حدود 60 وات , السماعات اللى تركب عليه وتشتغل كويس تبتدى مثلا من 180 وات الى 400 وات, لكن هتيجى عند حد معين والزيادة فى الوات مش هتفيدك بحاجة, لأن خرج الكاسيت ثابت وعلشان كده الناس بتجيب أمبليفاير. بالتالى السماعات الكويسة أحنا قلنا هتبقى فى حدود 200 الى 300 وات علشان تاخد أكبر أستفادة منها بدون ماتصرف على الفاضى, بس ممكن أكثر طبعا وهتشتغل كويس. أما بالنسبة للصب, فحضرتك مذكرتش أى معلومات عنه, لكن هيبقى فى حدود 1000 وات, بالتالى محتاج أمبليفاير بيطلع حوالى 800 وات أو أكثر علشان تشغل الصب كويس جدا. الأمب ال 350 اللى ذكرته يقوم بالواجب, والسيمفونى ال 600 كويس وهيقومه, وهكذا ممكن أزود قوة الأمب بس مش هستفيد حاجة, ولو جبت أمب قليل قوى مش هستفيد بقوة الصب. أرجو أنى أكون وصلت لحضرتك جزء من فكرة التوفيق بين المكونات وبعضها, ولو عندك أستفسارات طالما فى حدود علمى أنا تحت أمرك. |
رد: أزاى تعمل نظام صوت صح وميتضحكش عليك؟
الله ينور عليك
ممكن تعملنا تركيبة كده من عندك تكون كويسه من جميع النواحي ماديا وصوتيا" كمان لو ينفع تقولنا ايه انواع الكاسيت ( اللي بيجي مع العربيه ) ممكن نركب عليه سماعات جديده مثلا" الهوندا سيفيك الكاسيت بتاعها الاصلي حرام اشيلو وركب كاسيت تاني ده بخلاف ان بعض العربيات الكاسيت بتعها ماينفعش يتشال وشكرا" |
| الساعة الآن 08:59 AM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017