مصر موتورز مجتمع السيارات - أخيرا جبت Proton Gen.2 2010

مصر موتورز مجتمع السيارات (https://www.masrmotors.com/vb/index.php)

- بروتون PROTON (https://www.masrmotors.com/vb/forumdisplay.php?f=40)

- - أخيرا جبت Proton Gen.2 2010 (https://www.masrmotors.com/vb/showthread.php?t=39963)

رد: أخيرا جبت Proton Gen.2 2010

اقتباس:

المشاركة الأصلية كتبت بواسطة elmanahry (المشاركة 294291)

الف مبروك وربنا يحافظ عليك المهم ليس اخبار السرعة للسيارة اخبار التسارع اهم يعنى العربية تسعفك وانت بتعدى عربية تانية لان جيل السيارات القادم نازل بفتيس 6 سرعات من اجل تحقيق تسارع اعلى وشكرا جزيلا

هو من ناحية التسارع..هي الحقيقة العربية ما شاء الله ممتازة..يعني ال 100 كم/ساعة بتوصلها في حوالي 13-14 ثانية. و المحرك الCAMPRO IAFM حل الحتة المزعجة بتاعة الموديلات الCAMPRO الأقدم و هي إن العربية كان العزم بتاعها بينخفض بعد ال2500 RPM ولغاية حوالي 3700 RPM بشكل ملحوظ فعلا بالذات في الأوتوماتيك و أنا كنت بلاحظ في عربيات صحابي الCAMPRO النقطة دي. دلوقتي كل زيادة البنزين لغاية ال3000 RPM معاها في زيادة في التسارع.

وعلى فكرة المصنعين بيكترو غيار السرعات عشان السرعات العالية تكون موفرة للوقود و أخف أكتر على الموتور. التسارع بيبقى في الغيارات لغاية التالت كدة عشان في الغيارات دي العربية بتبقى بتستفيد من العزم أساسا مش السرعة.

رد: أخيرا جبت Proton Gen.2 2010

تحديث لاستهلاك البنزين:
بعد مشاوير كتيرة متنوعة (550 كم) في مدينة نصر و مصر الجديدة و الدائري و المحور و كوبري 6 أكتوبر و صلاح سالم و طريق النصر عداد متوسط استهلاك البنزين بيتراوح دلوقتي بين 6.4 و 6.5 لتر/100 كم

رد: أخيرا جبت Proton Gen.2 2010

تحديث:
العربية عاملة دلوقتي 780 كم فكلمت صيانة عز العرب اللي في الصحراوي عشان أحجز صيانة ال 1000 كم يوم الأربعاء القادم. إن شاء الله أكتب تقرير لما أخلصها.

رد: أخيرا جبت Proton Gen.2 2010

أدي تقرير صيانة ال1000 كم زي ما وعدت:cool::

أنا لما حجزت معاد الصيانة قالولي تعالى بعد 9:30ص. أنا وصلت عموما 10:10ص نظرا لإن الطريق كان بطيء شوية عشان الشبورة.

أنا لما وصلت لقيت الأمن بيسألني عن إن كان في حجز فقولتلوا علي الحجز بتاعي و لقاه و دخلني أقف في مظلة للعربيات اللي في الاستقبال. دقيقة و مهندس الاستقبال جالي و عرفني بنفسه (اسمه محمد عبد الهادي) رحب بيا و سألني عن العربية عاملة إيه معايا.

ده حوار الاستقبال:
أنا: متهيألي الدريكسون ليه صوت غريب شوية لما بتلف و إنت جاي تخرج من ركنة مثلا
المهندس: طب خلينا نجرب
(جربتها)
المهندس: مفيش صوت غريب. هو الصوت اللي قصدك عليه ده بيجي و إنت ماشي كمان؟
أنا: لأ بس و أنا جاي أخرج من ركنة يعني بتحرك من وقوف.
(جربتها تاني)
المهندس: هو ده الصوت اللي قصدك عليه؟
أنا: أيوة.
المهندس: ده صوت طبيعي و مفيهوش مشكلة خالص. ده صوت تحريك الباور للعجل و إنت معشق علي ال D و لسة مامشيتش.
أنا: طيب تمام أنا قلت بس أتأكد.
المهندس: إيه كمان؟
أنا: هو و أنا ماشي هادي و كبست الفرامل لغاية الآخر بسمع صوت تكه جامدة كدة. هو الصوت ده برضه عادي؟
المهندس: الصوت ده و إنت لسة ماشيلتش الغيار من الD؟
أنا: أيوة
المهندس: حضرتك تقريبا معظم سواقتك عربيات مانيوال مش كده؟
أنا: المعظم أيوة بس سوقت أوتوماتك في عربيات قديمة شوية (تسعينات)
المهندس: ده برضه صوت طبيعي. الصوت ده صوت فصل الفتيس لما الفرامل تتكبس لغاية ما العربية تقف و إنت لسة على الD. في إيه كمان؟
أنا: السنتر لوك شغال بالمفتاح علي كل الأبواب بس بالريموت علي البابين الورانيين بس.
(جرب و إتأكد)
المهندس: تمام هنضبطه. صيانة ال1000 بتخلص بسرعة بس التضبيط ده هيأخد وقت شوية.
أنا: مفيش مشكلة.
المهندس: في إيه كمان؟
أنا: متهيألي الرشاش بتاع المساحة الورانية مش شغال و المساحة بتشتغل على الناشف بس.
(جرب)
المهندس: شغال. بص حضرتك المساحة الورانية بتشتغل من غير مية لما تدور المفتاح لتحت. لو عاوز ترش مية دوره لفوق و كدة الرشاش و المساحة هيشتغلو مع بعض.
المهندس: حاجة كمان؟
أنا: لأ بس كدة.
المهندس: تمام. حضرتك صيانة ال 1000 بتبقى ب200 جنية عشان غيار الزيت و الفلتر. حضرتك خد أي متعلقات شخصية ليك و إتفضل في الاستراحة و إن شاء الله معاد خروج العربية هيبقى الساعة 2:00 و حنتصل بيك على الموبايل أول ما تخرج.

الساعة 1:30 تقريبا كلموني و لقيت السنتر لوك إشتغل تمام وكانت تفاصيل الفاتورة:
156.00 فلتر + غيار زيت
20.00 قطع غيار
17.60 ضريبة 10%

الإجمالي: 193.60

رد: أخيرا جبت Proton Gen.2 2010

حبيت أدي الناس برده فكرة عن إستهلاك البنزين بعد ما عملت صيانة الـ 1000 كم و بقيت أشغل التكييف لما الجو بيبقى حر الظهر.

أنا مليت بنزين (92) من محطة إمارات مصر اللي في الصحراوي و عملت 124.5 كم و بعدين مليت من محطة موبيل اللي جنب بيتي 10.5 لتر. تقريبا 80% من الطريق كنت مشغل التكييف. و الطريق كان شوية على المحور و شوية علي دائري المعادي و حبتين وقوف و مشي بطيء جدا في المهندسين و كوبري 6 أكتوبر و صلاح سالم و 8-9 مرات kick down على الدائري و المحور عشان التجاوز و تفادي العربيات اللي بتقف مرة واحدة بدون مقدمات :mad:. الـ RPM معظم الوقت مابيعديش 3000-3200 ما عدا طبعا في الـ kick down.
لو قسمنا الـ 10.5علي الـ 124.5 و ضربنا الناتج في 100 تبقى النتيجة 8.43 لتر/100 كم. ده متوسط إستهلاك لسيناريو استخدام أعتقد إنه مشابه تقريبا لإستخدام ناس كتيرعشان بس الناس ماتقولش الـ GEN.2 وحش إستهلاك بنزين و الكلام ده.
على فكرة الإستهلاك ده تقريبا نفس استهلاك Hyundai Elantra 1.6 في نفس الظروف علما بأن العربيتين نفس الوزن تقريبا +/- 10 كجم.

رد: أخيرا جبت Proton Gen.2 2010

في نقطة كنت نسيت أقولها في أول الموضوع وهي إن من ضمن الإختلافات الجديدة إن الكاوتش الجديد اللي جاي مع العربية بقى من ماركة Goodyear بدل Silverstone.

رد: أخيرا جبت Proton Gen.2 2010

اقتباس:

المشاركة الأصلية كتبت بواسطة tech_lover (المشاركة 288235)

باركولي يا جماعة. الحمد لله أخيرا جبت Proton Gen.2 أوتوماتيك 2010 بعد انتظار طويل علشان أنا كنت مصر أجيبها كاش.

أنا جبت العربية بعد ما حجزتها من عز العرب فرع مدينة نصر اللي في 35 ذاكر حسين (قريب من إنبي الناحية التانية منها بعد تقاطع عباس العقاد) . سبب الحجز إن كل دفعة الGen.2 اللي كانت في القاهرة كانت خلصت حتى من عند الموزعين زي أوتو ماجد. ده المعرض مكانش عنده Gen.2 خالص حتى بتاعة العرض اتباعت. فأنا كنت بأحجز من دفعة جديدة كانت لسه في الجمارك في النوبارية في إسكندرية و كان قدامها من 20-25 يوم و تيجي القاهرة.

أنا كنت عايز اللون الأحمر و الحمد لله كان موجود أتوماتيك في الدفعة دي. الدفعة دي كان فيها 3 ألوان بس: أسود و أحمر و فضي.

الحجز كان ب 1000 جنيه و الدفعة وصلت فعلا بعد 20 يوم بس كان لسه في ورق بيخلصوه إحتاج 5 أيام كمان.

استلمت العربية فعلا بعد 25 يوم (الثمن الكلي 90900 جنيه و رجعولي ال 100 :)) و تاني يوم جابو الأفراج الجمركي و شهادة البيانات بتاعها من مرور بين السرايات و جه معايا تالت يوم مندوب من عندهم للمرور عشان الترخيص. (المندوب بيتكلف 150 جنيه بس بيخلص الترخيص في أقل من 25 دقيقة). تقريبا الترخيص 3 سنين مع التأمين الإجباري و المندوب و بقشيش اللي ركب النمرة ماوصلش 1200 جنيه.

العربية كان فيها حاجة صغيرة قوي بعد ما استلمتها إن في الباب الأمامي يمين سقاطة الباب فاصلة من السنتر لوك فمخلية الباب محتاج حد يرفع السقاطة بتاعته بالإيد عشان ينفع يتفتح و ينزلها قبل ما ينزل و يقفل العربية بالسنتر لوك. هي مش مشكلة و سهل أوي يظبطوها في صيانة ال 1000 كم إن شاء الله.

المهم العربية ما شاء الله جميلة جدا. أنا ركبت كذا مرة Gen.2 و Persona قبل كده 2006-2007 اللي لاحظتو في ال 2010:
1- العفشة أنعم شوية
2- الفتيس الأوتوماتيك ما بقاش يسمح أنك تروح للR او ال P إلا و إنت دايس على الفرامل
3- الساعة الداخلية بقت رقمية و في عداد الكيلومترات و مفيش الساعة اللي فوق التابلوه.
4- الريموت فيه زرارين و احد لقفل السنتر لوك و تشغيل الإيموبوليزر و الإنذار و التاني لفتح السنتر و الإنذار بأول ضغطة و فتح الشنطة بالضغطة التانية. (قبل كده كانت الشنطة بتتفتح من الرافعة اللي جنب كرسي السائق بس).
5- بقى في درج في التابلوه قدام الراكب اليمين زي العربيات السيدان
6- تحكم الزجاج الكهربائي و السنتر بقى في باب السائق مش ورا الفتيس
7- الشبكة الأمامية و الجنوط شكلهم مختلف.
8- مثبت السرعة Cruise Control مبقاش موجود غير في فئة GSX اللي مابتنزلش مصر.
9- السبويلر الأنيق بقى من المواصفات. قبل كده كان بييجي مع عتبات في Sports
Kit
10- الراديو/CD بيشغل .MP3 قبل كده كان CD بس.
11-فرش الكراسي و الأبواب مختلف.

و دي صور قبل الترخيص:

http://img209.imageshack.us/img209/6...2010029.th.jpg

http://img338.imageshack.us/img338/5...2010030.th.jpg

http://img842.imageshack.us/img842/9...2010031.th.jpg

التغييرات دي أكيد مش كلها أضيفت في آخر موديل بس أنا مركبتش 2008. و ركبت Persona بس 2009.

أنا إشتريت ال Gen.2 على فكرة عن إقتناع تام. كمان أنا كنت مصر على إني أجيب عربية أوتوماتيك فيها ABS مش صيني بس ماكنتش أقدر أعدي ال 100000 جنيه.
أنا كبرت دماغي الحقيقة من موضوع إعادة البيع اللي كل الناس بتتحجج بيه لما ماتعرفش تذم في ال Gen.2. هو الواحد بيجيب العربية تجارة بس؟ فين أهمية الأمان؟ دي كندا و أمريكا و أوروبا و أستراليا مش مكفيهم ال ABS/EBD و في 2011 خلو ال Electronic Stability Control(ESC) / Electronic Stability Program(ESP)) كمان مواصفة إجبارية في كل العربيات و إحنا لسة بنعتبر ال ABS كماليات!!

فين الأستفادة بالمميزات؟ و الناس ساعات تقولك أصل الخامات في الصالون مش قد كدة. هو تعبير "مش قد كدة" ده بيتقال عموما كدةYAKHBR؟ و لا لازم يبقى الكلام بالمقارنة بمرجع معين أو بالنسبة للسعر مثلا؟ أنا شايف الحقيقة إن الخامات أكثر من مقنعة و الإقتصاد كله في التفاهات بس. ما هو برضه ماتروحش تقارن خامات صالون ال Gen.2 بعربية أغلى منها 15 أو 20 ألف جنيه أو أكتر و بعدين تقول "مش قد كدة".

شكر وتقديرالحقيقة أنا عايز أشكر كل الناس المتعاونين جدا هنا في مصر موتورز و بالأخص اللي شاركو في موضوعي السابق:
http://www.masrmotors.com/vb/showthread.php?t=14429
سواء كانوا مع ترشيح ال Gen.2 أو ضده لأن الإختلاف في الرأي لا يفسد للود قضية.

و شكرا على المرور و في انتظار ردودكم.

الف مبروك العربية و ربنا يحفظك و يديك خيرها و يكفيك شرها. أنا كنت عاوز اعرف أخبار العربيه أيه مع المطبات خصوصا لما تكون محمل 3 أفراد ورا على الكنبة؟