رد: محتار بين 131 - 132 - ريجاتا - بولونيز - 504 - 305 - 929 ارجو الافاده
 

افضلهم 131 عربية ناعمة وقطع غيارها متوفرة وطبعا البيجو ال504 افضل بس صعب تلاقي حاجة نظيفة بالسعر دة

رد: محتار بين 131 - 132 - ريجاتا - بولونيز - 504 - 305 - 929 ارجو الافاده
 

أنا شايف أن الميرانية اللى مع حضرتك لو قرصت شوية كمان و زودت كمان 5000 جنيه , ممكن توقعلك واحدة بيجو 505 كويسة و أظن دى بأه حمالة أسية أكتر من أى عربية تانية , دى تديها بالجزTEEEEEEEEEEEEEEET و تقولك كمان .

لكن أنا ضد ال504 الاحلال خاااااااااااااااااااااااا ااالص و كمان قطع غيارها ماعدتش موجودة كتير زى الأول .

و كمان البيجو عموما أفضل من الفيات ال131 و ال132 و هتلاقى قطع غيارها متوافرة أكتر من المازدا .

رد: محتار بين 131 - 132 - ريجاتا - بولونيز - 504 - 305 - 929 ارجو الافاده
 

صديقى العزيز

هاجبلك من الاخر لانى كنت فى نفس موقفك من فترة قريبة

ودلوقتى بعيد الموضوع تانى لانى بعت العربية الى كانت معايا ودلوقتى بدور على عربية تانية فى نفس حدود المبلغ بتاعك

بص ياسيدى
مقاييس شراء عربية فى حدود المبلغ 15-20 الف
1- لازم قطع غيارها متوفرة ( طبعا مش عقل انى ادفع فى قطع غيار عربية موديل قديم جدااا مبلغ كبير )
2- لازم صنايعية كتير بيعرفوا يشتغلوا فيها ( علشان لو صعبة فى صيانتها وعدد الصنيعية محدود هايبقوا غاليين )
3- لازم سعر اعادة بيعها يكون فيها علشان لو حبيت اغير مستقبلا
4- لازم تكون حماله اسيه علشان مش عاوز اجيب حاجة تقرفنى

يبقى اختيارتنا تنحصر فى
1- الفيات
2- اللادا
وارجوك سيبك من الاختراعات التانية دى ( هى مش وحشة انما مش هاتمشى معانا ) مثلا البيجو 504 اولا غالية - قطع غيار غالية - استهلاك بنزين عالى / المازدا قطع غيار مش متوفرة فى كل مكان / صنايعية قليلة الى شاطرين فيها

المهم الفيات بقى عربيات ( 128 - 132-131 - ريتمو - ريجاتا )
128--- مش بعتبرها عربية اساسا
132 استهلاك بنزين عالى - قطع غيار قليلة نوعا -- موديل قديم جداااااااا - شكلها مش اد كده
131 ----- ممتازة فى كل حاجة - قطع غيارها قليلة نوعا انما موجودة --- عيبها موديل قديمم جدااااا وغاليه فى سعرها ( تبقى دافع 19 الف جنيه فى عربية من ايام حرب اكتوبر ) وصعب تلاقى واحده بسهولة حالتها نضيفة
الريجاتا --- ممتازة - عيبها صعب تلاقى عربية حالتها كويسة لانها خلاص

يبقى الخلاصة
فى ماركة الفيات
131 -- انما موديل مثلا من 77-80 وهاتتعب شويه لما تلاقى واحده حالتها نضيفة تعمل من 17 الى 20 الف

بالنسبة الى الادا
موديلات 2016 - 2105 - 2107 - سمارا
2106 ---- الى منتشرة فى مصر تحت اسم لادا 1500 ( الاربعة فانوس مدور ) عربية عبارة عن صخرة متحركة مالهاش حل فى قوتها وقوة تحملها المهم انها ممتازة - عيبها شكلها القديم و موديل قديم جدااا
2105 --- ممتازة كل المميزات فيها ( سعر - صيانه - قطع غيار - بنزين - تحمل - الخخ) عيبها صوت موتورها العالى
2107 -- نفس 2105 فى كل حاجة انما زيادة -- مواترها اقوى واهدى شوية وكراسيها مريحه شويه
السمارا -- خسارة العربية دى فى مصر انما فكك منها لاننا مش ناقصين وجع دماغ

الخلاصة
2105 - موديل من 84 الى قبل 90 تعمل حوالى 16-18 الف حالة ممتازة 1200cc
2105 موديل 94 تعمل من 19 الى 22 حالة ممتازة1200cc
2107 موديل قبل 90 تعمل من 18 الى 20 الف حالة ممتازة 1300-1500cc
2107 موديل 90 لحد 94 من 19 الى 24 حالة ممتازة 1300cc - 1500cc

عن نفسى ارشحلك الادا وانت بقى اختار الموديل

رد: محتار بين 131 - 132 - ريجاتا - بولونيز - 504 - 305 - 929 ارجو الافاده
 

بصراحه مش عارف اقولك ايه كلامك جمع واوفي واوجز وانجز وفحص و محص اقل ما يقال عليه انه كاني قرات ولفيت 6 شهور علي الاقل علشان اوصل لنفس النتيجه
اضيف لمعلوماتك اني ضخم الجثه جدا ةلا اعرف هل الادا تنفع ولا حجمها نفس ال 128
معلش كمل جميلك ووضح المعلومه دي كمان

رد: محتار بين 131 - 132 - ريجاتا - بولونيز - 504 - 305 - 929 ارجو الافاده
 

ياباشا
ماتقارنش ال 128 دى اصلا بالادا

الادا اوسع طبعا وبالذات لو رجعت كرسى السواق لورا شويه وهاتحس بالفرق وانت راكبها عن وانت راكب 128

رد: محتار بين 131 - 132 - ريجاتا - بولونيز - 504 - 305 - 929 ارجو الافاده
 

السلام عليكم اخي الكريم بصراحه انا برشحلك فيات 131 لانها عربيه قويه وتستحمل المشاوير الكتير واقتصاديه في استهلاك البنزين . انا كانت عندي عربيه 131 موديل 79 وكانت ممتازه وعاليه عن الارض يعني متقلقش من المطبات كنت اشترتها ب 26الف جنيه من حوالي 8سنوات وفضلت معايا 3 سنوات وكانت ممتازه وقطع غيارها عند البقال واي حد بيشتغل فيها لكن ابيجو انا مش بفضلها علي الرغم من سمعتها وقوتها المعروفه بس من وجهة نظري الفيات اشيك وفي الاخر صلي صلاة استخاره وانشاء الله ربنا يوفقك وتختار العربيه الي ربنا كتبهالك

رد: محتار بين 131 - 132 - ريجاتا - بولونيز - 504 - 305 - 929 ارجو الافاده
 

نسيت اقولك من حبي في ال131 اختارته مع اسم الدخول الخاص بي