رد: مشكلة خطيرة
 

معلش ممكن توضيح اكتر ..
يعنى انت صلحت الريداتير ولا لسه بيجيب ميه ؟؟ .. ويعنى ايه تخلى العربية تخس .. تعملها ريجيم يعنى ههههههههه ..

وطمنى اخبار الفتيس ايه ؟؟

رد: مشكلة خطيرة
 

بص ياباشا انا روحت لميكانيكى قالى العربية كموتور سليم وجوان وش السلندر بسيط ،، وان السخونية اللى فى العربية علشان الميل بتقل وبتنزل من شرخ الريادتير
روحت لواحد بتاع ريادتير قالى دة مصلح ميت مرة قبل كدة واشترى واحد جديد بدل ما ادفع مصنعية تصليحة على الفاضى
وجبت ريادتير جديد ،، والعربية دلوقتى بقت كويسة مش بتسخن وجربتها فى مشواير طويلة
بس اللى بيحصل نهاية كل اسبوع بقالى المية قلت بتاع من 3-5 لتر
مع انى جربت فى مرة روحت بيها مشوار طويل ونزلت تحت العربية يمكن يكون فية ترسيب تانى ملقتش حاجة بتنزل مية
مش عارف المية دى بتروح فين
وبالنسبة للفتيس ساعات القية ينقل حلو وناعم
وساعات يعلق وميجبش الغيار التانى وعلشان تنقل اما تحرق علية وتعمل كيك دون اوفر وتوصل rpm ل 5 علشان تنقل الثانى او تطفى العربية وانت ماشى وتجيب n وتشغل وتجيب D تنقل معايا بعد كدة بس لازم علشان تطفى ودورعلشان تنقل تكون على سرعة من 20-30 ك

رد: مشكلة خطيرة
 

بالنسبة ان المية بتنقص حوالى 3 لتر اسبوعياَ
فدة كويس جدا طالما صلحت الريداتير ومتأكد انة مش بينقط . متنساش ان الجو حار حاليا مع سخونية الموتور
ف 3 لتر ف الاسبوع كويس جدا متقلقش

رد: مشكلة خطيرة
 

شوف يا حبيب ..

الاول انت تشيك على الغطا بتاع الريداتير وتشوفه سليم والكاوتشة سليمة ومحكم الغلق ولا لا .. وبعدين تشيك على القربة برضو والغطا بتاعها اذا كانت سليمة ولا بتجيب ميه والغطا بتاعها محكم ولا لا ..

تانى حاجة انت بتقول " انا روحت لميكانيكى قالى العربية كموتور سليم وجوان وش السلندر بسيط "
معلش مش فاهم الحتة دى يعنى جوان وش السلندر قالك سليم ولا لا لان غالبا لو مفيش تسريب هيكون نقصان المية بسبب وش السلندر حتى لو بنسبه بسيطة ..

برضه جرب تانى والعربية بارده الصبح تفتح الريداتير وتدور وتزود ميه وشوفها تانى بتبقلل ولا لا بس اهم حاجة وهى بارده خالص ..

وكمان ممكن فى مرة والعربية سخنه تفتح الكبوت وحط ودنك لو سمعت صوت اندفاع ميه كده (كانك بتفتح ازازة بيبسى بالراحة ) يبقى ده تسريب ودور عليه ..


عموما النقصان ده مش جامد اوى يعنى ومش خطير للدرجة بس متسبش العربية ماشية وناقصة 5 لتر يعنى كل يوم الصبح تزود ميه علشان تبقى فى الامان لغاية ما تكتشف السبب ..


واللله يكون فى عونك لان موضوع الميه والسخونية ده ارخم مشكلة ممكن تقابلها فى عربية وبصراحة ياما اتعذبت منها ..

ومستنيك تقولى ايه اللى قاله الميكانيكى بالضبط ...

تحياتى يا غالى ...

رد: مشكلة خطيرة
 

هو الميكانيكى اللى روحتة قالى جوان وش السلندر سليم لانة لما بيكون بايظ المكنة اللى هى الموتور بتبقى مش مضبوطة ، وبيتعرف اذا كانت العربية جوان وش السلندر بايظ او لا من ثلاث حاجات
1- يكون فية مية فى الزيت وبص ومافيش حاجة والزيت كويس
2 - المية يكون فيها زيت وبص على المية وتمام
3- الشمكان يجيب مية كتير (زى سرسوب مية الحنفية ) وقالى دوس بنزين اقعدت ادوس الشكمان مجبش مية

هو الترسيب ميقلقش بس انا عايز احط مية خضرة علشان احافظ على الموتور والريادتير مش عايز احط مية من الحنفية ، ولو كل اسبوع هحط مية خضرة هتكلف فلوس ، ولو حطيت مية من الحنفية كدة مع الوقت مش كويس على العربية

عموما انا هروح زيارة لبتاع الريادتير يمكن يعرف المشكلة من اية لان خبرتى على قدى فى العربيات بس هاروحة واقولة اللى قولتى يشيك علية علشان مبقاش قاعد قدامة جاهل

رد: مشكلة خطيرة
 

شوف يا غالى ..

اعراض تلف الجوان : - وجود زيت فى الميه (احتمال ضعيف) لكن ده هيقلل الزيت مش الميه ..
- وجود ميه فى الزيت وده بيخلى الزيت يبقى شبه الطحينة ..
-لكن موضوع ميه من الشكمان ده مستبعد لان علشان الموتور يجيب ميه من الشكمان زى سرسوب الحنفية يبقى المكنة تبقى فى الضياع وكمان لازم تكون بتجيب دخان ابيض وده الحمد لله مش عندك ..

بس ممكن يكون عندك حاجة من دول بنسبه بسيطة فميظهرش اعراض واضحة (لان الميه بتنقص كمية قليلة ومفيش سخونه) .. لكن ان شاء الله مفيش حاجة من دول ..

ابقى بس شيك على موضوع بقلله الميه زى ما قلتلك ومش هتخسر حاجة وابقى برضه بص تحت العربية دايما يعنى وانت نازل الصبح بص عليها تحتها ميه ولا لا ... ووالعربية سخنة لو وقفت 5 دقايق مثلا (مثلا نزلت تشترى حاجة) بص تحتها برضه اذا كانت بتنقط ميه ..

ولما تروح عند بتاع الريداتير روح لواحد معروف وخليه يبص على الخراطيم والريداتير نفسه والقربه والكلام ده ..


بالنسبه لموضوع المياه الخضرا دى اساسا المفروض بتحط الجركن وتزودها ميه عاديه مفيش مشكله (لغايه لما تخف خالص وتحس ان لونها راح تروح حاطط ميه خضرا تانى) وهى اصلا وظيفتها منع تكون صدا فى دورة الميه وبتساهم فى تقليل درجة الحرارة (حاجة بسيطة اوى على اساس ان درجة غليانها اقل من الميه العادية) يعنى متقلقش لما تزود ميه عادية مفيش اى مشكلة ..

تحياتى ..

رد: مشكلة خطيرة
 

حسام باشا ،، احب أعرفك أن العربية اتضبطت لوحدها والمية مبقتش بتختفى
والمشكلة راحت لوحدها
واحد صاحبى قالى احتمال يكون فية اجزاء من الموتور بعد تركيب الريادتير الجديد ما اخدتش مية
وبعد ما حطيت على مرتين كل مرة 3 لتر
منسوب المية من بعدها مش بيقل وزى ما هو وتمام
ولو حضرتك تقدر تفيدنى فى موضوع الاتوماتيك ,, كتر خيرك ومعلش هتقل عليك ياغالى