رد: مين إللي إتقرص من تاجر عربيات
 

والله حكاية الخداع في شراء العربيات ديه كتير ، والنصب فيها أكتر ، وحنقل تجربتي :
كنت شفت عربيه أونو واقفة في الشارع وعجبني لونها وشكلها كان كويس ، وأنا بصراحة كان نفسي فيها أوي ، المهم سألت ولقيت إنها تبع معرض جنبنا ، رحت للتاجر وقالي إنها بتاعت إتنين إخوات ، إتصل وجه واحد في نص ساعة وقال إنهم تجار سيارات بس العربيه ديه جايبينها ليهم علشان تنقلاتهم ومش بيفكروا بييعوها " وطبعا بهبلي أنا صدقت " المهم بيقولي إنهم أتخانقوا وعايزين ينفصلوا وكل واحد ياخد فلوسة منها " ده علي أساس إنهم جايبينها شراكة " ، وبعدين العربيه كانت بتوكيل وصاحبه هوه أخوه وبعت يتصل بيه ، أخدت العربيه وبرضة بهبلي رحت أنا وواحد قريبي المفروض إنه بيسوق بقالة 30 سنه ، ورفعناها في بنزينة " وعلي فكرة معظم البنزينات بتبقي عارفة عربيات التجار ومتفقين معاهم يقولوا عليها تمام " والراجل قال زي الفل مفيهاش غلطة ، أخدتها وجربتها وكانت بتجري زي النحلة .
مطولش عليكم خلصت فيها وقولت أروح التوكيل أبص عليها رفعوها قالولي واخده خابطة من تحت في القنطرة والعربية مايلة شمال خلفي ومرحلة في العجلة الشمال الخلفي 2 سم للخلف ، المهم أتضح إنها كانت عاملة حادثه وخابطة في رصيف وراشة بره بالكامل ، وطلعت عين أهلي علي ماقدرت أعدلها شوية ، وفي الآخر بعتها وخسرت فيها 10000 جنيه ده بعد التصليح ، بس هيه بصراحة قعدت معايا سنتين ، آه كانت آرفاني بس كانت برضه شايله عني بلاوي أنا وأسرتي .
الدرس المستفاد :
1 - إبعد عن التجار لا تبيع ليهم ولا تشتري منهم .
2- إكشف علي العربية عند واحد وإتنين وتلاته وخد معاك ميكانيكي وسمكري تكون عارفهم ويفضل يكونوا مش من المنطقة إللي شاري منها العربية .
3 - إوعي تتخدع بمظهر العربية من بره أو من جوه المهم أساسيتها .
4 - أوعي تتخدع بمظهر إللي بيبع لك العربية سواء ست أو راجل أو شيخ أمشي بطريقة علمية في الشراء أفضل .
5 - أوعي تتخدع بأي قصص تتقالك ومواضيع مالهاش دعوه بالبيع ، زي العربيه ديه شراكة بين إخوات أو ورث أو تتباع لظروف سفر أو ....الخ ، وده في حالة لو شكيت في صاحبها وحسيت إنه بيلعب بيك أو شكله تاجر وبيشتغلك ، بس فيه ناس كتير محترمة بتبيع لظروف أسرية أو سفر أو مرض " لاقدر الله " وخلافة ، وده ممكن أي حد يقدر يعرفهم علي طول .
6 - في الآخر " إستفت قلبك وإن أفتوك " وأعلم أنه " قل لن يصيبنا إلا ما كتب الله لنا " ، وبرضة " لايمنع حذر من قدر " .

رد: مين إللي إتقرص من تاجر عربيات
 

طبعا لسه بدري عليا سيبنالك انتا الكلام الكبير ده يا ابو عمو

رد: مين إللي إتقرص من تاجر عربيات
 

كروسر تعرف ان بضيع قدام الناس المتدينة وسبحان الله دايما باخد مقلب والتانى من الناس الى بتهتم بالشكل مش عارف ليه وربنا يهدى الجميع

رد: مين إللي إتقرص من تاجر عربيات
 

رد: مين إللي إتقرص من تاجر عربيات
 

انا يا جماعة اتقرصت من تاجر عربيات برضوا بس بأعتبر الموضوع فى الاخر قسمة ونصيب وحظوظ
انا كنت عايز اشترى عربيه فى حدود 28 - 30 الف الى معايا وده كان فى يناير 2010 الى فات وانا على فكرة ساعتها كنت لسة بتعلم سواقه وقولت اتعلم عليها
المهم روحت سوق الجمعة الى فى مدينة نصر واخدت معايا اتنين سواقين من الشركة الى انا شغال فيها و سمكرى معرفة واحد منهم
روحت لقيت الاسعار مولعة ودورت كتير وفى الاخر لقيت عريبة مناسبة نوعا ما بس الى باين فيها ان الزجاج الامامى مشروخ وعايز يتغير
هى هيونداى اكسيل 97 كورى 1300 وصاحبها تاجر ومعاه توكيل
المهم السمكرى بص عليها لقى صاجها كويس .. وانا كونت واخدة على اساس انو فاهم فى كل حاجة فى العربيات طلع مش فاهم غير فى الجزئية بتاعته
التاجر كان عايز 32 الف ومن هنا لهنا رسيو على 30 الف
المهم اخدتها وخلصت ورقها وابتديت رحلة التظبيط فيها الى مش راضى يخلص من وقتها من 9 شهور الى الان
التاجر كان مفضيها من اى حاجة ينفع تتبدل او الله اعلم يمكن على حظى ان كل الى فيها تاريخ صلاحيته انتهى وهى معى فانا ظبط الاتى:
1- تغيير الزجاج الامامى
2- تغيير البطارية
3- تغيير فردتين كوتش والاتنين التانيين على وشك يتغيروا هما والاستين
4- تغيير الردياتير لانه كان فى حالة سيئة جدا وكل يوم ازودة ميه وبيعمل صدا
5- تغيير عصا المساحات والاشارات
6- تظبيط العفشة وعلى وشك تغيير الكبالن والمساعدين
7- شحن فريون للتكييف وبرضوا مش شغال - بيرج العربيه على الاخر
ودة غير كميه المرات الى روحت فيها للميكانيكية والكهربائية ولسه عايز اغير طقم الدبرياج (الاسطوانة والديسك والبلية ) لان العربيه سحبها وحش ويتاكل بنزين جامد اوى
انا صارف على الكلام دة حوالى 5000 جنيه ولسة فيها شغل كتير بس انا مش عايز ابيعها دلوقتى لانى مش عاوز اشترى مستعمل تانى وابدا قى مشاكل تانى مع عربيه تانيه انا مستنى احوش مبلغ تانى وابيع دى واشترى جديد ارحم بكتيييييير اوى

النصيحة ليكم بعد التجربة
- متشتريش ابدا من تاجر لانه اى حاجة ممكن ياخدها من العربيه هيخدها غلشان يبيعها لوحدها
- خد معاك حد بيفهم كويس ينفضلك العربية ويقولك على كل الى فيها
- لو تقدر تبعد عن المستعمل اصلا يبقى احسن بكتيير اوى ولو حتى هتشترى جديد بالقسط

رد: مين إللي إتقرص من تاجر عربيات
 

تعليق حضرتك في محله ، بس ياريت نخلي لغة التخاطب والحوار والكلام أرقي من كده ، لإن المنتدي فيه ناس محترمة وراقية كتيير أوي والكلام والألفاظ ديه صدقني بتجرح مشاعرهم وخصوصا إن ممكن أخوك الصغير أو إبنك أو بنتك يقرا الألفاظ ديه ويقولها أدامك ، وهوه شايف إنها حاجة عاديه ، فلو سمحت أتوسم فيك الخير وإن نيتك كويسة وقصدك مش وحش وحبيت تنفس عن غضبك ، بس ياريت المره الجايه تكون بصورة أفضل من كده .

رد: مين إللي إتقرص من تاجر عربيات
 

انا بقى عشت تجربة مع واحد صاحبى ..

كان صاحبى وابوه عايزين يجيبوا عربية بس مش بيفهموا اى حاجة فى العربيات خااالص ..

المهم صاحبى سالنى قلت له هات يابانى او المانى احسن حاجة ...

المهم ابوة دور لقى عربية بولو 2001 فول اوبشن وفتحة سقف واتوماتيك وجنوط اسبور ومفيهاش خبطة وكانت عامله 33000 (منطقة حرة) وهى المفروض اخرها 28000 ..

ولانه غشيم فى العربيات اقتنع بيها علاطول وراح عامل عقد وشرط جزائى 5000

وصاحبها كان تاجر وقاله انها محتاجة بطارية واسكاترا بس وصاحبه يومها وصلهاله لغاية البيت ..

ويومها صاحبى كلمنى وقالى تعالى علشان تجربها قمت رحتله واتفرجت على العربية وفعلا عجبتنى جدا وكان شكلها نضيف اوى ..

جيت اسوقها فوجئت ان فتيسها خربااااااااان ..واقف على التالت بس ومش بينزل او بيطلع عنه (مش عارف الراجل مخدش باله من كدة ازاى)

المهم قلتله ايه ده يا ابنى العربية جايبة فتيس ...

وبعد كدة راحو كشفوا عليها لقوها مسقطة موتور ومحتاجه فتيس وبطارية ودينامو واسكاترا ومحور امامى ...

وراح صاحبنا لاغى العقد ودفع ال 5000 جنيه من غير مايسوقها خالص .. هههههههههههه

حاجة غريبة صح ....