المشاركة الأصلية كتبت بواسطة ahmed_eng2001 (المشاركة 972326)

تمام كدة ....
تيجى حضرتك تحاول تستبعد عربيات تانية من التصفية الى فاتت دى .... ده رأيى الشخصى المتواضع ( القابل للخطأ )

اؤيد كلام حضرتك .... كلما استطعت تبعد عن البنوك يكون افضل ... بلاش قسط

استبعد الافيو ... و ممكن تستبعد الفيرنا .. اللانسر بداية الالفينات ( المكوة )
فيه ناس شكت كتير من الميجان قبل 2005 و بداية من 2006 تلافوا المشاكل الى كانت فى الموديلات السابقة

المشاركة الأصلية كتبت بواسطة albasha (المشاركة 972365)

طبعاً شايف إن الموضوع بعد عن الكليو والسيتروين
بس رأيي الشخصي عن الكليو بما إنها معايا بقالها 6 سنين تقريباً ولما جيت أبيعها واتفقت علي كل حاجه رجعت في كلامي
مميزات الكليو سياره إقتصاديه بمعني الكلمه
قطع غيارها متوافره بشكل كبير جداً وفأكتر من مكان ولو انت من القاهره يبقي الموضوع سهل جداً
عندك شارع دمشق و التوفيقيه و الحرفيين غير التوكيل غير المحلات الثقه في التعامل زي المركز التجاري في شارع السودان عند عمارات العرايس
والميكانيكيه اللي بيفهموا في الرينو في الفتره الحاليه كتير برضه وأغلبهم كانوا شغالين في التوكيل وعملوا ورش لنفسهم وبيفهموا فيها كويس جداً
دول أهم نقطتين
بالنسبه للشنطه كبيره جداً وده أثر بالسلب علي الكراسي الخلفيه
العيوب
ضيق الكرسي الخلفي
التكييف في الزحمه تأثيره ضعيف (علي الطريق السريع جيد جداً)
السياره مش بتاعة حرق وجري ( ده بالنسبه للموتور ال 1200 )
بما إن حضرتك طولك 190 سم فأعتقد صعب إنها صعب تظبط معاك ( بس الغريب إن معاك سيتروين أضيق منها ومناسبه ليك ؟؟؟؟؟؟ )
رأيي الأخير لو السياره عجباك سوقها أكتر من مره وجرب لو عجبتك يبقي تختار حاله كويسه
الكليو مظلومه لإن الناس بتقارنها بفئات أعلي هي سياره إقتصاديه من الدرجه الأولي إستهلاك بنزين إستهلاك قطع غيار ( كل لما قدرت تركب قطع أصليه كل ما إشتريت نفسك أكتر )

المشاركة الأصلية كتبت بواسطة المفكر (المشاركة 972374)

لو لسه بتقارن بين الكليو والاكسارا فأنا أرجحلك الاكسارا، وبالنسبة للشكل العربية مش قبيحة وشكلها مقبول، في مقابل أداء هاااااااايل فعلا أنا معايا رينو صحيح هيا مش كليو بس أقدر أقوك الاكسارا أحسن، انا جربت الكليو كتير وطبعا هيا ممتازة لكن موتورها أداءه مش ممتاز غير إن واضح إنك مهتم بحجم صالون العربية، صدقني الاكسارا أنسب حاجة بالمبلغ اللي بتقول عليه، موتور ممتاز صالون مساحته جيدة، دا غير إنك واخد على السيتروين فمشاكل الأوروبي مش هتقابلك زي باقي الناس، أنا معايا زميل في الشغل برضه كان معاه ax وغير باكسارا 1 ماشاء الله رائعة، وطبعا الحالة هيا اللي بتحدد العربية.

المشاركة الأصلية كتبت بواسطة abdelrahmn010 (المشاركة 972454)

ممكن تجيب فيات بونتو أو جولف 3 أو بولو أو هوندا سيفيك أو ميتسوبيشى ميراج

المشاركة الأصلية كتبت بواسطة AAAH (المشاركة 972536)

شكرا يا استاذ عبد الرحمن على ردك واهتمامك
ممكن نستبعد البونتو لأنها صغيره وامبارح كان عندى تجربه مع فيات سيينا ومش مستعد اتحمل عيوب الفيات
ودى تجربتى معاها

تجربتى فى السفر بفيات سيينا 2007 - مصر موتورز مجتمع السيارات

البولو تحفه وانا سوقتها قبل كده بس برضه صغيره
الميتسوبيشى انا سوقت كذا عربيه منه بس ماجربتش الميراج وماعرفش عنها حاجه خالص
الهوندا سيفيك اعتقد هاتبقى غاليه وبشوفها دايما فى الشارع بتحك فى المطبات

المشاركة الأصلية كتبت بواسطة abdelrahmn010 (المشاركة 972619)

أحسن عربيه مناسبه ليك دايو لانوس من 2003 إلى 2007
لو كده هتزود المبلغ شويه بس هتريح نفسك لأن ديه عربيه قطع غيارها رخيصه وعربيه منتشره فى الشارع المصرى وده دليل أنها أسبتت وجودها

المشاركة الأصلية كتبت بواسطة AAAH (المشاركة 972635)

بص يا استاذ عبد الرحمن انا معاك ان اللانوس عربيه حلوه وقطع غيارها متوفره ورخيصه
بس انا مختلف معاك ان سبب انتشارها هو جودتها وانها افضل من العربيات الاوربى مثلا
السبب الحقيقى لانتشارها هى ثقافه الشعب المصرى (اللى انا شايف انها غلط)
المصرى عايز عربيه لما تعطل يصلحها عند عم عبده اللى تحت البيت ولما يجيبلها قطعه غيار يجيبها من عم سيد اللى على اول الشارع
وعلى فكره دى مش حاجه وحشه دى ميزه ان العربيه تكون منتشره وقطع غيارها رخيصه ومتوفره واى حد يشتغل فيها وسهله البيع بس للأسف ده جه على حساب عربيات تانيه افضل بكتير من الكورى زى العربيات الاوربى وانا سوقت الاتنين واللانوس لا تتفوق ولا تقارن اصلا بالاوربى مع احترامى الشديد طبعا لمالكى السيارات الكوريه
وبصراحه انا مابحبش اللانوس بس مفيش مانع ان لو ضاقت ومالقتش حاجه فرنساوى نضيفه زى ما انا عايز انى اجيبها وهابقى مبسوط بيها برضه :)