رد: مشكله لما العربيه تسخن
 

شكراً على رد حضرتك يا بشمهندس samirayad

انا مغيره زيت الفتيس من 8 شهور تقريباً (فى أول يناير) ، استخدمت زيت Mobile ATF 320

----------------------

هالخص لحضرتك الى بيحصل:
1) العربيه بتسخن بسرعه وبتبرد بسرعة، يعنى ممكن تسخن فى 20 دقيقة ، وتبرد فى 10 دقايق ، ولما تبرد مؤشر الحرارة يبقى عند الصفر او قريب منه. (فى رأى خمن ان مواسير تبريد زيت الفتيس الواصلة بين الفتيس والريداتير ممكن تكون انسدت، بس مش عارفة ؟؟؟ ايه رأى حضرتك ؟)

2) وانا سايقة والفتيس على ( D )

3) العربيه بارده بتبقى على الاول - عادى

4) لما بتسخن شويا والسرعة توصل حوالى 40 ، وتبتدى تنقل، المفروض تنقل على التانى، لكن الى بيحصل انها بتنقل على التالت على طول، وطبعاً العزم بيكون ضعيف

5) لكن انا سايقة والفتيس على ( 2 ) ، بتنقل من الاول للتانى عادى

6) لما بتسخن : وانا سايقه فجأة الفتيس كأنه بقى على ( N ) ، ارفع رجلى من البنزين خالص واضغط بالراحة عشان يلقط تانى

----------------------

لو هأشترى فتيس استيراد ايه الحجات الى اخد بالى منها واركز عليها ؟

طبعاً هيكون معايا ميكانيكى - لكن ممكن تفوت عليه حجات ، فأنا عايزه أعرف ، يتفحص ازاى ؟ وأتأكد انه حالته كويسة ازاى ؟

رد: مشكله لما العربيه تسخن
 

بتهيألى حيقدر يفتش ظاهريا فقط و يحاول يتأكد انه متصلحش قبل كده
و حركة ذراع الغيارات مفيهاش بوش و لو متاخد من نص عربية و قدر يعرف الكم يفضل يكون الكم قليل
و لازم يبقى الاتفاق مع البائع انه على تجربة لمدة معقولة لانه لازم يتجرب على العربية

بعدين المفروض الى بيخمنوا دول كانوا اتاكدوا من عدم انسداد المواسير يعنى مش معقول حتشترى فتيس تانى و يحصل معاه نفس الحكاية
و ما المقصود بتسخن بسرعة ؟ قصدك بتوصل لحرارة التشغيل الطبيعية بسرعة فى تلت ساعة لو ده قصدك فهى كده طبيعية
و لا المقصود بتسخن لدرجة حرارة فوق المعدلات الطبيعية ؟ لو ده المقصود يبقى حتحصل نفس الحكاية مع الفتيس الجديد
هذا و الله اعلم

رد: مشكله لما العربيه تسخن
 

لكن حضرتك ذكرتى أن هناك ثقوبا أكتشفت فى الردياتير

وزيت الفتيس حاليا لونه يميل للأحمر الغامق

ومن هنا وارد جدا أن يكون الزيت مختلطا بمية تبريد المكنه

وبالتالى فلزوجته وقوامه غير مناسبين حاليا

ولا يصلح لعمليات النقل عبر الفتيس الأتوماتيك

__________________

وبالنسبه لكيفية أختيار فتيس أستيراد

فده بالفعل كما ذكر أخونا المهندس : أحمد على

بيخضع للكشف الظاهرى

ويأتى بعد ذلك دور القسمه والنصيب

رد: مشكله لما العربيه تسخن
 

انا اقول لحضرتك .. مهو انا بقيت خبره فى الموضوع ده بسبب عربيتى ههههههه


شوفى حضرتك ..

افضل فتيس استيراد ممكن حضرتك تشتريه .. هو الفتيس اللى راكب على المكنه ..

لان من حاله المكنه بنقدر مبدئيا نحدد حاله الفتيس .. وكمان بنعرف انه اول مره يتفك من على المكنه ..

لكن الفتيس اللى ع الارض بيكون مش مضمون .. وممكن يكون حد ركبه وطلع فيه مشكلة فرجعه تانى ....





لو الفتيس راكب على مكنه وظاهريا شكله نضيف وكويس بنبدأ نرتاح له نفسيا شويه وندخل على خطوه اننا نحله من على المكنه ..

لما بنحله اكيد هنلاقى اثار زيت ساقط منه ... لو الزيت احمد فاتح بيبقى دليل على ان الفتيس حالته كويسه ونضيف .. اما لو الزيت غامق بيكون دليل على ان الفتيس مش اد كده ...


طبعا لازم ناخد الفتيس على تجربه يومين او تلاته .. ولو التاجر مرضاش بلاش منه خالص ....


تسقيط الفتيس بياخد يوم شغل .. ممكن اقل شويه لو الميكانيكى سريع زى ما حصل معايا كده قعدنا فى الموضوع ده حوالى 9 ساعات (شامله التدوير فى الشونة والشراء والتركيب والتجربة المبدئية) ...


المصنعية بتكون فى حدود 200 جنية

اهم خطوه بقى ان حضرتك تفضلى تلفى بالعربية طول اليوم بعد تركيب الفتيس لتجربته .. علشان لو فيه حاجة تظهر قبل ما يعدى يومين التجربة ...



وربنا يوفقك وتخلصى الموضوع على خير يا فندم ........

رد: مشكله لما العربيه تسخن
 

شكراً .. م. احمد على 1999

__________________


الف شكر يا بشمهندس سمير

وفعلاً حضرتك طرحت احتمال جديد

بس ازاى نتأكد من المعلومه دى ؟

يعنى اعمل ايه عشان اتأكد اذا كان الزيت داخل على المية ولا لأ ؟
انا فتحت غطا الريداتير وبصيت على مياه ... مكنش فى زيت على وش الميه
هل هذا يكفى ولا فى طريقه تانى نكشف بيها ؟

او اقول للميكانيكى يعمل ايه عشان يتأكد من كدا ؟

__________________

متشكره جداااااااا .. أ. حسام البورسعيدى
والله استفدة من حضرتك كتييييير