|
رد: عن الانسـيـابيـه ... و الثـبــات ...
اقتباس:
اقتباس:
وكان اصعب حاجه اني اختصر الكلام ده كله بطريقه سهله بدون استرسال او عمق زياده يؤدي الي الملل او اللخبطه طبعا في كلام كتير بس انا جبت اكتر حاجات فاهمها ومتأكد منها وبعدت عن الحاجات المعقده زي تأثير اختراق العربيه للهوا على العربيات المحيطه و دوامات الهوا و نظريه السرب وانفاق الهوا لأنها صعبه حتى عليا وفاهمها بالعافيه وبالتالي شرحها حيكون اصعب و اصعب وما خفي كان اعظم.... البركه في الزملا وفيك في تعميق الموضوع وياريت فعلا كل واحد عنده معلومه يضيفها بأسلوبه كي تعم الافاده الف شكر لكل من شارك |
رد: عن الانسـيـابيـه ... و الثـبــات ...
بس انا لسه ما شاركتش مع انى أول واحد يقرا الموضوع.......
وكالعادة تحفة من تحفك يا سامح باشا وذاد من دسامة الموضوع مشاركة اسلام جلال وفادى بس عندى تساؤل هل معنى كلامك ان الانسيابية ضد الثبات ولو كده فعلا تبقى الشاهين مثلا من السيارات الثابتة جدا ولكن فى تقرير كان كتبه فادى عن الثبات بخصوص الشاهين ان مخجل على السرعات العالية عاوز أفهم صانعى السيارات بيعالجو الموضوع ده ازاى الأنسيابية علشان تنعدم مقاومة الهوا والثبات اللى هو اصلا ضد الأنسيابية أو بمعنى أدق الأنسيابية بتأثر عليه تيجى ازاىptmnlo123per1127 |
رد: عن الانسـيـابيـه ... و الثـبــات ...
اقتباس:
زي ما قلت في بدايه الموضوع ان العربيه منظومه متكامله و بالتالي في ارتباط بين الانسيابيه و الثبات الانسيابيه ممكن تحسن الثبات وتزود الاحساس بالراحه ... تخيل ماشي بسرعه عاليه وفي هوا جامد زي اليومين دول ... مش ساعات تحس ان الهوا بيخبط العربيه او يميلها .... لو العربيه انسيابيتها كويسه حينساب الهوا من عليها ... ولو شكلها مجعلص و زوايا حاده الهوا حيلطش فيها و تحس بمرجحه الهوا فيها ممكن تعمل تجربه صغيره ... وانت ماشي بسرعه طلع كف ايدك من الشباك وافرده مع الهوا زي جناح الطياره حتلاقي ايدك ثابته افرد ايدك كأنك بتشاور لحد ... حتلاقي الهوا بيخبط فيها جامد و بيزوقها لورا وتضطر تنشف ايدك شويه علشان تثبتها مكانها الوضعين دول بيعبرو عن انسيابيه الشكل ... الايد شكلها ثابت لكن تغيير وضعها مع حركه الهوا غير من انسيابيتها ولو ميلت ايدك بزاويه لفوق او لتحت حتحس بطريقه عمل جناح الطياره ... وتلاقي الهوا بيزق ايدك لفوق او لتحت حسب وضعها كده في تأثير تاني غير انسيابيه الشكل .... اللي هو قوه الرفع LIFT او قوه الضغط السفلي Down Force وبالتالي ممكن تكون عربيه انسيابيه جدا لكن ثباتها ضايع ... ازاي بسبب قوه الرفع لو عربيه انسيابيه جدا لكن عاليه وبالتالي الهوا بيعدي من تحتها فتبقى عامله زي جناح الطياره ووزنها النسبي خفيف جدا لدرجه ان اي لعب في الطريق يخليها تنط في الهوا ... لأن مفيش تماسك مع الطريق ... مبالك بقى ثباتها في الملفات يبقى عامل ازاي !!!! وده سبب من اسباب ان العربيات ال 4×4 ثباتها ضعيف ( الخلوص الكبير عن الارض ) ( ده طبعا غير ارتفاع مركز الثقل و الشكل الغير انسيابي ) ... لكن التأثير الاكبر هنا هو قوه الرفع يعني في ترابط بين القوى المختلفه .. الانسيابيه (قوه الجر ) - قوه الرفع - ده طبعا غير الوزن - الكاوتش - معامل الاحتكاك بالطريق - نوع الطريق - العوامل المؤثره على الثبات كتيييييييييييييييييييييره اوي ... الانسيابيه عامل من العوامل دي .. وممكن يكون عامل ايجابي او سلبي .. لكن تأثير ال Down Force على الثبات اهم بكتير من مقاومه الجر بالنسبه للشاهين فممكن نقول ان وضعها قريب من وضع البيجو 504 ... عربيه عاليه و مع السرعه بتحصل قوه رفع تضعف من ضغط العربيه على الطريق و بالتالي تضعف من التماسك او الثبات هي في النهايه معادله ... ازاي تكون العربيه انسيابيه علشان توفر في البنزين و تحقق الراحه في السواقه ... وفي نفس الوقت تكون ثابته على الطريق صدقني لو كان ليها رد قوي و واضح ... مكنش حد غلب والله اعلم ... اتمنى يكون كلامي وضح الصوره مكلكعهاش ptmnlo123per1127 |
رد: عن الانسـيـابيـه ... و الثـبــات ...
كدة تمام ياباشا وصلت الفكرة
وتدعيما لكلامك ده فيديو بيوضح الأنسيابية ومعامل مقاومة الهواء لسيارة بيجو كونسبت واستخدام الأجنحة(الأسبويلر) لزيادة الثبات والتحكم فى السيارة ويقال ان هذه السيارة هى اقل مقاومة للهواء فى تاريخ السيارات عالميا....... وشوف التوافق وتحقيق المعادلة بين الأنسيابية والثبات http://www.youtube.com/watch?v=1G2VF...eature=related |
رد: عن الانسـيـابيـه ... و الثـبــات ...
تمام كده يا باشا ....
العربيه شكلها انسيابي جدا ... ومع زياده السرعه رفع السبويلر قلل من انسيابيه العربيه لأنه اعاد توجيه الهوا ... لكن زود من ثباتها بقوه ضغط الهوا على السبويلر ... |
| الساعة الآن 02:46 PM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017