رد: مشكلة خطيرة
 

للاسف يا غالى .. انت غالبا كده عندك جوان ..

بس اول حاجة تعمل موضوع الغسيل ده وتتاكد من الطرمبة واسال الراجل برضه الطرمبة كويسة ولا ايه لان بتاع الريداتير مش هيضحك عليك علشان مش هو اللى هيشتغل فيها ..

بالنسبة للريداتير انا بصراحة اول مرة اسمع عن ريداتير بلاستيك (انتا متاكد؟؟) يعنى جسم الريداتير (السربنتينة يعنى) هى اللى بلاستيك ولا الوش بتاع الريداتير هو اللى بلاستيك فبر يعنى ؟؟

اصل الوش ده بيتفك ويتغير لوحده وتمنه حوالى 150 جنيه لكن لو الريداتير نفسه هو اللى بلاستيك والشرخ فيه للاسف مش هقدر افيدك لانى اول مرة اسمع عن ريداتير بلاستيك كله اهم حاجة بس تخلص من موضوع غسيل دورة الميه وبعدين ربنا يسهل ان شاء الله ..

وعلى فكرة الحرارة عندك كويسة (وان كانت زايدة شوية) بس لازم تتابعها وانت ماشى علاطول ولو علت انزل وافتح الكبوت وسيبها تبرد شويه وبعدين دور وزود ميه من القربه وكمل وحاول تعملها فى اسرع ما يمكن علشان تحافظ على الموتور ..

وانا معاك لغايه ما تتصلح باذن الله .. والله انا حاسس بيك لانى كنت فى نفس مكانك بالضبط ومشكله السخونية والميه دى فعلا تحرق الدم بس ربنا يسهل وتتصلح ان شاء الله

رد: مشكلة خطيرة
 

انا ياباشا فى موضوع المية بقالى شهر كنت لسة مطلعها من عمرة دوكو وسمكرة وخلتها عروسة
ولسة بمشى بيها من عند الصناعي لقتها بتجيب مية ، وكنت مستنى بعد العمرة علشان اركبها وأركنها قدام الشغل ،، وسط العربيات الجديدة .. بس طلع موضوع المية
الردياتير عندى البودى بلاستيك ،، السربنتينة كانت انمونيل خلتهم نحاس ،، علشان كدة بدور اصلاح البودى بتاعة البلاستيك لانة مصروف علية لسة من ثلاث اربع شهور
عموما ياباشا انا هعمل الخطوات اللى قولتى عليها وارجع اقولك عملت اية
ورايك مضبوط موضوع المية دة يغيظ جدا


ومعلش اتقل عليك ،، كان عندى مشكلة قديمة فى الفتيس ،، من ساعة لما اشتريت العربية من سنة ممكن تقول اتكيفت علية بس لو لحضرتك تعرف حل لية ياريت تفدنى فية
http://forum.masrmotors.com/showthread.php?t=19208

رد: مشكلة خطيرة
 

معلش انت قصدك البودى اللى هو الجزء اللى فوق من الريداتير ولا ايه باظبط ؟؟؟
يعنى البودى ده عباره عن ايه لان الريداتير بتاعى مختلف شويه ؟؟ والتسريب من اى مكان فى الريداتير بالظبط ؟؟

وزى ما قلتلك لو الوش اللى فوق التسريب منه ممكن يتغير لوحده بسهوله ؟؟؟

بالنسبة لموضوع الفتيس هو صعب شويه بس ممكن يكون بسبب الريداتير لان الفتيس بيبقى ليه تبريد فى الريداتير بس لازم تشيك على زيت الفتيس والفلتر وممكن يكون مشكله فى الحساسات
انسب حاجة تكشف عليه كمبيوتر بس خليك الاول فى المهم وبعدين نشوف حوار الفتيس على رواقه .. بس طالما الفتيس بيجيله وقت ويشتغل كويس يبقى اكيد تزبيط مش اكتر ..

بس عندى سؤالين :

انت عملت تصليح فى الفتيس ليه ؟؟؟

ولما بتطلع الصبح والعربية بارده الفتيس بيبقى اخباره ايه معاك ؟؟؟

رد: مشكلة خطيرة
 

بص ياباشا الريادتير عندى بلاستيك والسربنتية المونيوم ،، فية واحد قالى النهادرة البودى البلاستيك عندك عبارة عن cover والسرنتية هتلاقيها بتجيب مية

التسريب فى الكوع اللى بتخش فية عندى شجرة المياة السفلية (الريادتير من تحت )

وبالنسة للوش cover البلاستيك اللى بيتسمى ( العلبة ) دورت علية مش بيتباع ،، اما واحد جديد او يتصلح

بالنسبة ياغالى لموضوع الفتيس ساعات ياخر فى نقل التانى وساعات لا ،، ولما يتدوس البنيزين وتعلى rpm تلاقية نقل بس بنتشة وبقيت النقلات بنتشة اخف وسبق وغيرت زيت وفلتز زيت وعملت طقم اصلاح بالكامل بس العيب زى ما حضرتك قولت كهرباء او حساسات وغالبا حساسات لانى عملت ترميم بالكامل لضفيرة الجير بوكس

وعملت تصليح للفتيس لانى كنت عند واحد بتاع جير بوكس قالى محتاجة طقم اصلاح ولكن مفيش نتيجة حصلت وكدة تبقى مشكلة حساسات وكنت بفكر اخلص من موضوع السخونية واروح التوكيل اكشف على الحساسات واعرف اية الحساس البايظ

ولو العربية بادرة ولسة طالع بيها تلاقيها معلقة ومش بتنقل الثانى مش شرط السخونية علشان الفتيس يعلق

ولما الفتيس يعلق الحل
1- اعلى rpm لغاية ما تنقل على 5 rpm وساعتها تنقل بنتشة وباقى النقلات بنتشة اخف
2- ازود السرعة لغاية 40 واطفى كونت وامور العربية n واشغل واجيب d تنقل عادى ومستريح من غير نتش

رد: مشكلة خطيرة
 

انا وانا بجرب العربية لقيت الشكمان بينزل مية