رد: اعمل ايه؟ لاثبات الموتور الجديد فى الرخصة
 

النهارده روحت المرور كملت ورق الفحص وختمت وصل الطفايه واشتريت شنطه اسعافات ومثلث وثبت الموتور الجديد فى ورق الفحص وبعتنى جبتله الورق من شباك الافراجات ودخلت فحص رجعنى تانى علشان نور الاستوب لمبه واحده بس اللى بتنور لما اضغط فرامل وقاللى اعملها وتعالى بكره وكتبلى على ورق الفحص (انوار خلفيه)
بعد كده روحت اشتريت كل الورق اللى ناقص والملف والحافظه علشان انجز بكره الصبح ان شاء الله ... وربنا يجعله اخر يوم يارب :)

رد: اعمل ايه؟ لاثبات الموتور الجديد فى الرخصة
 

الحمد لله خلصت واستلمت الرخصة والنمر الجديده بعد عذاب 10 ايام
ملحوظة صغيرة قبل ما احكى اللى عملته: لو جابوا أشر واحد فى الدنيا وقالوله اعمل اجراءات ترخيص تعقد بيها الناس تفكيره الجهنمى مش هايوصل للإجراءات الحاليه :)
عموما انا عملت النور الخلفى وروحت تانى يوم لقيت الفحص خلص ودخلت للمهندس والظابط قالولى تعالى بكره
روحت بكره ودخلت فحص تانى قعد راجع على كل اللى فات تانى مساحات اشارات انوار فرامل يد المهم خلص ورق الفحص ودخلت على بتاع العادم اشرلى على الورق وختمه
بعتوا ورق الفحص على الشباك (عاملين شباك واحد وموظف واحد لكل الملاكى) وطبعا زحمه موت وروحت دفعت التأمين الاجبارى
وقفت ومعايا كل الورق والحافظه وفكيت نمر العربيه (مالقتش حد يفكهم وكان معايا حمايا قابلته هناك بالصدفه :) فكهم معايا) وبعتوله ورق الفحص ادانى ورقتين صغيرين خدتهم ورحت الشباك بتاع النمر مضانى على الورقتين ورجعت نفس الشباك اللى كنت فيه اديتهومله تانى !!!! وطبعا وقفت فى الصف تانى سواء هنا او هنا !!!!
بعد كده روحت فطرت وقعدت مستنى الرخصه والنمر :)
استلمت الرخصه وورقه استلم بيها النمر
روحت استلمت النمر وادانى معاها مسامير عجيبه كده معرفتش اركبها دورت على الشاب اللطيف اللى بيركب النمر قاللى انه ناسى العده فى البيت :(
قومت حاطط النمر على الكرسى اللى جنبى وروحت :) فى الطريق اشتريت مسامير عاديه زى اللى كانت النمر القديمه راكبه بيهم وركبت النمر
وتوته توته خلصت الحدوته ومش ناوى اعملها تانى ان شاء الله MAD

رد: اعمل ايه؟ لاثبات الموتور الجديد فى الرخصة
 

ياااااه .. كفارة يا معلم .... الحمد لله انك خلصت ... و الف مبروك على النمر و على الموتور

ربنا يجعله فى ميزان حسناتك يا شيخ .. و اديك اتعلمت درس فى الصبر :)

الى عمل النظام الحكومى ده يستاهل جائزة نوبل طبعا .... و جائزة خاصة للى عمل نظام المرور .... ربنا يعفو عنا و يقلل مشاويرنا للمرور
تقبل مرورى

رد: اعمل ايه؟ لاثبات الموتور الجديد فى الرخصة
 

الله يبارك فيك يا باشا
ربنا يكرمك ومايحوجك لمرور :)