|
رد: الأزمة المالية و حياتنا الشخصيه
بالرغم اني معترض تماما على وجهه النظر اللي بتقول اننا متأثرناش بالازمه
يمكن احنا سوقنا معاييره مختلفه .. لأن عدم نزول اسعار العقارات مش معناه استقرار اغلب اللي بيبني بيكون بايع و هو بيبني .. وناس كتير بتبني عقارات خاصه و مضطره تبني علشان المهله والارض متتسحبش منهم ابسط حاجه المهله اتمدت 6 شهور بالرغم من انخفاض سعر الحديد .. لأن ناس كتير مش قادره تبني واللي بيبني استثمار مش حيبني حاجه جديده الا لو كان ضامن بيعها او بايعها من الاول العقارات بتاخد وقت ... مبتنزلش في يوم و ليله .. و الشغل الحالي التزامات و ارتباطات قديمه ... لكن العبره بالجديد وبعدين طيب ما هي الناس اللي فلوسها في البورصه دي لما فلوسها نزلت اقل من النص .. حتفكر تبني .. او تشتري عقارات .. او تجدد عربياتها ... او تسافر سفريات مرفهه ... او تشتري كماليات ماهو دول مننا برضو و اكيد تأثرهم بالبورصه فرق معاهم وبالتالي السوق خسر شريحه كبيره من الناس طيب و العاملين بالخارح ... مصر فيها نسبه كبيره بالخليج ... لما يشوف الوضع هناك اكيد حيمسك ايده لأن الصوره مش مبشره ... ده غير اللي رجعو من هناك نتيجه توفير وظايفهم وتوقف بعض الاعمال ... خصوصا الاستثمار العقاري في دبي .. وبالتالي وظائف ومجالات كتيره مرتبطه بمجال البناء و التشييد ( تجاره - نقل - خدمات - وظائف اداريه - سلع استهلاكيه - اسكان - مواصلات - اجهزه كهربائيه - عدد - الات - .... ده غير العاملين بالمجال من مهندسين و مشرفين و محاسبين و اداريين و عمال و ...... ) لكن احنا فعلا مش حاسين بيها لأننا للأسف مبقناش بنحس ... بقى عندنا نوع من التبلد و الاعتياد على الضرب على الدماغ زي لما البنزين غلي ... او اي حاجه زادت اسعارها اكتر من الضعف في الكام سنه اللي فاتو العيش الضرايب الجمارك فواتير الكهربا و التليفون ... المدارس المواصلات العلاج وغيرهم كتير ياترى دول زاد متوسط الدخل قصادهم اد ايه !!!!! لازم نكون مبنحسش ... و الا كنا طقينا من زمااااااااااااااان على فكره انا لاحظت حاجه اليومين دول غريبه شويه ... نسبه الشحاتين زادت اوي .. |
رد: الأزمة المالية و حياتنا الشخصيه
مش عارف يا سامح باشا
بس اعتقد فيه مؤشرات علي التحسن انا لما خلصت الكلية سنة 98 كان اهلي مش مصدقين اني اشتغلت بمرتب 600 جنية دلوقتي اي عيل مطلعشي من البيضه بيتكلم عادي في مرتب 3000 جنيه نسبة السيارات الزيرو الجديدة نسبة اقتناء الموبايلات و الدش و الكمبيوترات و الات الكترونيه كتيره اسعار العقارات العالية و برده الناس بتشتري و اي مشروع بينزل بيتحجز ممكن تكون كلها مؤشرات وهمية و احنا في الاخر بلد مبتنتجشي حاجة عشان تتأثر اساسا |
رد: الأزمة المالية و حياتنا الشخصيه
على فكره يا احمد باشا .... انت كلامك صح ...
لكن تعالى نحسب حسبه صغيره ... احنا دلوقتي حوالي 80 مليون مواطن 35% تحت خط الفقر .. في الضلمه .. ادي 28 مليون ... 30% يدوبك عايشن ( بيقال عنهم متوسطي الدخل ) .. طبقه الكفاح اللي عمرها ما تطلع لفوق و سكتها لتحت وبس .. ادي 24 مليون ادي 65% ... يعني اكتر من نص البلد في الباي باي نشوف الباقي 10 % اغنياء = 8 مليون 5% باشاوااااات = 4 مليون ودول مش محتاجين كلام ... وبنشوفهم كل يوم فاضل كام .... 20% ... دول يطلعو 16 مليون .... هما دول اللي حضرتك بتتكلم عنهم ... انا و انت و اللي لسه طالع من البيضه ياخد 3000 جنيه ... اللي عندهم شقه و عربيه و موبايل و بيدخلو عيالهم مدارس لغات ( انت تعرف ان نسبه المدارس اللغات اللي عمالين نتكلم عنهم ليل و نهار يمثلو 5% من اجمالي مدارس مصر !!!!) ال 20% دول هما اللي بنشوفهم في النادي ... في السينما ... في ماكدونالدز .... في العين السخنه و راس سدر وقرى الساحل الشمالي العاديه خلي بالك ان طبيعه شغلك بتفرض عليك الاختلاط بناس معينه ... و البيوت اللي احنا عايشين فيهاوالشوارع اللي بنمشي فيها كل يوم مش هي دي كل مصر ..... مصر مليانه ... وزي ما في بورتو مارينا و شرم و الجونه و كمباوندات الصفوه في القاهره الجديده ... في مدينه نصر و العجوزه و الهرم و مصر الجديده و المهندسين و .... وفي السيده زينب و عابدين و بولاق و امبابه و الوراق ... وفيه برضو عشوائيات ( من غير ما نقول اسامي ) .. اذا كان شارع العشريني والتلاتيني وكفر طهرمس زحمه شوف الكثافه في العشوائيات بتبقى ازاي لأ و ايه الناس بتسيب الاقاليم و تيجي القاهره ... من حلاوتها !!!! الحمد لله على اللي احنا فيه |
رد: إلى شباب اللوست .. ارجوكو اكسفوا على دمكوا
هى low set ولا lost ؟ بمعنى بنطلون مهبط ولا ضايع ؟
|
رد: الأزمة المالية و حياتنا الشخصيه
يا باشا انا غلبان و زي ما بتعامل مع ناس مستوريين بتعامل مع فئات كادحه تعالي كده بصفتك مهندس و مقاول العامل ( الفواعلي ) اقل حاجة دلوقتي كام عشان تقوله السلام عليكم الصنايعية هل اسعار مصنعايتهم او يومياتهم دلوقتي زي مصنعياتهم من عشر سنين مين قالك ان سكان العشوائيات فقراء لما بتمشي جنب منطقه عشوائية مبتشوفشي دشات و تكييفات و عربيات كمان راكنه تحت و ناس عايشه و بيكلوا و بيشربوا كويس كمان كون ان شكل العمارات يقرف و الزباله ماليه الدنيا مش معناه ان الناس اللي عايشه فقيره طبعا غير فئة معينه في القري اللي تحت خط الفقر و لا تملك صنعه و لا تعليم و لا يصلها خدمات او تنمية دي اللي موصلهاش اي تنمية نقدر نقول ان لو فيه نمو هوا وصل اكبر نسبه منه لقمة الهرم لحد ما وصل للقاع مفيش اي حاجة وصلته سوء توزيع لكن انا رأيي الشخصي نحن بلد ليست فقيرة و لكنها متخلفه تماما ،، |
رد: الأزمة المالية و حياتنا الشخصيه
طيب ممكن الاول نحدد مفهوم الفقر
انت ممكن تكون عندك عربيه و شقه و فقير وممكن تركب دش و تجيب موبايل وتكون فقير هو الفقير ده لازم يكون شحات محلتوش اللضه !!!! ولا عايش في اوده تحت السلم او يادوبك معاه تمن تذكره الاتوبيس او مبياكلش اللحمه الا مرتين في السنه الفقير انسان عادي لكن امكانياته محدوده لدرجه انه ميقدرش يطور نفسه ... واللي ساكنين في حواري وعندهم عربيه مستهلكه .. بيجيبو عده نوكيا علشان دي اقصى امكانياتهم انا بقولك نسبه الفقر 65% ... تفتكر حيكونو عايشين ازاي ... في خيم الايواء الموظف اللي بيفتح الدرج فقير ... امين الشرطه اللي بيعمل مصلحه من المخالفه فقير ... صنايعي اليوميه اللي ماسك اجدث موبايل و علبه مارلبورو فقير ... اي حد بيركب الاوتوبيس فقير ..اي حد فوق ال 30 سنه و بيركب ميكروباص فقير ... اي حد مدخل ولاده مدارس تجريبيه او حكوميه فقير .... الفقير سواء فرد او عائله بيعيشوا بدون اي زيادات في موارهم الاقتصاديه و بيكون اجمالي دخله اقل او مساوي لاجمالي المصروف .. يعني معندوش مليم زياده و عايش على اده شوف يا ريس انت بتحتاج كام في الشهر علشان تصرف على البيت اكل و كهربا وسلع استهلاكيه و سلع يوميه ... و الرقم اللي يطلع ... اللي دخله اقل من كده يبقى فقير |
رد: تكلم حتى يراك الجميع ويعرفونك
طبعا موضوع رائع من شخص رائع وجزاك الله كل خير وفعلا الموضوع ده حصل بين الاعضاء (المشاحنات واختلاف الاراءوالخ......)وشكرا على موضوعك ال رائع
|
| الساعة الآن 10:18 PM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017