كتر الكلام حول فيشة الاوكتان وظبطتها المثاليه المترتبه على درجة اوكتان البنزين المستخدم فحبيت ان اوضح ظبطة الفيشه الصحيحه لكل نوع بنزين للتسهيل على الجميع
بسم الله نبدأ
فيشة الاوكتان
عباره عن jamper او كوبرى مثل الموجود فى هارد الكومبيوتر تختلف الفائده منه بحسب طريقة توصيله للاطراف المختلفه
مع الاختلاف
الفيشه فى الانوس لها ثلاثة اوضاع مختلفه للتوصيل يتناسب كل وضع منها مع نوع البنزين المستخدم فى التشغيل ( 80 , 90 , 92 )
وطبعاٌ توصيلها الصحيح المتوافق مع نوع البنزين المستخدم يؤثر بالايجاب على اداء العربيه بصوره خياليه
طيب مكانها فين ؟
تحت الكرسى اللى جنب السواق مباشره
هنقدم الكرسى لقدام على الآخر و هنرفع فتحة الموكيت من تحته
( فى الانوس 1 هنلاقيها جنب الكومبيوتر اللى داخل العلبه السوداء )
( فى الانوس 2 هنلاقيها جنب الضفيره الماره تحت الكرسى )
وده الشكل بتاعها
http://up3.up-images.com/up//uploads...51277e93af.jpg
طيب لقيناها شكلها ايه ؟
عباره عن فيشه داخل ليها ثلاثة اطراف ( بنى , اسود , بنى فى ابيض )
وفيشه موصوله بيها ( نصفها التانى ) موصله الطرفين ( الاسود , البنى فى ابيض ) بسلك اسود عليه ملصق مكتوب عليه 87 او 83
وده رقم الاوكتان اللى المفروض العربيه مظبوطه عليه
وطبعا ده مش موجود بمصر الحبيبه
طيب ممكن نظبطها على البنزين الموجود بمصر بأنواعه المختلفه علشان نحقق اعلى استفاده من الموتور ؟
ممكن طبعاٌ
المصممين للسياره كتر خيرهم تركولنا المجال اننا نلعب برقم الاوكتان المناسب لكل واحد فينا ( بعكس عربيات تانيه كتير ) لايوجد بها هذا الخيار ( وده من احد مميزات الدايو )
خلص الكلام النظرى
نخش بقى على العملى
قبل اى حاجه نفتح الكابوت و نفك القطاش السالب من البطاريه بمفتاح عشره
ونخش تحت الكرسى اليمين ونرفع الموكيت ونمسك الجمبر والفيشه
هنشيل نصف الفيشه الموجود به الملصق بالضغط على سوكت المنتصف مع الشد للخارج
هيطلع الجمبر فى ايدك وده شكله
http://up3.up-images.com/up//uploads...5d2f90571e.jpg
ونظبطه تبعاٌ لنوع البنزين المستخدم فى العربيه
وليه 3 ظبطات
ونبداء بكيس التوفير ( اقصدى بنزين التوفير )
1_ ال 80
الجمبر فى ايدينا له ثلاثة فتحات اتنين متوصلين ببعض بالسلك الاسود والثالثه من غير اسلاك
http://up3.up-images.com/up//uploads...2b5549ce59.jpg
بكل بساطه هنوصل طرف تالت من السلك الوسطانى الى الفتحه الفاضيه ( زى متكون بتوصل شعرة فيوز بالظبط )
تمام كده
هنرجع الجامبر للفيشه تانى
ونرجعه مكانه ونغطيه بالموكيت
ونوصل كابل البطاريه السالب تانى
ونعمل ايدل ليرن بالمره علشان كومبيوتر العربيه يظبط نفسه على الوضع الجديد
و بسم الله
واطلع جرب
2 _ البنزين ال 90
هنعيد الخطوات السابقه
بس المره دى هنشيل الفيشه
وبس
يعنى مش هنوصل اى حاجه
هنسيب الفيشه فى الهواء كده ونعين الجمبر فى البيت
http://up3.up-images.com/up//uploads...9d0658d8e1.jpg
تمام كده
هنرجع الجامبر للفيشه تانى
ونرجعه مكانه ونغطيه بالموكيت
ونوصل كابل البطاريه السالب تانى
ونعمل ايدل ليرن بالمره علشان كومبيوتر العربيه يظبط نفسه على الوضع الجديد
و بسم الله
واطلع جرب
3 _ البنزين ال 92
هنعيد خطوات الفك الاولى
هنمسك الجامبر فى ايدينا ونفك الكلبسين اللى فى اطرافه بالضغط للخارج بشويش ونرجع الغطا البلاستيك للخلف
وده شكله
http://up3.up-images.com/up//uploads...7cc400b62a.jpg
هنجيب مسمار 3 سم وندخله مع الفيشه اللى فى الطرف بالضغط لجوه
بالشكل ده
http://up3.up-images.com/up//uploads...45d61ad52b.jpg
وبعدين نشد المسمار والسلك لبره
هيطلع السلك معانا
هندخله تانى بس الناحيه التانيه يعنى هننقله من الطرف ده الى الطرف ده مع الحفاظ على الطرف الاوسط متوصل زى ما هو
وده شكله الجديد
http://up3.up-images.com/up//uploads...1351ef48f9.jpg
تمام كده
هنرجع الجامبر للفيشه تانى
وده شكله النهائى
http://up3.up-images.com/up//uploads...f086c33527.jpg
نرجعه مكانه ونغطيه بالموكيت
ونوصل كابل البطاريه السالب تانى
ونعمل ايدل ليرن بالمره علشان كومبيوتر العربيه يظبط نفسه على الوضع الجديد
و بسم الله
واطلع جرب
انا عن نفسى جربت كل التوصيلات دى فى عربيتى قبل ما اقولكم عليها
وده للأمانه
عربيتى دلوقتى على التوصيله التالته
لانها اقواهم فى اخراج قوة الموتور القصوى
بالتجربه وبدون فشر ( من 0 الى 100 ) فى 12 ثانيه و اقصى سرعه بدون مشكله ( 180 )
ممكن ابقى انزلكم الفيديو بتاع تجربة التسارع دى ( للمتشككين )
ده بجانب ان استهلاك البنزين اتحسن بصوره كبيره
المهم الموضوع كده خلص
اى استفسار تحت امركم
رقمى فى التوقيع
وطبعاٌ متنسونيش من دعواتكم الجميله
( بالشفاء لى ولزوجتى ولاولادى وبالستر وسعة الرزق )
ده لو الموضوع عجبكم
مستنى ردودكم
و
سلام مؤقت