|
|
رد: أدب الرحلات
ولازلنا فى مطروح
مرة جاى من مطروح وكنا فى رمضان وكان معايا موبايل نوكيا6150 وده موبايل قديم شوية وحطيته ف جيبى ونمت وكنت قاعد جنب الشباك فى اول كرسى على اليمين (جنب الباب)وصحيت عند قرية اسمها الشجاعة و دى بعد العلمين ب113 كيلو يعنى قبل م توصل طريق القاهرة اسكندرية الصحراوى بحوالى 20 كيلو (دايما وانت رايح مطروح تلاقى لجنة رادار عندها ) المهم صحيت من النوم ملقيتش الموبايل ودورت عليه فى جيوبى وتحت الكرسى وحوالين الكرسى لم اجده ففهمت انه وقع وحد لقاه واللى لقاه اخده ونظرا لانى فاهم ان الاتوبيس لو ترك الصحرا ودخل اى كافيتيريا او وقف لاى سبب يبقى ضاع الموبايل لكنه داخل الاتوبيس دلوقت لان اللى اخده مش معقول هيرميه من الشباك ونظرا ايضا لانى فاهم ان اى كمين بيبقى موجود فيه فرد مباحث فقلت للسواق احنا داخلين على كمين نهاية الطريق دخل الاتوبيس عليه لان موبايلى اتسرق فالراجل مشكورا قال انت كان معاك موبايل اصلا(كان الموبايل لم ينتشر زى اليومين دول انا معايا موبايل من 1998 وكان ال6150 موبايل غالى وقتها ) المهم اللى جنبى شهد قال /فعلا كان معاه موبايل وكنت شايفه بيلعب فيه قبل م نمشى وسواق الاتوبيس مشكور قال /ندور عليه الأول قبل م نظلم اى حد ووقفنا فى الصحرا على الطريق الدولى ودورنا حوالين الكرسى بتاعى ومفيش فايدة والراجل مشكور ووقف وشغل الميكروفون فى الاتوبيس وقال يااخواننا اللى معاه الموبايل يرميه تحت اى كرسى او حتى تحته هو نفسه واحنا مش هنسأل ولا نتهم حد وبعدها ب10 دقايق دورنا فى الاتوبيس وخاصة حوالين الكرسى بتاعى ومفيش حاجة فقال يااخواننا الموبايل فى الاتوبيس ولو دخلنا الكمين والشرطة لقيته هيبقى الوضع حاجة تانية وبرضه مفيش فايدة دخلنا الكمين وبصراحة السواق طلع ناصح ساب باب الاتوبيس مقفول ونزل من الباب بتاعه وقفله تانى علشان محدش ينزل منه وجاب واحد من المباحث وفوجئت بيه طلع الاتوبيس وقال فين صاحب الموبايل فقلت / انا فقال له تعالى / وفوجئت بيه بيفتشنى تفتيش رهيب وقلعنى لامؤاخذه الجزمة وفتشها فقلت له / انا المسروق فقال/ م انا عارف بعد كده قال خليك هنا جنب السواق وابتدا يفتش الركاب واحد واحد ويقلبهم تقليبة صح ويبص تحت كراسيهم ويدورببطارية رغم اننا كنا فى النهار وكل اللى بيتفتش ويبص تحت كرسيه ينزل من الاتوبيس طبعا فتش اللى جنبى وال2 اللى فى الكرسى اللى جنبنا وال2 اللى ف الكرسى اللى وراهم وبيفتش ال2 اللى ورايا فتش الاولانى ملقاش حاجة وفتش ال2 اللى قاعد ورايا مباشرة لقى الموبايل مزنوق بين الكرسى والشباك ورايا طبعا انا الموبايل كان فى جيبى الشمال بعيد عن الشباك لان الشباك على يمينى ولو بفرض كان ف جيبى اليمين مش معقول هيقع منى ويطير لفوق ويتزنق الزنقة السودة دى بين الكرسى والشباك وطبعا راح قابض على اللى كان ورايا واللى كان الموبايل مزنوق ناحيته وقال له /انزل والولد اتخض وفقد النطق تقريبا وقال لى /تعالى علشان نعمل المحضر وفتح المحضر وقال للولد / بطاقتك فأداله (اعطى له) / كارنية جامعى فقال له / ايه ده فقال / ده كارنيه الكلية س/ اسمك وسنك وعنوانك ج /فلان ................... س /المهنة ج /طالب بكلية التجارة جامعة عين شمس وهنا نافوخى اشتغل الولد حرامى لكنها غلطة ممكن تحوله لحرامى فعلا وطالب جامعه ويمكن ظروفه العائلية زفت ويمكن عايز يجيب اى حاجة لاهله وخصوصا العيد داخل واحنا فى رمضان وبعدين دى سرقة يعنى هيفضل محبوس على ذمة القضية وهيبقى عيد أسود على دماغ اهله وعيلته لان الباشا محبوس ودماغى وقفت وفقت على صوت بتاع المباحث بيهز ايدى ويقول هناخد اقوالك علشان نقفل المحضر فقلت / وبعد كده ؟؟؟؟؟؟؟ قال /حضرتك هتمشى وهو هيستنى فقلت / لا خلاص انا متنازل عن المحضر فقال/ مينفعش قلت له /خلاص انا جهازى رجع وانا مش عايز منه حاجة فى اللحظة دى دخل 2 من ركاب الاتوبيس سمعونى وانا بقول الكلمتين دول فقالو له / معلش وصاحب المحضر متنازل اهو وهو راسه والف سيف ابدا لايمكن ده هيـفضل هنا فواحد من الركاب طلع له 10 جنيه فقال /مش كفاية فانا طلعت 10 تانية وقلت خلاص بقى ده انا صاحب المحضر فقال ماشى العجيب بقى فى الموضوع ان الولد بعد م تاكد انه مروح بيتهم زعق فينا وقال بصوت عالى وهو باصص لى / انا مسرقتش حاجة مسرقتش حاجة حرام عليك انا مش حرامى انا مش حرامى فواحد من الركاب استناه لما اعصابه هديت وقال له / يعنى الراجل اتنازل عن المحضر ودفع 10 جنيه علشان تروح بيتكم تقوم تزعق فيه كده ؟؟؟؟ ده انت بارد صحيح وسكت و م ردش عليه ومشينا |
رد: أدب الرحلات
من اعجب الشخصيات اللى قابلتها فى سفرياتى
شخص كان شبه صورة ابو الليف جدا اللى كانت موجودة فى اعلاناته نفس الدقن والجسم والشعر المنكوش ونظرة العينين لدرجة انى افتكرته طلع شريط لما شفت الأعلانات مع فارق بسيط انه( بطل القصة دى) كان لابس بيجا مة كستور مخططة قذرة جدا (لابناء هذا الجيل اللى ميعرفوش الكستور دى عبارة عن بيجامة غالبا ماتكون مقلمة بالطول وهتلاقو الفنان حسين رياض دايما لابسها فى افلامه القديمة ومعاها طاقية ن نفس القماش) بس الراجل ده كان عجيب ليه ده تقريبا والله اعلم كان مريض نفسيا يركب قطار الساعة 3 ونص العصر من القاهرة و ده قطار عادى و زحمة جداااااااا وسريع جدا بيوصل 6 سيدى جابر والراجل ده كان دائما مايمشى فى القطار على اد ميقدر رايح جاى بسبب الزحام وبعد طنطا كان ياخد القطار كله رايح جاى بالطول وبكل همة ونشاط ومتفهمش ليه وبعد كده ينام فى القطار من 6 لحد 9 بالليل موعد رجوع القطار على القاهرة والقطار بيكون اروق شوية من وهو جاى وياخد القطار رايح جاى طول الوقت بهمة ونشاط حتى القاهرة يعنى من 9 الى 12 الا تلت رايح جاى بلا راحة وينزل محطة مصر ويخرج من باب جانبى علشان المباحث (كتير من الركاب ميعرفش ان فى افراد من المباحث بتبقى موجوده فى انتظار كل قطار داخل القاهرة بالذات ) واشوفه تانى يوم فى نفس القطار وهكذا وفى يوم قرر متفهمش ليه انه يقلع هدومه وفى يوم ركبت لقيته بالفانله الداخلية وبنطلون البيجامة زى ماهو وبقى رايح جاى كالعادة وبعد اسبوع فوجئت بيه راكب القطار كالعادة وبالفانلة الداخلية وهيا نص كم على فكرة لكن قلع البنطلون وكان شبه الغيارالداخلى بتاع الصعايدة (يعنى فى حجم وطول الشورت الشرعى بس طبعا قماشه دمور او بفته الابيض بتاع زمان ده ) وهنا الكمسارى شافه وقال له لا مش هينفع كده هتجينى بعد كده قالع عريان خالص انزل ياعم والراجل سبحان الله لم يناقش وراح نازل لكن الملحوظة الغريبة انى مشفتوش بيكلم حد ابدا رغم انه كان بيشبع تريقة من الركاب وهو رايح جاى بهمة ونشاط لدرجة مرة رئيس قطار/ قال له / اقعد بقى خيـلتنا انت متعبتش ؟ ولم يرد عليه وواحد تانى قال له / حرام عليك أرضية القطار هتدوب كده وبرضه لم يرد عليه واحيانا كانت التريقـة بتفتح عليه و مااأدراكم والشعب المصرى فى التريقة ولم يرد واذكر انى مرة اتخانقت مع واحد من الركاب بسببه لانه اتريق عليه بطريقة قذرة وصاحبنا لم يتدخل ابدا بل و كمل مسيرته رايح جاى ومن يوم م نزل الراجل د ه مشفتوش تانى تفتكرو ده ممكن يكون واحد اتجوز واحدة وماتت واتجوز تانى وقاعدة فى رقبته مماتش ومستنيها تموت فى اى لحظة زى واحد صاحبنا هههههههههههههه |
رد: أدب الرحلات
يا خالد باشا براحة علينا شوية, كله ضرب ضرب مفيش شتيمة.
متابعROSE4U...... |
رد: أدب الرحلات
اقتباس:
صاحبك دة كبيرة يقعد يكلم نفسة او ينزل يخرب فى العربية وممكن يطلع بيها يلف طول الليل تلاقية على طريق اسكندرية مطروح قاعد يلف بالعربية لغاية لما يزهق يطلع يقعد على الكمبيوتر كدة يعنى الا هو اسمة اية؟؟؟ |
رد: أدب الرحلات
اقتباس:
وانا كماااااااااااان هرو ح اعمل لجوء سياسي هناك وهما هناك متفاهمين يعني مثني وثلاث ورباع مش هنقف على واحده يعني هههههههههههههههه HUUMHUUM |
| الساعة الآن 08:43 PM. |
|
Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017