|
|
رد: رابطة ملاك ومحبى السفينه فيات 132
اقتباس:
حط زيت موبيل دلفاك mx3 ومعاه علبة كانز زيت شنبر اسمه ابرو او سيكلو وهتلاقي الدخنه اختفت وخرطوم الفايظ اللي بيطلع دخنه خلي الميكانيكي يطولهولك بحيث يكون تحت الموتور علشان الدخنه تبقي علي الارض دايما وبرده انتظر رأي العمالقه معانا |
رد: رابطة ملاك ومحبى السفينه فيات 132
انا امبارح يا جماعه كان عندى يوم ملهوش حل مقضيه من 9 الصبح لحد 12.5 بليل جنب العربيه اولا نزلت اشوف كمبورسر احمد صادق اللى كنت واخده منه فضلت قاعد منتظر الراجل يفتح اكتر من 3 ساعات المهم الراجل رفه على المخرطه بيكبس زى الفل لقينا المسمار اللى ماسك المكثف من فوق واحد مفوت والتانى سليم قالى نعمله جويط على المخرطه ونغير له الجوان لحد كدا زى الفل عملنا الجويط وركبناه واشتريت جوان وركب وقفل قفل تمام روح بقا اكبس فريون عشان نظبط ولسه الراجل بيحط اول دفعه فريون وهووووب فى تنفيس فى الكمبروسر المهم حطه فى المياه عشان يشوف التنفيس منين لقيت نفس العيب بتاع القديم اللى كان عندى فى حاجه اسمها ( شفط سيل ) دا بيركب على كرنك الكمبروسر عشان الفريون ميهربش منه دا بايظ وتمنه 275 جنيه غير ال تركيب قولت له لا خلاص مش هركبه المهم جه وقت الحساب الراجل بتاع التكييف خاد له 10 جنيه لزوم الكشف وبتاع المخرطه خاد له 40 جنيه شغل المخرطه و5 جنيه جوان لحد كدا واليوم زى الفل مفيش مشكله قولت انزل اجيب تيل فرامل قدام وخزنتين فرامل ورا وياريتنى ما روحت اشتريت التيل ب 30 جنيه والخزنه الواحده ب 40 جنيه يعنى حساب 110 جنيه وجبت جركن زيت امارات ب 77 جنيه و فلتر زيت ب 11 جنيه يعنى كله بالتقريب 200 جنيه قطع غيار فولت التانك وانا مروح بنزين 80 بالصدفه ب 40 جنيه يعنى لحد دلوقتى كله على بعضه 300 جنيه قولت اركب التيل والخزن بدأ الواد الصنايعى يركب الخزن اللى ورا ركب اليمين وبدأ ياخد هوا وكل مره الدواسه تحضن الارض اكتر من اللى قبلها لدرجه انى شكيت ان فى حاجه مش مظبوطه قولت له قفل العجله زى ما هى على كدا وركب تيل قدام ركب تيل قدام والعربيه حلفت ما تمشى المهم انا فكيت مواسير الماستر اللى على السيرفو وقمت متحرك بالعربيه لحد ما الفرامل ريحت ورحت للاسطى بتاعه شوف بقا المفاجأه ان الواد دا ساب الاسطى من زمان وعامل ورشه تانيه لحسابه انا ساعاتها كنت هولع فى الواد لو شفته المهم بص يا اسطى على العربيه خاد هوا الفرامل وطلعت اجرب العربيه تخيلوا بقا ادوس فرامل العربيه تجرى ههههههه وربنا حصل ما بهرج المهم اشتغلت على الهاند بريك لحد ما رجعت له تانى فك العجله اللى ورا اليمين وبص على المواسير والرجلاش كله تمام قالى كدا ربنا يعوض عليك فى المستر اللى فوق طيب العمل انزل هات واحد استعمال بس الحق احسن بكره طنطا قافله طيب ايه العمل كلمت الحاج ايمن دره قالى موجود بس تلحق تيجى احسن هنقفل خدت عربيه مخصوص روحت له المحل لقى كل اللى موجود قافش قالى انزل على المخزن وخد اللى انت عاوزه روحت المخزن قابلت الواد هناك قعد يفك فى المساتر اللى موجوده كلها قافشه لحد ما خلاص كنت زهقت قمت ظارفه السيجاره وحاجه ساعقه لقيت العمل اتغير بدأ يجيب حاجات كويسه المهم توصلنا لواحد كويس حسابك كام قالى 55 جنيه وبعلبة الزيت الباكم ب 85 جنيه قولت له مش محتاجه فكها وخدت المستر وروحت للميكانيكى وانا رايح لقيت حادثه جامده نزلت وانا اللى كان معايا اشوف ايه اللى حصل وازى بيا الاقى واحد معرفه عامل الحادثه ومراته معاه والاسعاف جات تاخد مراته لانها اتبهدلت شويه من الخبطه لانها كانت من الجنب وركنا العربيه وسلمت عليه ومشيت وصلت للميكانيكى كنت خلاص مش قادر حصل هبوط ووقعت من طولى وجابوا عصير وسوايل لحد ما بقيت تمام وكان ركب المستر وحضر الزيت وكله زى الفل طلعنا نجرب العربيه العربيه بتقف بس بترمى فى الفرامل وبتكن بمجرد رفع رجلك من على البنزين رفعنا عجله عجله على الطريق ولقينا العجله الشمال ورا قافشه المهم قرص شويه ورجعنا الوشه فكينا الخزنه بتاعتها وغيرنها بالجديده وبياخد هوا مفيش زيت بينزل اووى راجع على الضفدعه اللى ورا والخزنه كله زى الفل لكن العجلتين اللى ورا مش بيضربوا فرامل لان الخرطوم اللى رايح للمشترك مسدود كان الكلام دا الساعه 12.5 قولته قفلها زى ماهى لحد اما اجيب خرطوم هى دى بقا قصه يومى بس كان يوم ابن لذينه MADMADMADMADMAD لسه باقى الخرطوم ب 35 جنيه وحساب الميكانيكى 50 جنيه وتمن علبتين زيت باكم 450 مل ب 12 جنيه الواحده ادعولى احسن انا كرهت العربيات القديمه اووووى امبارح بسب ام الحوار الحمضان دا وعلى رأى هشام الجزار العربيات دى تصرف عليها جنيه نزاهه تأدبك ب 10 |
رد: رابطة ملاك ومحبى السفينه فيات 132
لازم يعدي عليك يوم زي ده الدنيا تعرقب معاك بس معلش هتلاقي العربيه بقت فل معاك ان شاء الله
|
رد: رابطة ملاك ومحبى السفينه فيات 132
اقتباس:
خد التقيله بقا العربيه النهارده كانت هتعمل اكتر من 10 حوادث كان اخرها هشيل واحد العربيه مش بتمسك فرامل بل بالعكس كل اما تدوس فرامل تجرى اكتر وساعات تقف كويس وبعد تفحيص تانى وجد ان الخرطوم اللى كان مسدود ورا اتفك وكان لازم يترجلش العجل اللى ورا وياخد هوا المهم عملنا الدنيا زى الفل روحت من طنطا للبلد لقيت العربيه كل مدى بتتقل فى السحب وعاوزه تحدف شمال عقبال ما روحت لقيت العجله اللى ورا شمال بتدخن على الاخر وقفشت ودا معناه ان الخرطوم قفل على ضغط الزيت يعنى العجل اللى ورا ضارب فرامل ولسه بكرا هجيب خرطوم جديد بدل اللى بيزاولنى دا لانى خلاص زهقت وبفكر اغير واجيب بيجو 405 اتوماتيك اعلى فئه |
رد: رابطة ملاك ومحبى السفينه فيات 132
اقتباس:
والله يا قاضي الواحد بيتمنالك انك تركب احسن منها وفعلا البيجو اقل حاجه تركبها بعد السفينه بس يعز علينا انك تبعها وميبقاش معاك الوحش وكمان هتنزل من كارونه تركب كبالن والله كنت بتكلم مع والدي بقوله مش عارف اركب ايه بعديها وبقول لو ربنا كرمني نفسي في مرسيدس تمساحه 200 او شيروكي تسعينات بس تكون 4 سلندر وبعدكده نفكر في ال بي ام المهم بقي اخر اخباري روحت للسروجي بتاعي واتفقت معاه انجد الكرسيين والكنبه بس هيفك فرش الفابريكا الشمواه البيج وهيركبهولي تاني وتركب عليه كسوه واغير كاوتش الابواب والسقف والقوايم بعدين علشان الفلوس مش جاهزه معايا و كمان اول الشهر عندي حملة صيانه زيت وفلتر وكاتينه وسير دينامو وتنضيف الكربراتير وتغيير تيل فرامل |
| الساعة الآن 10:13 PM. |
|
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017