مصر موتورز مجتمع السيارات - مخطط تصفيه الثوره ,,

رجــــــال
يعرفون قدرها
,,المجد للشهداء
شهادة مجند طبيب عن مشاهداته في مجزرة الفرافرة: عندما سقطت يد شهيد.. والله لن اذوق فرحا بعد اليوم

كتب المجند طبيب أحمد فتحي أبو القمصان على صفحته على موقع التواصل الإجتماعي فيسبوك يقول " كنت مريح في أوضتي كالعادة.. رن جرس التليفون "" إطلع طيران حالا يا دكتور ""
- أطلع انا ولا المسعف كالعادة ؟!!!
- إنت بنفسك .
-تمام يا افندم ... هغير و اطلع .
بصيت في الساعة ... كانت 6.20 ... المغرب قرب !!!
الاستعدادات لم تكن لتدريبات الطيران المعتادة .
الطيارة طالعة في مهمة .
و انا مش جاي اراقب !!!
ركبوني الطيارة بسرعة ... و اقلعنا .
...
كنت سعيدا جدا.
دي مش أول مرة أطير مع الجيش في هليكوبتر .
دي أول مرة أطير في حياتي خالص !!!
فكرت اتصور ... ورجعت في كلامي عشان ما يبانش اني طفولي .
أذان المغرب و احنا طايرين ...
قسمنا كام بلحة علي بعض و شوية ماية كانوا في الطيارة .
و سألتهم احنا رايحين فين ؟!!!
طيب حصل ايه ؟!!!
محدش عارف .
...
وصلنا وجهتنا في حدود الثامنة مساءا .
اعداد هائلة من سيارات الاسعاف .
تسارعت ضربات قلبي .
هبطت الطائرة .
حاولت أخرج ...
استني ... لما نشوف الاول .
خرج رقيب و مساعد جريا .
و انا متابع من شباك الطيارة .
رجعوا جري ...
- أنزل ؟!!!
- لأ
- ليه ؟!!!
- كله ميت !!!
...
و بدأ حمل الجثث الي الطائرة .
دخلت الجثة الاولي محمولة بايدي جنود من الجيش .
الثانية ...
و الثالثة ...
و انا مش عارف اسال ايه اللي حصل ..
دخلت الجثة الرابعة ....
و فجأة ... وقعت ايده من البطانية الملفوف فيها .
ميزت البدلة اللي لابسها .
كانت بدلة الجيش ... و الجثث كلها لجنود من الجيش .
عندها بدأ عقلي يرسم ما حدث .
- أبص عليهم تاني يمكن حد عايش .
- ملوش لازمة يا دكتور .
كانوا يقرأون الهيستريا علي ملامحي .
عندها فهمت
لماذا يضع الجنود ايديهم علي الجثث بعد رصها
انهم يودعون رفاقهم .
...
رصينا ثمان جثامين ...
خلصت الاماكن المخصصة للجثث .
- مفيش مكان !!!
- رص في الأرض .
بدأت افقد أعصابي ...
- أبص عليهم تاني يا جماعة ... يمكن حد عايش .
- اهدي يا دكتور خليهم واقفين علي رجليهم .
...
افترشت ارضية الطائرة بالجثث !!!
- كفاية .
- رصوا فوق بعض !!!
بكيت كما لم يحدث من قبل .
كانت الدموع تجري و انا اراقب الجنود تحمل رفاقها .
دون وداع .
لم يكن احدهم يبكي .
لكن صوتي بدأ يعلو تدريجيا ولا اراديا .
أدركت أنني (( أضعف رجال الجيش )) .
رقدوا سويا كما تعودوا أن يناموا سويا .
لم تفارقني رائحة دمائهم إلي الان .
أشهدكم أيها الشهداء ... أنني لن أنعم بفرح بعد اليوم .
الفاتحة .