رد: حد قفل ال 100 ألف كيلو باللوجان
 

نصيحة مخلصة : اهتموا بالصيانات الدورية فى مواعيدها ، علشان تحافظوا على العربية وعلشان تحافظوا كمان على الضمان اللى هو حاجة مهمة جداً زى ما هاوضح.

أنا استفدت من الضمان فى التالى :

• بعد 3 شهور من عمر العربية ، حسيت بخبط فى المطبات فى العربية من قدام ، وكان المساعد باظ وجاب زيت ، وغيروه فى الضمان بدون أى تكلفة ، وكان سعره ساعتها 550 جنيه.
• فيه عيب مشهور ومتكرر فى العربية ، وهو ان بعد ما تمشى بضع عشرات الآلاف من الكيلومترات بيحصل خلل فى بوابة الانجكشن Throttle body وتلاقى العربية تبطل لوحدها لما تكون على السلانسيه ، وأحيانا الـ rpm يعلى لوحده ، ودى أعراض تستلزم تغيير البوابة. وده حصل معايا لما وصلت لـ 50 ألف ، والحمد لله غيرتها برضه فى الضمان بدون تكلفة بالبوابة الجديدة. وعرفنا ان البوابة الفابريكة صناعتها مش أد كده ، وان البوابة الجديدة اللى بيتم تركيبها مافيهاش المشاكل دى
• فيه بعض العربيات برضه (خصوصاً فى الموديلات الأولى) بتحتاج تغيير طنبورة الدينامو وسير الدينامو .. لأن برضه طنبورة الفابريكة يبدو ان عمرها مش طويل وبتعمل مشاكل مع التقدم فى عمر العربية ، والحقيقة التوكيل بينصح بتغييرها حتى بدون ما العميل يشتكى من حاجة لو كانت من النوع الردئ، وده حصل مع ناس كتير من زمايلنا. لكن اللى حصل معايا مختلف ، وهو انى لما نهاية الضمان قربت وماحدش طلب منى تغيير الطنبورة ، رحت الصيانة وطلبت من المهندس يكتب فى الاوردر : طلب الكشف على الطنبورة ، وفعلاً صدق حدسى وطلعت من النوع الردئ وغيروها مع سير الدينامو بالطنبورة الجديدة اللى مش بتعمل مشاكل. على أى حال موضوع الطنبورة ده مابقاش موجود فى العربيات الجديدة اللى بقت تنزل بالطنبورة المعدلة.
• فيه برضه عيب متكرر وحصل معايا ومع زملاء كتير ، وهو انك تلاقى مؤشر الحرارة مش زى ما انت متعود ، المفروض بعد ما العربية تسخن ، يبقى على أربع شرط ، لكن انت بتلاقيه نزل لشرطتين شوية ورجع تانى لأربع شرط ، وده بيبقى عيب فى ثرموستات الكوعة ، وبيستلزم تغيير الثرموستات + الكوعة ، ودول برضه غيرتهم فى الضمان.

الحاجات دى كلها على فكرة (ماعدا عيب المساعد) حصلت معايا فى الشهرين الأخيرين فقط ، وكانت العربية يادوب عدت 50 ألف ، والحمد لله لحقتها قبل ما الضمان يشطب .. علشان كده بألفت نظركم لأهمية المحافظة على الضمان بالمحافظة على الصيانات الدورية، لأنهم قبل ما كانو يغيروا لى حاجة ، كانوا بيتأكدوا من كل الصيانات (المدفوعة بالذات اللى هى العشرات) ، وكانوا فى كل مرة بياخدوا كتيب الصيانات ويصوروها قبل ما يقرروا يعالجوا المشكلة تحت مظلة الضمان.

رد: حد قفل ال 100 ألف كيلو باللوجان
 

فيه حاجة تانية بقى ، هايفة شوية ، بس معقدانى ، وهى الضعف الشديد جداً للصاج فى منطقة الرفرف الخلفى الأيسر .. فى الحتة اللى هى ورا باب العربية الخلفى الأيسر ..

الحتة دى لو يا دوب ريحت عليها سنة أو حتى ضغطت عليها بايدك ضغطة بسيطة ، هتلاقيها دخلت لجوه وانبعجت ، هتحاول تردها ، ممكن تترد معاك ، بس هتلاقى حد ابن حلال ييجى يسند على العربية سندة بسيطة ، فتنبعج تانى ، وهكذا مش هتخلص.

مش هانسى آخر مرة كنت فى التوكيل الأسبوع اللى فات ، فيه تندة كده بتقف تحتها العربيات بزواية 45 مستنية دورها فى الصيانة ، وبتاخد بتاع 12 عربية ، فأنا كنت فى وضع شايف فيه كل الرفارف الخلفية اليسرى للعربيات اللى واقفة بحكم زاوية وقوفها ، فلقيت كل العربيات اللى مش لوجان صاجها زى الفل ، بينما كل العربيات اللوجان اللى كانت واقفة كانت متعلمة بالبطحة المميزة فى الحتة دى ، وطبعاً عربيتى كانت مشرفة وسطيهم والبطحة منورة عليها ، ماعدا عربية واحدة بس كانت لسه بورقها ، بس الدور هييجى عليها برضه فى يوم من الأيام.

رد: حد قفل ال 100 ألف كيلو باللوجان
 

الخلاصة فى تقييمى للعربية فى التلات سنين دول ، انى راضى عنها والحمد لله وربنا يديمها نعمة ..
بس جه الدور بقى على حد العربية قعدت معاه شوية بره الضمان يقيم لنا العربية من هذه الزاوية .. لأنه هيتكلم بطريقة مختلفة وهيقول كلام جديد من نوعية أسعار قطع الغيار والمصنعيات فى التوكيل، أسعار قطع الغيار بره والتوكيل ، والأهم من ده كله مدى توفرها وخاصة قطع الغيار الاساسية.

رد: حد قفل ال 100 ألف كيلو باللوجان
 

EgyZizo
:Bravo::Bravo::Bravo::Bra vo::Bravo:

رد: حد قفل ال 100 ألف كيلو باللوجان
 

شكرا ياباشا على المعلومات القيمة وننتظر رد من معه لوجان خارج الضمان

رد: حد قفل ال 100 ألف كيلو باللوجان
 

مازلنا في انتظار باقي الاعضاء

رد: حد قفل ال 100 ألف كيلو باللوجان
 

EgyZizo

:Wkiss5::Wkiss5::Wkiss5: