|
رد: التريللا
سلامو عليكم
ردا على استفسارات الزملاء الاعزاء د نوح بيسأل عن جرار 8 و10 و12 طيب ماتيجي الاول نعرف الفرق بين الجرار والتريللا لحد مانوصل لاجابة السؤال بتاعك الصورة الجايه دي تريللا بمقطورتها http://masrmotors.com/vb/picture.php...219644&thumb=1 والصورة دي جرار بمقطورته http://masrmotors.com/vb/picture.php...219644&thumb=1 زي ماهوا واضح من الصورتين ان التريللا جزئين الراس والديل ... الراس اللي قدام مافيهاش مكان للبضاعه خالص البضاعه كلها بتتحط ف الديل انما الجرار الجزئين بتوعه عباره عن الجرار اللي قدام وده على ظهره مكان لتحميل البضاعه ومنفصل عنه المقطوره اللي بتحمل حموله اضافيه وعشان نفهم الفرق اكتر هنتخيل ان الاتنين عطلوا على الطريق وعليهم حمولتهم عطل مثلا ف الموتور وما ينفعش يتصلح على الطريق ميزة التريللا اننا نقدر نسحب التريللا من تحت الديل وندخل تريللا تانيه تاخد الحموله وتسافر ونسحب التريللا العطلانه للورشه الجرار لأ محتاج جرار يشد الجرار اللي قدام ويوصله لمكان تعتيق البضاعه وجرار تاني يشد المقطوره ويوصلها لنفس المكان الصورتين دول بيوضحوا ازاي بنفصل الديل لوحده ومكان اتصال الديل بالتريللا http://masrmotors.com/vb/picture.php...219644&thumb=1 ادي الديل لوحده اهه واقف على رجليه والتريللا واقفه اهه هتدخل تشده عن طريق الصينيه بتاعتها اللي هيا الحته السودا المدوره اللي فوق الشاسيه ورا http://masrmotors.com/vb/picture.php...219644&thumb=1 طيب لما التريللا عمليه اكتر من الجرار ليه الاهالي اللي هما مش الشركات كانوا دايما ميالين للجرارات مش للتريللات اقولك سبب بسيط ان القطعه الاماميه من الجرار ممكن استخدمها لوحده للحموله يعني نص حموله لما يكون الحموله بسيطه واوفر كاوتش وسولار هيروح لما اشغل الاتنين مع بعض على الحموله الصغيره طيب ليه الحكومه عايزه توقف الجرارات وتشغل التريللات اقولك شوف الصورة دي http://masrmotors.com/vb/picture.php...219644&thumb=1 ده مكان اتصال الجرار بمقطورته واسمه الهوك وبيعتمد الاتصال بين الاتنين على حاجه اسمها بنز حاجه زي المسمار بس تخانتها حوالي 4 سم .. المسمار ده هوا الرابط بين الجرار ومقطورته فقط لاغير ومن هنا بتحصل المشاكل ان المسمار ده لو مش متامن صح ممكن يملص يعني يفلت من مكانه وتلاقي المقطوره ماشيه مع نفسها وممكن تعمل كارثه لا قدر الله طولت عليكم شويه ياللا معلش بس اتمنى تكون معلومات تفيدكم وتقربكم شويه للمجال المهم ده والغير معروف بالنسبه لكتير من الزملاء سلامو عليكم |
رد: التريللا
اقتباس:
بس ابقى هات عشاك معاك يمكن اكلنا ما يعجبكش مش بخل يعني ولا حاجه |
رد: التريللا
:01EDE7~120::01EDE7~120:: 01EDE7~120:
|
رد: التريللا
http://www.fleetsaleswest.com/photos...295s_898_2.JPG
السلام عليكم النهارده هندردش شويه عن الكاوتش ف العربيات النقل طبعا كلنا واحنا معديين جنب العربيه النقل ما بنبقاش شايفين غير الكاوتش بتاعها وده لان ارتفاعه من الارض متر وشويه عجلة الكاوتش ف النقل نفس الفكره ف الملاكي بس الحجم كبير شويه والمقاسات المشهورة ف مصر هيا ال24 يعني جنط 24 وده بيكون بشنبر داخلي وبيفضل للجرارات اللي بتحمل حمولات عاليه فوق ال50 طن او بتشتغل ف المحاجر والمقاس التاني هوا ال20 ومعناه ان الجنط بتاعه مقاسه 20 بوصه وده برضه بشنبر وبيستخدم للحمولات الاقل اللي بتكون في متوسط 30 او 40 طن والمقاس التالت وهوا اللي عليه الاعتماديه اكتر دلوقتي وهوا ال22.5 او ف السوق بنسميه التيوبلس وواضح من اسمه ان هوا تيوبلس بدون شنبر وده بينزل في اغلب العربيات النقل الجديده لو عايز تسلي نفسك وانت معدي جنب النقل ابقى شوف لو الجنط بارز بشفته ومغطي على شفة الكاوتش يبقى ده بشنبر لو فرده كبيره تبقى 24 لو عاديه تبقى 20 ولو لقيت شفة الجنط مقابله شفة الكاوتش ومش مغطياها يبقى ده تيوبلس انما مافيش فرق بين التلاته لو فرده انفجرت هتسمع نفس الصوت المرعب و واللي بنسميه في لغة السواقين الفرده شيعت يعني انفجرت بنلاحظ كمان ان الكاوتش ف العربيه النقل بيكون 2 جمب بعض مش واحده زي الملاكي وده علشان الحمولات الكبيره اللي بتبقى العربيه شايلاها فيه كاوتش طالع جديد اسمه دوبلس doubles وده هنشوفه قريب منتشر ف النقل بدل الفردتين اللي جمب بعض هتبقى فرده واحده بس عريضه شويه الكاوتش هو المستحوذ الاكبر على المصاريف عند مالك النقل لان العربيه الواحده فيها من 14 الى 22 اطار حسب الموديل والعربيه بتحتاج تغير الكاوتش كله مره ف السنه فبيكون صاحب العربيه محتاج من 40 الي 70 الف جنيه لتغيير الكاوتش كل سنه بس ده للعربيه اللي بتعمل 80 الف كم ف السنه فاكتر ولكن اللي بيعمل اقل من كده بيكون مصروفه اقل طبعا فاضل اننا نعرف ان كاوتش النقل بيتاثر اوي بالحموله الزايده وممكن تؤدي الى انفجار الاطار بسهوله وكمان بيتاثر بالطريق لان طبعا يمين الطريق مصمم انه يكون فيه ميل يعني الطريق دايما مايل ف اليمين ولو تخيلنا سواق ماسك يمينه وماشي بيكون العجل اللي ف اليمين كله اللي هوا اتنينات حنب بعض او دوبل زي ما بنسميه بتكون العجله اللي برا نازله لتحت شويه والعجله اللي جوا شايله اكتر منها ومعرضه للتاكل او للانفجار ومن هنا ممكن نفسر ليه سواق النقل دايما ماشي ف الشمال ومش عايز يروح ع اليمين اتمنى اكون افدتكم ولحد ما نتقابل تاني اقولكم عجله واحده قدام علشان اعرف اركن سلامو عليكم |
رد: التريللا
يا باشا الف شكر على المعلومات الجامده دي ..
وتقرير ممتاز فعلا .. |
رد: التريللا
الف شكر على المعلومات الكبيره اوى ده والكبير كبير
|
رد: التريللا
السلام عليكم
النهارده جايب لكم شوية صور من جوا كابينة العربيه النقل الصوره الاولى دي تابلوه العدادات زي مااحنا شايفين عداد للRPM على اليمين ومعاه ساعه رقميه ودرجة حرارة الكابينه وعداد للسرعه على الشمال ومعاه عداد الكيلومتر وعداد ممكن تصفره ف بداية اي رحله وفي النص فيه كمبيوتر متعدد الوظائف هنتكلم عنه بالتفصيل في مشاركه جايه ان شاء الله العداد اللي تحت على اليمين عداد شحن الهوا وعلى الشمال ده مؤشر السولار [IMG]http://up11.up-images.com/up/viewimages/29083fafc1.jpg[/IMG] الصوره اللي جايه صورة للتابلوه وطارةالدركسيون الي فيها زرايرمالتي فنكشن وكمان ممكن تغير للفتيس من الزراير دي والدراع الصغير اللي ف اليمين ده فرملة اليد واللي جنبه عصاية الفتيس ..... مفاجأه مش كده ؟ كنتوا متوقعينها اكبر من كده بكتير والدراع اللي ف يمين الطاره ده دراع المساحات وكمان بيستخدم في تصفح الكمبيوتر المتعدد الوظائف وفيه مفتاح في شمال الصوره ده لضبط النور الامامي [IMG]http://up11.up-images.com/up/viewimages/6bcea20307.jpg[/IMG] والصوره اللي بعد كده ده دراع النور والسارينه لان العربيه النقل ليها كلاكس زي اللي ف عربيتك المفروض ان السواق بيستخدمه داخل المدن ومعاه سرينه اللي هيا بتميز العربيات النقل اول ماتسمعها تعرف ان فيه عربيه نقل على الطريق ودي بتشتغل بالكهربا والهوا ........ حد لسه فاكر الهوا ؟ بتاع فسسسسس [IMG]http://up11.up-images.com/up/viewimages/3a72b3b33b.jpg[/IMG] واخر صوره معانا النهارده هيا صورة الباب وبنلاقي فيه مفاتيح الزجاج زي الملاكي برضه وكمان السماعه وهوايات التكييف ومكان كبير للجرايد اوالخرايط بس السواقين بيستخدموها استخدام تاني خالص وبيعبوها قزايز ميه للشرب علشان المشوار الطويل [IMG]http://up11.up-images.com/up/viewimages/3e957ea386.jpg[/IMG] اتمنى تكون الصور عجبتكم واروح انا الجراج بقى سلامو عليكم |
| الساعة الآن 01:44 PM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017