المشاركة الأصلية كتبت بواسطة romioromio (المشاركة 514456)

مشكلة مصر الازليه

انك لو بتشتكي لوحدك يقلك ده احساس فردي واحنا اساسا معندنش احترام الفرد

ايه يعني لو احساس فردي.........هو مش دافع فلوس يعني

وبعدين الوكيل اعترف انه فيه مشكله

لأ وقال يقلك الناس متعايشه معاها
و200 بس اللي اشتكوا

يعني معترف والجهاز مش بيعمل حاجه

المشاركة الأصلية كتبت بواسطة saidbakr (المشاركة 514318)

السلام عليكم، انا أحد ملاك لوجان 2011 وكتبت من قبل على منتديات أخرى حول مشكلة الحرارة في صالون لوجان وحبيت اوصل ما توصلت إليه ﻷعضاء منتدى مصر موتورز، ﻷن حل هذه المشكلة بجد وفاعلية، محتاج تضافر جهود كل ملاك لوجان وتوجهم بالشكوى إلى جهاز حماية المستهلك. مشكلة الحرارة يا جماعة أصلها ماسورتين لنقل المية السخنة من تبريد العربية -الريداتير وخلافه - إلى داخل الصالون للحصول على التكييف الدافيء. الماسورتين دول بيظهروا بوضوح شديد جنب دواسة البنزين وما عليهمش أي عزل، بالاضافة لكدة إنهم بيدخلوا مية سخنة من دورة تبريد العربية عمال على بطال وحتى لو انت مشغل التكييف البارد. نتيجة لهذا إنك ممكن تحس بحرارة عند رجليك ورجل اللي قاعد جنبك، كمان تحس بحرارة في الكونسول. ده شيء طبيعي جدا ﻷن الماسورتين بتشيل جواها مية درجة حرارتها ما تقلش عن 80 درجة مئوية ومن غير عزل. http://s4.postimage.org/a38di63o/image.jpg اشتكيت في صيانة ال 5000 من الموضوع ده، قاموا حطين حتة موكيت او بيسموها لباد، حتة صغيرة كدة، وطبعا وزي ما توقعت ما عملتشي حاجة. بعد كدة اشتكيت إلى جهاز حماية المستهلك، وبعد استفسار منهم واتصال وهكذا، لاقيت الاستاذ عمرو ابوالفتوح مدير خدمة العملاء بيتصل بيا وبيقولي مشكلتك سهلة وهنحلهالك وحدد معايا ميعاد وروحت التوكيل - كل مشاوري في فرع العبور- روحت ع الميعاد لاقيتهم كبروا حتة الموكيت شوية وطبعا فضل الوضع زي ما هو. اتصلوا بيا في الجهاز - جهاز حماية المستهلك - يسئلوني عن رأيي قولتلهم ان المشكلة زي ما هي. بعدها بحوالي شهر ومن يوم اﻷحد اللي فات، تلقيت تليفون من الجهاز بيقولولي إن في لجنة بكرة الاتنين علشان مناقشة وفحص للعربية في 96 شارع احمد عرابي المهندسين - مقر جهاز حماية المستهلك- قلت ماشي هحضر. طبعا انا روحت وما كنتش محضر نفسي كويس، كنت معتمد على اللجنة إنها هتكشف وكدة، لكن فوجئت إن الاستاذ عمرو بيقول للجنة إننا بيعين 15000 عربية وما اشتكاش من الموضوع ده سوى 200 وال200 حلينا مشكلتهم بما ادعاه لباد، والخلاصة إن ما حديش اشتكى غيري انا وان شكوتي دي اصلها احساس فردي موش شيء واقعي. المهم اللجنة حفظت الموضوع، واعطوني رقم الشكوى المسجل عندهم، وقالولي ما فيش داعي للفحص ﻷن مندوب الشركة بيقول إن فيه ماسورة زي ما انت بتقول، وإن الفايدة إن ناس تانية تشتكي غيرك علشان يبقى شيء عام موش فردي. علشان كدة، انا بأكد لكم جميعا، بأن المشكلة دي حقيقية نظرا لوجود الماسورتين ودرجة حرارة المية اللي فيهم وبدون عزل، وابسط مشكلة تسببها هي تقليل كفاءة التكييف البارد. واللي عاوز يتأكد يحط إيده عند المكان الموضح في الصورة. من هذا أدعوا كل واحد تهمه المشكلة دي في عربيته إنه يشتكي لجهاز حماية المستهلك فورا.