مصر موتورز مجتمع السيارات

السلام عليكم جميعا

أولا أحب أشكر كل اللى شارك فى الموضوع و نصحنى .. و أحب أعتذر كمان لأى حد دخل يقول رأيه معانا و الناس هاجمته !!

أما بعد فأنا عملت زى ما قلت لحضراتكم و رحت التوكيلين و إتفرجت علشان أحكم بنفسى على العربيتين و آخد قرارى و إليكم بالتفصيل كل ما وضعت يدى عليه فى هذه الرحلة حتى يستفيد منه الجميع

1- الشكل الخارجى:
- اللوجان : جميلة جدا و شيك
- اللانوس : كلنا عارفينها عادية يعنى

2- التقفيل الداخلى:
- اللوجان : خامات زباااااااالة بمعنى الكملة .. تحس إن التابلوه معمول من بلاستيك اللى بيلموه من صفايح الزبالة و فيه رايش كده و ملمسه عجيب مش فيبر ابدا .. اما الزراير سايبة و تحس الزرار هايفك فى إيدك و إنت بتلفه .. الصالون عادى جدا .... الصراحة إتصدمت لما دخلت العربية من جوا مالهاش علاقة ببرة خااالص
- اللانوس: نضيفة جداااا من جوا .. خامات و تقفيل ممتاز .. مش فخمة جدا طبعا لكن مقارنة باللوجان حسيت إنى كنت فبولاق و طلعت على المهندسين

3- المساحة الداخلية:
- اللوجان : عادية مش واسعة اوى زى ما الناس قالت .. شنطتها هى اللى بحرررر
- اللانوس : نفس مساحة اللوجان تقريبا .. الشنطة بقت اوسع من الموديلات القديمة لإنها بقت لحد الكنبة اللى ورا يعنى شنطتها واسعة هى كمان بس اقل من اللوجان

4- قطع الغيار:
- سألت على كام حاجة كده فى التوكيلين لقيت اللوجان أغلى لكن مش بكتير

5- المعاملة:
- تقريبا واحدة فى الإتنين ما عدا فى توكيل رينو كان فيه واحد تبت كده بيفرجنى على العربية وكان مصر يحسسنى إنها بتقول بابا و ماما حتى لو كدب عليا و قالى إن الشنطة بتتفتح بالسنتر مش بالمفتاح!!

6- إعادة البيع:
النقطة ديه خطيرة جدا و لعبت دور كبيييير فى قرارى النهائى
- لانوس : شركة شيفروليه لما حبت تطور اللانوس وسعتها و علتها و عملت صالون فخم و نزلتها فى السوق أغلى 10 الاف جنيه بإسم أفيو ... يبقى اللى معاه لانوس ما إتأثرش و ممكن يبيع عربيته بسهولة لو عايز

- لوجان : و أنا فى التوكيل عرفت إن الشركة بدأت تنزل حاجة جديدة إسمها بلاك لاين التابلوه بتاعها فيه حتة منه سودا و الكاسيت بقا إم بى ثرى و ليه زراير ورا التارة و الفرش متغير و تمنها زيادة ألف جنيه بس ......... كل الكلام ده جميل بس إيه الكلام لو الشركة قعدت تنزل كل شوبة تحسينات فى العربية بفروق بسيطة؟؟؟ ده معناه إن اللى جابها زمان لو حب يبيع هايقعد بيها جنب الحيط و يعيط لإن اللى هايشترى مستعمل قدامه حاجات متطورة بكتيير عن اللى معا حضرتك و تقريبا بنفس السعر و تضطر سيادتك تنزل فى السعر لحد ما تعرف تبيع ........... الخلاصة إن شركة رينو بتستعبط و بتضرب قدامى المشترين فى مقتل

7- قطع الغيار خارج التوكيل:
- لانوس : بتتوزع ببلاش على الصابون فى السوبر ماركت
- لوجان : التوكيل و كام محل يتعدوا على صوابع الإيد الواحدة و مش بيبيعوا كل قطع الغيار عندهم الحاجات الأساسية بس ... علما بإن بعض الروايات بتقول إنك ممكن تتزنق فى حاجة ما تلاقيهاش فى التوكيل نفسه!

الخلاصة و قرارى المصيرى:

لو إشتريت اللوجان هأشتريها و أنا حاطط إيدى على قلبى و قدامى مليون "يا ريتنى" ممكن أقولهم فى يوم من الأيام

لو إشتريت اللانوس هأكون مطمن حتى لو حسيت إنى مش بأجيب حاجة جديدة أو مختلفة لكن هأكون مرتاح البال

و المثل يا ولاد عمى بيقول" فوات ربح ولا تحقيق خسارة محتملة" يعنى لو اللوجان فيها خير هايفوتنى لو ما إشتريتهاش ده أهون بكتير من إنى أشتريها و ألبس و أرجع أقول يا ريت اللى جرا ما كان

بسم لله العاطى الوهاب توكلت عليه وهو حسبى و نعم الوكيل .... الإجابة : لاااااانوس