رد: اية اطرف موقف حصلك مع بداياتك فى السواقة ؟؟؟؟
 

فكرتني بالذي مضي هقولك يا سيدي و امري لله

1 - أول مره كنت أركب عربية كان عندنا مزرعة و الولد اللي كان هناك خد عربية المهندس 125 فيات و أنا كنت معاه و قولتله هات أسوق و قولي أعمل ايه .. الكلام دا و أنا عندي 14 سنة .. المهم قالي تعالي و قالي أعمل ايه .. كنا ماشين جنب ترعة و أنا الدركسيون فلت مني و كنا هننزل في الترعة و هو لحق و شد الهاند .. و بعدين هو جه ساق

2 - كان عندي كان عندنا عربية 504 بيجو و كان أول يوم العيد فلبست بدري و نزلت أخدت العربية من وراهم و قولت هطلعها من الجراج علشان أعملهم مفاجئة .. و فعلا كانت مفاجئة و انا طالع من الجراج و كله عماويد و أخدت ملف علي الضيق و الباب الشمال اللي ورايا ضاع و طبعا هي دي كانت مفاجئة أول يوم العيد بتاعتي

رد: اية اطرف موقف حصلك مع بداياتك فى السواقة ؟؟؟؟
 

شوفتة بقى اد اية موضوع لذيذ وكوميدى للأخر

رد: اية اطرف موقف حصلك مع بداياتك فى السواقة ؟؟؟؟
 

فكرتنا بايام زمان اللذيذة

رد: اية اطرف موقف حصلك مع بداياتك فى السواقة ؟؟؟؟
 

انا بقة حصل معايا كذة موقف بس ابويا هو الى كان يعرف امى لا و لو عارفت كانت تبقى مصيبة
و المرة الوحيدة الى ابويا معرفهاش قبل كان عندى 15 سنة كنت ماشى و معايا واحد صحبى و كان واحد صحبى تانى فى البلكونة طلعت راسى من العربية و كانت 125 و بجرى و بنده عليه لقيت حاجة بتعمل طش و الى جمبى بيقولى اجرى رحت رجعت بضهرى فرك و طلعت افرك ادام و امركت فى الشارع على الناصية و كانت اول مرة و كانت العربية الى خبطها 128 روحت ركنت العربية و رجعت مشى لقيت صاحبى ده واقف تحت و بيقولى محدش شافك قلت الحمد لله ببص على ال 128 لقيت الرفرف ضايع و الازاز و الباب و انا كل الى حصل عندى الفانوس اتكسر و روحت سبت العربية مكانها و كأنى معملتش حاجة و الحمد لله مخدش باله منها و الى انا خبطله العربية دلوقتى صاحبى

رد: اية اطرف موقف حصلك مع بداياتك فى السواقة ؟؟؟؟
 

لا حركة صياعة صياعة يعنى عامل زى واحد صحبى كان مع ابوه عربية شاهين كان كل ما يخدها يكسر الاكصدام يروح يغيره و يرمى عليها تراب عشان يبان ان هو الاقديم

رد: اية اطرف موقف حصلك مع بداياتك فى السواقة ؟؟؟؟
 

اة لو الوالد شاف الموضوع دة اللى انا عاملة مش حيركبنى ولا عربية ولا القديمة ولا الجديدة بتاعتى !!!ههههههههههههه

رد: اية اطرف موقف حصلك مع بداياتك فى السواقة ؟؟؟؟
 

انا بقى حكايتى حكايه ..

من وانا طفل صغير عندى 3 سنين كنت اركب جنب ابويا عربيته الكورولا 1984 الاتوماتيك واعرف نقلات الفتيس وازاى العربية بتمشى .. ولولا انى كنت لسه قصير ومش طايل الدواسات كنت ممكن اتحرك بالعربية .. الكلام ده بجد والله تقدروا تقولوا انا مولود فى عربية ..

وكنت غاوى وانا طفل (من اول 5 سنين مثلا) وانا راكب جنب البوب اعد اتحايل عليه يسيبلى الدركسيون ويدوس هو بنزين .. وكان بيوافق بصعوبه ..وفعلا والله كنت بعرف اوزن العربية فى خط مستقيم واخد ملفات وكده .. سبحان الله ..

بدات بقى سواقه فعليه وانا عندى 10 سنين على عربية ولاد خالتى بيجو 305 موديل 1978 وكنت بسوق زى القرد ههههههه .. الطريف انى اول مرة ركبت فيها العربية دى (اول عربية اسوقها فى حياتى) كان زوج خالتى هو اللى راكب معايا وهو اصلا مش بيعرف يسوق لكن يعرف الاساسيات (نقلات الفتيس والدبرياج وكده) .. واخدت لفه حول الحى اللى هما ساكنين فيه كله ..

ومن ساعتها وانا معروف فى العيلة (الاسطى حسام) ... والله بجد حاجة مسخرة ...

وطبعا كنت طول الفترة دى (8 سنين تقريبا ) بسوق من غير رخصة لكن كل فين وفين يعنى ..

وبعدين والدى وانا عندى 16 سنة جاب العربية الهيونداى الافانت 1997 (بتاعتى دلوقتى) ومهنتوش عليها غير اسبوع وخدتها منه لدرجة انه كان هيبيع الكورولا الـ 1984 ورجع فى كلامه .. ومن ساعتها بقت بتاعتى ..

حصلى بقى فى السنتين دول مواقف وطرائف ومغامرات كتيييييييير جدا مع المرور ..

فى مرة منهم جريت كوموسطبل ورايا لمده نص ساعة .. و اللى يضحك انه مكنش هيوقفنى لكن انا اول لما شفته جاى ورايا همت مديها كيك داون لدرجه انه كان فاكرنى واحد معاه سلاح او مخدرات .. وبعد نص ساعة الحمد لله عرفت ازوغ منه لكن فى نفس اليوم باليل شافنى وراح موقفنى وكان يوم ما يعلم بيه الا ربنا ... ودلوقتى بقينا اصحاب انا وهو ... ههههههه


وفى مره تانيه كنت ماشى فى شارع زحمه على اليمين (لانى كنت لسه داخل من شارع جانبى) المهم امشى متر واقف وكده فكان واحد (بيجو 504 بس متظبته جامد) واقف قدامى على اساس ان الشارع واقف .. اتاريه كان مستنى ناس .. اللى يغيظ انه كان واقف بالظبط تحت يافطة ممنوع الانتظار .. وبالعافيه غيرت الحارة وجيت جنبه قلتله مينفعش كده يا كابتن الوقفة دى (فى اللحظة دى كان 3 شباب تانيين يركبو العربية معاه ) وقام معجبوش الكلام وراح مدور وطاير ورايا .. يااااااااااه كان يوم .. لفينا بورسعيد كلها والله العظيم وهو طاير ورايا .. المصيبة انه كان عاوز يقفل عليا وينزلوا ويضربونى ويكسروا العربية وكده .. والواد كان سويق بصراحة والعربية كانت شديدة .. المهم حوالى 45 دقيقة وهو ورايا .. قلت لازم الواح بقى يشغل دماغه قمت لفيت ملف (زى اليو تيرن بس من غير الحمايه يعنى لازم تستنى العربيات تعدى وبعدين تكبس انت) قمت مره واحده كابس على ميكروباس اجرة وطبعا سواق الميكروباس اتغاظ راح كابس ورايا علاطول وقفل على صاحبنا بتاع البيجو ونجوت انا باعجوبة .. هههههههههه .. كان زمانى دلوقتى المرحوم حسام ..


لسه عندى حكايات متخلصش هقولهالكوا بعد كده ..

واسف على الاطالة يا جدعان ..