|
رد: ما هى قصتك مع اول سياره تسوقها " اعترف"
محدش هيصدق بس انا اول عربية سوقتها كانت عربية بابا نسر شاهين1.4و كان عندي وقتها 12 سنة.
العربية موديل 2001 والغريب في الموضوع انا محدش علمني اسوق ازاي . من وانا صغير عندي هوس بالعربيات وكنت كل ما ااعد جنب اي حد بيسوق اتفرج علية هو بيعمل اية .ساعتها كان بابا بيعمل عمرة وكان سايب المفتاح بتاع العربية اخدت المفتاح ونزلت دورت العربية اول ما جيت احركها بطلت بس بعدها اتحركت عادي وغيرت وجبت التاني والتالت وبقيت هيصة سوقتها ساعتين وركنتها اودام البيت تاني ومن ساعتها وانا بسوق العربية دي والحمد للة معملتش بيها اي حوادث والعربية سليمة ومفهاش خدش وعاملة دلوقتي 86 الف ك/م ومتغيرش فيها حاجة وبتروح المركز كل شهرين وبهتم بيها اكتر من نفسي |
رد: ما هى قصتك مع اول سياره تسوقها " اعترف"
اول عربيه كانت 128 مو 71 و كان عندي 13 سنه ( اكيد ماكانش عندي 13 سنه71 علشان استاذ اسلام )
جت بالصدفه لأني كنت متوقع ان والدي يرفض يعلمني بس لما شفنا خالي بيعلم ابنه و كان اصغر مني بسنه اتشجعت وقلت لوالدي و والدي وافق .... كنت فاكره مقدرش يقولي لأه لان مشهد ابن خالي و هو بيسوق احرجه لكن الحقيقه انه علمني و عمره ما سابني اسوقها لوحدي الا علشان انزل اركنهاله كل يوم باليل (وده ساعدني جدا اقدر ابعاد العربيه و النقل و المناوره)...... يعني قعدت اتعلم 5 سنين و بالتصوير البطئ الممل .... لما كان عندي 16 كنت خلاص فريكيكو ... انما معيش رخصه و ابويا قاعد جنبي ..... زلني ... إعمل كده متعملش كده .... المشكله ان هو كان بيعمل عمايل .... ما علينا. واول ما جبت عربيه ليه لوحدي (سكودا فيليشيا) دخلتها جراج و بقيت اسيبهالهم على الباب و هما يركنوها ( عقد بقى) |
رد: ما هى قصتك مع اول سياره تسوقها " اعترف"
هو أنا بقي شكلي وحش قوي كده ياولادptmnlo123per144
معلش العتب علي النظرptmnlo123per1127 |
رد: ما هى قصتك مع اول سياره تسوقها " اعترف"
اول عربيه سوقتها كانت بتاعت بابا لادا 2107 خبط عسكري بتاع حرس حدود في راس البر ptmnlo123per1127
تاني عربيه كانت نوبيرا اتوماتك دي انا دمرتها بسبب اني كنت بعاملها معامله الادا حاليا معايا بسات 99 و الحمد لله تمام معايا طبعا بين الادا و النوبيرا كان في مرسيدس 230 بس دي انا خفت اسوقها لانها كانت طياره و كبيره و كنت شبر و نص |
رد: ما هى قصتك مع اول سياره تسوقها " اعترف"
أول عربية سقتها كان ايام اعدادى أو ثانوى بالكتير مش فاكر بصراحة
و كانت 131 و كانت بتاعت واحد صاحبى كان سارقها من ابوه طبعا :) و انا كنت بحب العربيات من صغرى فا كنت عارف السواقة نظرى مش عملى و اول ما طبقتها عملى يا سلام على الاحساس :) زى سواقة العجل بالظبط و الحمد لله ربنا ستر يومها و احنا كمان كنا فى مكان فاضى :) و بعد كدة خلاص بقى فتحت على البحرى :) بس العربية اللى مش ممكن انساها كانت مرسيدس s350 موديل 2005 بجد وهم الأوهام فعلا طيارة مش عربية اللهم اوعدنا جميعا |
رد: ما هى قصتك مع اول سياره تسوقها " اعترف"
انا هبتدي من قبل السواقه
اول عربيه اعجبت بيها كانت سياره والدتي داتسون صني 85 و سياره والدي تويوتا كرسيدا و كان معاه ايضا تويوتا هايلكس الكلام ده و انا عندي 5 سنين و كان خالي معاه المازدا 929 كوبيه و مرسيدس 230 و كنت بحب اتفرج على العربيات و اتابعهم و هم بيسوقوا كلهم كانت مانيوال و في سنه 87 ايام ما كان عندي 7 سنين كده نزل والدي من بره و معاه تويوتا كراون و كانت اول مره في حياتي اشوف الفتيس الاوتوماتيك و الزجاج الكهرباء كنت منبهر الصراحه و والدي توفي في 1 يناير 1988 و فضلت العربيات فالجراج و اكتفت والدتي ب شرائها عربيه 128 ليها على انها تستخدم سيارات والدي لفتره طويله كنت بخش و ادعبس فالعربيات بس اول مره اسوق كانت الهايلكس و الحمد لله مخبطش حاجه طلعت قدام سنه بس نطرت و بطلت و جربت تاني لحد ما ظبطها و فضلت كده مده و اتعلمت الركن مع نفسي و مبتديتش اسوق غير و انا عندي 20 سنه تقريبا كنت بقول فالعالم اللي بيسوقوا فالشارع انهم ------ مش بني ادميين و كده فمكنتش عايز اسوق اكتشفت بعدين انهم احسن مليون مره من العالم بتوع دلوقتي بعد كده كرسيدا ثم الكراون ثم لكزس ال اس 400 و بعديها سافرت و عده عليا شويه العربيات بورش 911 كاريرا و افنسيس ستيشن و بي ام ام 3 فالمانيا و مونديو و فوكس في دبي و رجعت مصر بطلت سواقه تاني يعني كله عمري سواقه سواقه لا يتعدى 7 سنوات بس الحمد لله بسوق كويس باراء من حولي |
رد: ما هى قصتك مع اول سياره تسوقها " اعترف"
يا سلاااااااااااااااام
زكريات جميلة والله اول عربية ياه كان عمي الله يرحمه معاه تويوتا مش عارف موديل ايه عاملة زي الجيب الويلز الميري كدة اكصدامها بارز جدا قدام عامل زي القطر وهي عبارة عن كبينة والنص الخلفي جلد وشيك كنت اعيط علشان يخليني اسوق كنت في اولي اعدادي او تانية كان هو شباب في العشرينات من العمر كان شرطه اني اغسلها واروقها برة وجوة ويخليني اسوق كنت اجيب زمايلي وبخرطوم المية ونغرقها مش نغسلها وكان بعد كل غسلة يقعد جنبي ونمشي بيها وانا سايق طبعا لمسافة حوالي 2 كيلو اول وتاني بس ومرة غسلتها ومكانش موجود واخدت المفتاح وطلعت بيها وبعدين وانا بلف المكان مكفاش وجه البوز قدام الجدار بتاع دكان عم علي وكان قافل ساعتها وتهيالي اني جبت مارشدير بس اتاري كان غيار امامي وشلت رجلي بارتباك ووقع المحظور الاكصدام اللي زي القطار دخل جوا الدكان وكان العيال صحابي معايا بطلنا العربية ومورناها وفضلنا نزق ورا قدام لحد اما دورنا وشها علي الطريق وركبنا ورجعنا ولا من شاف ولا من دري المهم بقا ان عم علي الله يرحمه لما شاف الدكان مخروم افتكر ان فيه حرامية حاولو يسرقو الدكان ونقبو الجدار بس الحمد لله مفيش حاجة راحت واحنا بقي نسمع الحكاية ونضحك وحرمت اركب لوحدي بعد كدة لحد اما كبرت وتوظفت في شركة مقاولات وكان معانا عربية نص نقل شيفورليه اللي قبل الدبابة كانت بنزين كان السواق ييجي عايز ينام اخدها منه واسوقها جوا الموقع لحد اما بقيت بروفيشنل في السواقة وبعدين مطولش عليكو قولو انت طولت خلاص ال 128 و131 وشاهين وبيجو 504 وبيجو 505 ونيسان صني واخيرا اوبترا ده اساسي اما القيادة لمرة او مرتين حدث ولا حرج واشكر صبركم عليا |
| الساعة الآن 05:03 PM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017