رد: مشكلة تنك البنزين بيتملي النص بس | فيات 128
 

ياسلام عليك هو دا بالظبط اللى حصل معايا
روحت عملت سمكره وفكيت التنك ، ولما جيت اركبه كان خرطوم الفايز مشقق فغيرته وركبنا التنك تاني ومن بعدها الحوار دا ظهر ، وروحت للميكانيكي ، مش مصدقني وبيقولي ايه اللى انت بتقوله دا ... اقوله التنك مبياخودش غير النص قالي طيب هنروح البنزينه سواء ونفول قولتله ياسلام اروح البنزينه افول ب 50 جنيه عشان تصدقني ... انا الحوار دا خانقني فعايز اعرف مصدر المشكلة عشان اروحله اقوله نفذ كذا

الميكانيكي نزل من تحت وبص على التنك من غير ما يفكه وقالى كل حاجة تمام ، وقالي خرطوم الفايز مالهوش دعوة بالكلام دا

ياباشا التنك بتاع العربيه من ساعة ما اشتريتها من 3 سنين والحوار دا حصل بعد فك التنك وتركيبه مرة اخرى وتغيير خرطوم الفايز ، والتنك مفيهوش لا خرم ولا خبطات

رد: مشكلة تنك البنزين بيتملي النص بس | فيات 128
 

هفهمك ياباشا ، لو التنك بيدلق وانت ماشي دا عيب خرطوم فايز لاما مش راكب لاما مشقق ،دى حاجة مش هنختلف عليها وساعتها بتلاقي العربيات اللى وراك بتديك كلاكس وبتقولك فى بنزين او مياه نازله من العربية وهتشم ريحة بنزين جامدة حوا العربية ... المشكلة دى مش عندى اساسا ...
الحاجة التانية انا بقولك العربية وقفت معايا 3 مرات وكل مرة بجيب 4 لتر من اى بنزينه فى جركن واحطهم العربية تشتغل على طول معني كدا ان العربية وقفت بنزين يعني التنك فاضي ، المفروض بقي لما اروح البنزينه حتي لو العوامه بايظة وافولها تاخد مش اقل من 25 لتر بنزين 80 ، لكن هو بيحط فيها تقريبا ب 10 جنيه ومبيعرفش يحط اكثر من كدا لان التنك بيشرق ويقعد يدلق برا ، ودا معناه ان التنك اتفول ، بس ازاى يتفول ب 10 جنيه ... فهمت ياباشا العوامه مالهاش علاقة بالحوار دا ، دا غير انها العداد بيقرأ النص بالظبط ويقل كل ما امشي معناها ان القراءة صحيحة لكن العيب فى التنك مبياخودش غير النص

غالباً فعلا العيب منه ، انا دورت فى المشكلة دى على النت بس لاقيت العيب دا فى عربيات موديلات جديدة بيكون المشكلة فيها الهواء ، في منظم للهواء داخل التنك والمفروض ان الهواء يقل كل ما تحط بنزين ، فالمشكلة ان الهواء مش بيقل وبياخد نص التنك عشان كدا التنك مش بيتعبي للاخر ، بس احنا فى الفيات ال128 معندناش منظم هواء تقريباً او خرطوم للهواء للتنك ، الله اعلم بس دا اللى اعرفه ...
وفك التنك مسألة مش سهلة اعتقد ...

ما هو ياباشا انا قولت التنك اصلا مش بياخد اكثر من 12 لتر تقريبا ، دا مالهوش علاقة بماسورة السحب ، انا عربيتي بفولها دايماً ب 28 جنيه يعني التنك تقريبا 30 لتر ...



عليكم السلام
ما انا روحت للميكانيكي ومش مصدقني
والتنك مفيهوش طينه ولا حاجة - لو فيه طينه ياباشا او رمل او اى مادة تانية غير البنزين كان سد ماسورة او خرطوم سحب البنزين والعربية عطلت من ساعتها وكان الماتور حصله حاجة ... كلامك يبقي صح لو جوا التنك خرسانة مسلحة ونشفت ههههههههه كدا فعلا مش هتعطل العربية والتنك هياخد النص بس اساسا هتدخل ازاى جوا التنك

رد: مشكلة تنك البنزين بيتملي النص بس | فيات 128
 

لو خرطوم الفايظ نازل جوه التنك لمستوى واطي البنزين ها يملي لحد ما يوصل لطرف الخرطوم ومش ها يعلي عن كده لان الهوا بقي محبوس فوق سطح البنزين
ولما بتملي البنزين براحة التنك بيتملي معاك علشان بتيب فرصه للهوا يخرج من فتحة الملئ
كانك بتملي قلة بالظبط , لو فتحت الحنفيه جامد وانت بتملي القله الميه ها تفيض من زور القله لان الهوا مش ملاحق يخرج , لكن لو فتحت ببطئ المية ها تدخل والهوا يخرج من نفس الزور
راجع خرطوم الفايظ ما يكونش نازل جوة التنك لمستوى منخفض علشان يدي فرصة الهوا يخرج من مكانه الطبيعي مش من فتحة الملو

رد: مشكلة تنك البنزين بيتملي النص بس | فيات 128
 

انا مينفعش اعمل كدا
انت عارف طوابير بنزين 80 عامله ازاى
بس يمكن لو جبتها فعلا زى ما بتقول هتاخد معايا

رد: مشكلة تنك البنزين بيتملي النص بس | فيات 128
 

انا حاسس ان كلامك صح لان فعلا المشكلة حصلت بعد تركيب خرطوم الفايز وزى اما انا قريت ان ضغط الهواء هو اللى عامل مشكلة
هروح للميكانيكي واشوف اللى انت قولت عليه دا واتاكد
وان شاء الله خير

رد: مشكلة تنك البنزين بيتملي النص بس | فيات 128
 

الله ينور عليك انا اشاكك في كدة بردة ..... وانا وراه والزمن طويل

رد: مشكلة تنك البنزين بيتملي النص بس | فيات 128
 

هو انا استجرى اعمل كدة في طبور 80
حضرتك انا كنت في اسماعليه وكانت البنزينه فاضيه خالص بس طرضوني برضوا :w6w200504112235376e